1 PETERO 1:4 - Buka Helaga (Hiri Motu) 1993

⁴ Dirava ese ita ia abia hidi, guba dekenai mauri do ita abia. Inai mauri ia noho hanaihanai, ia be goevagoeva, ia bodaga diba lasi. Inai mauri be guba dekenai umui totona ia noho hegaegae.

1 PETERO 1:4 Iomraidhean Croise

SALAMO 31:19

Oi dekenai idia gari henia taudia, be oi ese hanamoa bada herea idia dekenai oi henia. Taunimanima ibounai be inai oiemu kara namona idia diba. Bona oi dekenai idia abidadama taudia, be oi ese oi naridia namonamo, inai danu taunimanima idia diba.

SALAMO 47:4

Dirava ese tano ta ia abia hidi, bona ita dekenai ia henia. Ita be Iakobo ena tubuna, Dirava ese ita ia lalokau henia. Inai tano be iseda tano dainai, iniseni do ita noho, mai moale danu.

ISAIA 66:22

Ma Lohiabada ia gwau, “Badina be guba matamatana bona tanobada matamatana, lau ese do lau karaia gaudia, be egu vairana dekenai do idia noho momokani hegeregerena, umui emui ladana, bona emui tubudia danu edia ladana do idia noho momokani, doko lasi.

ESEKIELA 47:12

Unai sinavai isena ena kahana kahana dekenai huahua audia idauidau ibounai do idia vara. Edia rauraudia do idia kakoro lao lasi, bona edia huahua do idia moru kava lasi, to huahua momo do idia atoa nega ibounai, doko lasi. Hua ibounai lalonai, huahua do idia atoa, badina Dubu Helaga dekena amo ia heau mai sinavai ese ranu momo ia henidia noho dainai. Inai au edia huahua be aniani gaudia, bona edia rauraudia ese taunimanima edia gorere do idia hanamoa.”

MATAIO 25:34

Vadaeni Lohiabada ese iena idiba kahana taudia dekenai do ia hamaoroa, do ia gwau, ‘Umui mai, egu Tamana ese ia hanamoa taudia e, Basileia umui abia, tanobada ia karaia neganai, ia ese ia karaia hegaegae umui emui.

MAREKO 10:17

Dala dekenai Iesu ia raka neganai, tau ta ia heau mai, ia tui diho Iesu vairanai, ia nanadaia, “Hadibaia tauna namona e, dahaka lau karaia, lau mauri hanaihanai abia totona?”

APOSETOLO EDIA KARA 20:32

“Harihari Dirava ena imana lalonai, bona iena harihari bada sivaraina lalonai, umui lau atoa. Ia be mai ena goada umui do ia haginia namonamo. Bona davana namona umui dekenai do ia henia, iena helaga taudia ibounai dekenai danu.

APOSETOLO EDIA KARA 26:18

Edia matana do oi kehoa, vadaeni dibura do idia rakatania, bona mai lalona giroa danu, diari dekenai do idia mai. Vadaeni Satani ena siahu do idia rakatania, bona Dirava dekenai do idia mai. Vadaeni idia edia kara dika do idia gwauatao, lau dekenai idia abidadama henia dainai, bona Dirava ena abia hidi taudia huanai edia gabu do idia abia.’

ROMA 8:17

Bema ita be Dirava ena natuna neganai, ita ese Dirava ena bese taudia do idia abia hanamoa gaudia be ita danu do ita abia, bona Dirava ese Keriso ia henia hanamoa gaudia do ita abia danu. Badina bema Keriso danu ita hisihisi nega tamona, be ia danu iena hairaina do ita abia nega tamona.

1 KORINTO 9:25

Gadara helulu do idia uini totona, heau helulu taudia ese edia tauanina ena ura idia atoa diho, idia tereini goadagoada. Inai bamona idia karaia be, do ia dika haraga kwalimu ahuna abia totona. To ita ese unai bamona do ita karaia be, noho hanaihanai kwalimu ahuna do ita abia totona.

GALATIA 3:18

Bema Taravatu ita badinaia dekena amo Dirava ese iena hanamoa gauna ita do ia henia neganai, ita diba gwauhamata dekena amo do ita abia diba lasi. To lasi. Gwauhamata sibona dekena amo Dirava ese inai hanamoa Aberahamo dekenai ia henia.

EFESO 1:11

Gau ibounai be Dirava ese ia karaia, iena palani hegeregerena. Bona ia ese ai Iuda taudia ia abia hidi, iena bese korikori do ai lao, bona Keriso danu do ai hakapua. Inai be Dirava ena palani, tanobada ia karaia hamatamaia neganai ia laloa gauna.

