1 PETERO 4:4 - Buka Helaga (Hiri Motu) 1993

⁴ Harihari inai Dirava diba lasi taudia be idia hoa, badina umui ese unai bamona lebulebu karadia umui karaia lou lasi. Oibe, idia edia kara dekena amo umui raka siri vadaeni, unai dainai unai Dirava diba lasi taudia ese umui idia hereva dika henia noho.

1 PETERO 4:4 Iomraidhean Croise

MATAIO 23:25

“Taravatu hadibaia taudia bona Farisea taudia, kara koikoi taudia, dika do umui davaria momokani! Badina be umui ese kapusi bona mereki edia murina kahana sibona umui huria goevagoeva, to edia lalona kahana be dadia kara bona lebulebu kara dekenai idia honu momokani.

LUKA 15:13

Dina momo lasi idia ore, murinai ia vara tauna ese iena kohu ibounai ia haboua, vadaeni ia lao ena laolao dekenai, tano daudau dekenai ia lao, unuseni kara idauidau dekenai iena kohu ia halusia kava.

APOSETOLO EDIA KARA 13:45

To Iuda taudia ese inai taunimanima momo idia itaia neganai, idia mama. Paulo ena hereva idia ura koua mai hereva dika danu.

APOSETOLO EDIA KARA 18:6

To idia ese iena hereva idia koua mai hereva dikadia danu neganai, Paulo ese iena dabua ena kahu ia negea oho, bona ia gwau, “Vadaeni, umui emui kerere be emui latanai ia noho, lau be kerere lasi. Harihari lau be idau bese taudia dekenai do lau lao.”

ROMA 13:13

Iseda kara do ita naria namonamo, iseda raka be dina dekenai do ita raka. Do ita lebulebu lasi, do ita inua kekero lasi, do ita heudahanai lasi, do ita sihari kava lasi, do ita heai lasi, do ita mama lasi.

EFESO 5:18

Inuinu dekena amo do umui kekero lasi, inai be emui mauri do ia hadikaia. To Lauma Helaga dekena amo do umui honu.

1 PETERO 2:12

To Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.

1 PETERO 3:16

Mai emui laloa maoromaoro do umui noho. Vadaeni umui dekenai idia hereva dika henia, Keriso umui badinaia dainai, unai taudia ese do idia hemarai. Edia hemarai ena badina be, emui kara namodia idia itaia dainai.

2 PETERO 2:12

Inai tau dikadia be uda boroma bamona, idia be mai edia lalona lasi. Idia ese tauanina ena ura sibona idia karaia. Unai bamona idia vara, bona unai bamona do idia mase. Idia diba lasi gaudia idia hereva dika henia. Uda boroma idia mase bamona, idia danu do idia mase ore.

2 PETERO 2:22

Inai kara idia karaia, ena anina be aonega hereva momokani rua bamona, idia gwau, “Sisia be iena mumuta dekenai ma ia giroa lao noho,” bona “Boroma be idia huria, to kopukopu dekenai ma ia giroa lou.”

IUDA 1:10

To inai hadibaia koikoi taudia ese idia diba lasi gaudia dekenai idia hereva dika noho. Idia be uda boroma bamona, mai edia lalona lasi. Unai dainai idia diba gaudia sibona idia karaia. Bona inai idia diba gaudia, inai kara dika ese ia hakaudia dainai, idia sibodia edia mauri idia hadikaia ore.