DANIELA 10:1 - Buka Helaga (Hiri Motu) 1993

¹ Sairasi ia Parasa ena king lagani namba 3 neganai hereva ta Dirava ese ia hedinaraia Daniela dekenai, iena ladana ta be Belitisasa. Inai hereva be momokani, bona ia be tuari bona nega dika herevana. Inai hereva ena anina be Daniela ese ia abia, badina mata hanai dekenai iena anina ia davaria.

DANIELA 10:1 Iomraidhean Croise

GENESE 41:32

Oi be nega rua oi nihi, badina be Dirava ese inai kara do ia karaia momokani, bona nega do ia daudau lasi, Dirava ese do ia havaraia.

2 SIVARAI 36:22

Sairasi, Parasa ena king, ena king lagani ginigunana lalonai, Lohiabada ena hereva, Ieremia ese ia gwauraia gauna, be ia vara momokani. Lohiabada ese Sairasi ena lalona ia veria, vadaeni Sairasi ese oda ta iena basileia ena kahana ibounai dekenai ia gwauraia, bona ia torea danu.

ESERA 3:7

Unai dainai nadi gaukaralaia diba taudia, bona kamuta taudia dekenai moni idia henia. Bona aniani bona inua gauna bona olive dehoro be Sidono bona Turo taudia dekenai idia henia, sida audia be Lebanona dekena amo idia abia totona. Unai sida audia be Iopa kone dekenai idia atoa. Unai gaukara totona be king Sairasi ese gwaumaoro ia henia.

ESERA 4:3

To Serubabele bona Iosua bona Israela iduhu lohia taudia ese idia haere, idia gwau, “Ai ese ai karaia noho Dubu, aiemai Dirava ena, be emui gaukara lasi. Ai Israela taudia sibona ese do ai haginia, Lohiabada, Israela ena Dirava, ena, king Sairasi, Parasa ena king, ese ai dekenai ia oda henia hegeregerena.”

ESERA 4:5

Idia ese danu Parasa gavamani taudia haida dekenai moni idia henia, inai Iuda taudia edia gaukara do idia koua totona. Unai bamona idia karaia noho, Parasa ena king, Sairasi ena nega, ela bona Dariuse, Parasa ena king ena nega lalonai danu.

ESERA 6:14

Iuda tau badadia ese Dubu Helaga idia haginia, bona peroveta taudia Hagai bona Sekaraia ese edia lalodia idia hagoadaia dainai, edia gaukara idia karaia namonamo. Dubu haginia gaukara be idia karaia haorea, Israela ena Dirava ena oda, bona king Sairasi, bona king Dariuse, bona king Aratasaseta, Parasa taudia edia king, edia oda dainai.

ESERA 6:3

“King Sairasi ese iena king dagi ia hamatamaia lagani ginigunana lalonai, oda ia gwauraia, Dubu Helaga be Ierusalema dekenai do idia haginia lou, boubou, bona Lohiabada dekenai henia gaudia, do idia gabua ena gabu totona. Dubu Helaga ena ataiai latana be 27 mita, ma iena lababana danu be 27 mita.

ISAIA 44:28

Lau ese king Kurese dekenai do lau hereva, lau gwau, ‘Oi ese lauegu ladana dekenai, tanobada do oi gunalaia. Lauegu ura be oi ese do oi karaia. Oi ese do oi oda, vadaeni Ierusalema do idia haginia lou. Bona oi ese do oi oda, vadaeni Dubu Helaga ena badina nadidia do idia haginia!’ ”

DANIELA 1:17

Dirava ese unai taudia 4 dekenai aonega namona ia henia, bona aonega davaria dalana danu idia diba momokani. Ma Daniela dekenai Dirava ese aonega ia henia, vadaeni mata hanai bona nihi edia anina ia gwauraia diba.

DANIELA 1:21

Daniela be unai gaukara dekenai ia noho, ela bona king ena dagi be Kurese ese ia abia Babulonia dekenai.