EFESO 1:14

Ita ese Lauma Helaga ita abia vadaeni, unai dainai ita diba momokani, Dirava ese ia gwauhamata iena taudia do ia henidia gaudia be dohore ita abia. Dirava ese ita ia hoia lou, bona Lauma Helaga dekena amo ita ia makaia, vadaeni ita diba momokani ita be ia dekenai dohore ita noho. Namona be iena hairai diarina ita hanamoa bada!

EFESO 1:18

Ma Dirava lau noia, ia ese emui lalona do ia hadiaria, vadaeni umui ia boiboi totona ahuna ena namo do umui diba momokani, bona unai ahuna do umui naria noho. Lau ura danu Dirava ese iena taudia dekenai dohore ia henia davana bada hanamoa gaudia do umui diba momokani.

KOLOSE 1:12

Tamana ita tanikiu henia be namo, badina be ia ese iseda kara ia hagoevaia. Vadaeni ita be hegeregere, Dirava ena taudia danu, ahuna do ita davaria, diari ena Basileia dekenai.

KOLOSE 1:5

Guna, umui ese Sivarai Namona ena hereva momokani umui kamonai neganai, guba ena mauri namona laloa ese umui ia hamoalea. Unai laloa namona ese emui abidadama bona lalokau ia havaraia. Bona umui diba vadaeni, guba ena davana namona dohore umui davaria.

KOLOSE 3:24

Badina be umui diba, umui ta ta emui kara dainai, Lohiabada ese davana namona umui dekenai do ia henia. Ia ese unai davana ia atoa hegaegae vadaeni umui totona. Badina umui be Lohiabada Keriso ena hesiai taudia.

2 TIMOTEO 4:8

Harihari lauegu kwalimu ahuna, kara maoromaoro ena davana namona, be lau dekenai ia noho hegaegae. Unai Dina Badana neganai, Lohiabada, kota biaguna maoromaorona, ese unai davana namona lau dekenai do ia henia. Bona lau sibona dekenai do ia henia lasi, to mai lalokau danu iena mai dinana idia naria noho taudia ibounai dekenai danu, be ia ese unai davana namona do ia henidia.

HEBERU 10:34

Umui ese dibura ruma lalonai idia koua taudia umui bogahisihisi henidia. Bona emui kohu be haida ese idia dadia neganai, edia kara umui haheaukalaia mai moale danu. Badina be umui diba, umui dekenai ia noho kohu, davana namona, be do ia noho hanaihanai gauna.

HEBERU 9:15

Unai dainai Keriso ese taravatu matamatana ia haginia, bona taunimanima durua totona ia be Dirava ena vairanai ia gini noho. Keriso ia mase, taunimanima do ia hamauria totona, bona edia kerere, taravatu gunana lalonai idia karaia gaudia do ia kokia totona. Unai dainai Dirava ena boiboi idia kamonai henia taudia ibounai ese, Dirava ia gwauhamatalaia mauri hanaihanai do idia abia. Inai gwauhamata ese Dirava ena natuna ibounai do ia hanamoa, ela bona hanaihanai.

IAMESI 1:11

Umui diba, dina ia daekau neganai, iena siahu ese ava ia hakaukaua, vadaeni iena huahua ia moru diho, iena hairai be ia ore. Inai bamona danu, kohu momo tauna ese iena gaukara ia karaia noho neganai, do ia mase.

1 PETERO 3:9

Tau ta bema umui dekenai ia kara dika neganai, davana do umui henia lasi. Bema umui dekenai idia hereva dika neganai, umui ese hereva dika do umui henia lou lasi. Lasi, to hanamoa hereva do umui henia lou, bona umui ese Dirava do umui noia, ia ese idia do ia hanamoa. Dirava ese umui ia boiria, inai bamona do umui karaia, iena hanamoa do umui abia totona.

1 PETERO 5:4

Vadaeni, Mamoe Naria Tauna Badana do ia hedinarai neganai, hairai ena kwara gauna, do ia dika diba lasi gauna, do umui abia.

APOKALUPO 21:27

To dika gauna ta be unai hanua dekenai do ia vareai diba lasi. Lebulebu idia karaia taudia, o koikoi taudia be do idia vareai lasi. Lasi momokani. Mamoe ena Natuna ena mauri bukana lalonai edia ladana idia torea taudia sibona be unai hanua dekenai do idia vareai.