1 PETERO 4:10 - Buka Helaga (Hiri Motu) 1993

¹⁰ Iena hariharibada dekena amo, Dirava ese umui ta ta ibounai dekenai harihari gaudia idauidau ia henia vadaeni. Unai dainai, umui ese inai harihari gaudia do umui gaukaralaia, emui Keristani varavara taudia do umui durua totona. Unai dekena amo umui be Dirava ena hesiai taudia namodia, bona iena hariharibada idauidau umui hedinaraia noho.

1 PETERO 4:10 Iomraidhean Croise

MATAIO 20:28

Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia atoa diho, taunimanima momo edia dika davana karaia totona.”

MATAIO 24:14

Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”

MATAIO 24:21

Badina be unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.

MATAIO 24:45

“Hesiai tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona biaguna ena natuna edia aniani neganai edia aniani do ia henia, tauna be daika?

MATAIO 25:17

Inai bamona danu, 2000 kina ia abia tauna be ia lao, 2000 kina ma ia abia.

MATAIO 25:44

“Vadaeni idia danu do idia haere henia ia dekenai, do idia gwau, ‘Lohiabada e, edena negai ai itaia oi, oi hitolo, o oi ranu mase, o oi be idau tauna, o oi be dabua lasi, o oi gorere, o oi be dibura ruma dekenai oi noho, vadaeni oi dekenai durua ai henia lasi?’

MAREKO 10:45

Badina Taunimanima ena Natuna ia mai lasi, hesiai taudia ese iena gaukara idia karaia totona, to ia mai be hesiai gaukara ia karaia totona, bona iena mauri do ia atoa diho, taunimanima momo edia dika davana karaia totona.”

LUKA 12:42

Lohiabada ia gwau, “Kohu naria tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona aniani neganai, iena hesiai taudia edia aniani do ia henia, tauna be daika?

LUKA 19:13

Unai dainai iena hesiai taudia 10 ia boiria guna, 20 kina idia ta ta dekenai ia henia, ia gwau, ‘Do umui hoihoilaia ela bona do lau giroa mai.’

LUKA 8:3

Ma ta be Ioana, Kusa, Heroda ena kohu ia naria tauna, ena adavana. Ta be Susana. Bona hahine momo danu, idia ese edia gau dekena amo Iesu idia ubua.

ROMA 15:25

To harihari lau be Ierusalema dekenai lau lao inai, unai taudia durua totona.

ROMA 15:27

Idia sibona edia lalokau dekenai idia henia, ta ese ia oda henidia lasi. To momokani unai ogogami taudia idia durudia be namo bona maoro. Badina korikori be, Iuda taudia ese edia lauma gau namodia idia henia vadaeni Iuda lasi bese taudia dekenai. Unai dainai inai Iuda lasi Keristani taudia ese namo edia kohu ma do idia henia Iuda Keristani taudia dekenai, durudia totona.

1 KORINTO 15:10

To Dirava ena hariharibada dainai, lau be harihari aposetolo dagi lau karaia noho. Bona lau dekenai ia henia hariharibada be ia henia kava lasi, badina be gaukara bada herea lau karaia vadaeni, aposetolo taudia ibounai lau hereaia vadaeni. To inai be lauegu goada dekenai lasi, Dirava ena hariharibada be lau danu ia noho, ia ese ia karaia.

1 KORINTO 3:10

Dirava ese iena hariharibada dekena amo, ruma haginia tauna badana ena aonega lau dekenai ia henia. Vadaeni lau ese ruma ena du lau haginia vadaeni. Ma tau ta ese unai du ena latanai ruma ia haginia noho. To du latanai ruma idia haginia taudia ta ta, namona be edia gaukara dalana idia naria namonamo.

1 KORINTO 4:7

Egu turana e, edena bamona oi be hekokoroku momo? Oi davaria gaudia ibounai be Dirava ese oi dekenai ia henia vadaeni, ani? Oibe, Dirava ese inai gau oi dekenai ia henia, harihari gaudia bamona. Unai dainai, badina dahaka oi hekokoroku, inai gau sibona oiemu goada dekena amo oi abia bamona?

2 KORINTO 6:1

Ai be Dirava danu ai gaukara hebou dainai, umui ai noia goada inai bamona, “Umui ese Dirava ena hariharibada umui abia vadaeni, be umui negea kava lasi.”

2 KORINTO 9:1

Umui diba vadaeni ai ese moni ai haboua noho, Dirava ena taudia Iudea dekenai durua totona. Unai dainai inai gau totona hereva momo do lau torea lasi.

EFESO 3:8

Dirava ena taudia ibounai edia huanai lau sibona be maragi herea momokani, to inai dagi idauna lau dekenai ia henia vadaeni. Dagi be inai: Sivarai Namona Iuda lasi taudia dekenai do lau harorolaia. Inai be Keriso ena gau namodia ena sivarai, taunimanima sibona edia aonega dekena amo idia davaria diba lasi gauna.

EFESO 4:11

Oibe, Keriso ese harihari gaudia taunimanima dekenai ia henia. Haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia.

2 TIMOTEO 1:18

Lohiabada ena bogahisihisi do ia davaria Dina Badana neganai. Efeso dekenai Onesiporo ese egu hesiai gaukara ia karaia sivaraina, be oi diba vadaeni, ani?

TITO 1:7

Badina be ekalesia orea gunalaia tauna ese Dirava ena gaukara ia naria dainai, ia be kerere ta lasi tauna. Ia be hekokoroku lasi, ia be badu haraga lasi, kekero lasi, bona moni do ia mataganigani henia lasi.

HEBERU 6:10

Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.

1 PETERO 5:10

Umui be nega sisina do umui hisihisi, vadaeni gabeai, hariharibada ibounai Diravana ese umui do ia hanamoa lou momokani, umui do ia haginia goada, bona emui abidadama do ia hagoadaia. Oibe, inai Dirava ese umui ia boiria vadaeni, iena noho hanaihanai hairaina Keriso Iesu danu do umui abia hebou totona.

1 PETERO 5:12

Inai revareva kwadogina be Sila ena imana dekena amo umui dekenai lau torea inai. Lau diba Sila be iseda Keristani varavara tauna korikori. Lau ura inai leta dekena amo umui do lau hagoadaia, bona lau gwauraia hedinarai inai: Dirava ena hariharibada korikori ena dala be inai egu hereva lalonai. Inai hariharibada lalonai do umui gini goada.