DANIELA 1:7

Hesiai tauna badana ese idia ta ta dekenai ladana matamata ia henia, ladana inai, Belitisasa, Sataraka, Misaka bona Abetenigo.

DANIELA 10:14

Hari lau mai badina korikori be, dokona neganai oiemu bese taudia dekenai do idia vara gaudia do lau hedinaraia totona. Badina inai mata hanai ena anina be vaira nega daudau do ia vara.”

DANIELA 11:2

Unai tau ma ia hereva, ia gwau, “Hereva momokani lau hadibaia inai: King toi ma ese Parasa do idia biagua, gabeai namba 4 do ia toreisi, iena kohu be do ia bada herea momokani. Iena kohu bona siahu idia bada herea momokani neganai, iena boiboi dainai bese momo herea ese ia do idia durua, vadaeni do idia lao, Helene dekenai do idia tuari karaia.

DANIELA 12:4

“To oi Daniela, inai peroveta herevana do oi hunia noho, bona inai buka do oi koua momokani, do ia noho ela bona dokona negana ia ginidae. Unai neganai taunimanima momo do idia heau lao, heau mai, bona aonega do ia bada herea.”

DANIELA 12:9

Unai tau ia haere, ia gwau, “Daniela, vadaeni, oi lao, badina inai hereva ena anina be do hunia bamona ia lao, ela bona dokona negana ia ginidae.

DANIELA 2:21

Nega be ia ese ia biagua bona ia haidaua. Ia ese king ia atoa, bona king ia kokia. Aonega bona diba ia henia taunimanima dekenai.

DANIELA 4:8

“Gabeai Daniela ia mai, iena ladana ta be Belitisasa, lauegu dirava ena ladana hegeregerena. Ia dekenai dirava helagadia edia lauma ia noho. Ia dekenai unai nihi lau hadibaia, lau gwau,

DANIELA 5:12

“Inai tau ena aonega be idau, bona nihi edia anina hedinaraia ia diba momo, bona hunia gaudia bona hereva aukadia ia gwauraia diba. Namona be hereva oi siaia, inai tau, Daniela, oiemu tamana ese iena ladana ia atoa Belitisasa, do ia mai. Inai Daniela ese inai hereva ena anina oi dekenai do ia hamaoroa.”

DANIELA 5:17

Daniela ia haere, “Oiemu harihari gaudia be lau ura lasi, idau tauna ta dekenai oi henia. To inai toretore do lau duahia, bona inai hereva ena anina do lau hedinaraia oi dekenai.

DANIELA 6:28

Dariuse bona Kurese be Parasa ena basileia dekenai idia king noho neganai, Daniela ena kwalimu ia bada lao.

DANIELA 8:16

Ma tau ta ena gadona lau kamonai, Ulai Sinavai unai kahana dekena amo ia boiboi mai, ia gwau, “Gaberiela e, unai mata hanai ena anina unai tauna dekenai do oi hadibaia.”

DANIELA 8:26

Inai dina 2,300 ena mata hanai oi dekenai ia hedinaraia gauna do ia momokani, to taunimanima dekenai do oi hedinaraia lasi, badina nega daudau ia noho ela bona do ia vara momokani.”

LUKA 1:20

To egu hereva namona oi hamomokania lasi. Unai dainai oiemu uduna do ia koua, oi be do oi hereva diba lasi, ela bona lauegu hereva gaudia ibounai do idia vara. Lauegu hereva gaudia be edia nega korikori dekenai do idia vara momokani.”

APOKALUPO 19:9

Vadaeni unai aneru ese lau ia hamaoroa, ia gwau, “Inai hereva do oi torea: Mamoe ena Natuna ena headava aria dekenai idia boiboi taudia be do idia moale bada.” Ma aneru ia gwau, “Inai be Dirava ena hereva momokani.”