U pas te koloto menai e Pol turu kristenira i Rom 16:25 - U Bulunagana U Niga

²⁵ Aragi solosei e Sunahan! Nonei te antunan hatagalena u nihamana i tamilimiou ba limiou te hamana mia i tanen, te hengo mena milimiou u Bulungana u Niga te rararie gulia, na turu raranga te hatei nena e Iesu Kristo. Nonei u raranga teka e solon mous i manasa.

U pas te koloto menai e Pol turu kristenira i Rom 16:25 Iomraidhean Croise

Matiu 13:17

Na lia e hatei hamana ragou limiou! U propet u para na u katuun u matsköra i manasa i ngilin tara korui a manka te tare milimiou, kaba nori ima antunan tareien. Na nori i ngilin hengo korui a manka te hengoe milimiou, kaba nori ima antunan hengoeien.”

Matiu 13:35

A ka teka e kato hantoeiena u raranga te rangein a propet, “Alia e ranga goua turu haharuei tego ranga uu lia i taren. Alia e ranga mera gouien a manka tima atei sileien i manasa koru batemi antunana i romana.”

Aposol 20:32

“Na lia e haka tala ragia limiou tara nipepeito tara Tsunono, na turu rangana tara nihitaguhu i tanen. Nonei e antunan hatagala nena a nihamana i tamilimiou bate hala ranei limiou a manka man niga hoboto, te roron hala ranei e Sunahan u katuun hoboto te hopö kap meraien i tanen.

Aposol 9:20

Ema lehana ii ba nonei e la uana turu luman lotu turu Jiu mena hatei raneien e Iesu me poeiena, “Nonei a Pien Tson tere Sunahan!”

U pas te koloto menai e Pol turu kristenira i Rom 11:25

A matsi hahatoulana, alimiou goma pei mi alimiou e atei korumiou. Alia e ngilegu alimiou go atei sileiam u raranga u mana teka te mous i manasa: e kato uana teka, a nihihipus tara tei Israel ema ka nitöa noi romana. E möa. E antuna noa romana tara pöata te onoto noua u hihase turu katuun tema Jiu ri te pala uaier tere Sunahan.

U pas te koloto menai e Pol turu kristenira i Rom 14:4

Alö a saha mar katuun koru balö te ranga silemou a katunun kui tara tana katuun? A katunun hakui peisa i tanen te tatei poeiena, e kui hanigana tsi e kui homina. Na nonei e kato haniga nou, taraha a Tsunono e antunan taguhe nen.

U pas te koloto menai e Pol turu kristenira i Rom 2:16

A mamanaka teka e butu nou tara pöata temi one noua e Sunahan a man hakats hoboto te mousuna i torir u katuun, temar ranga has uana u Bulungana u Niga te habulungana negulia na e poeiena e Sunahan emi ona sila ranouen tere Iesu Kristo.

1 Korin 1:23

Kaba lam e hihatuts nem te mate uu e Kristo tara kuruse. U Jiu ema hanigeri u hihatuts teka, na u katuun tema Jiu ri e poeier, e tutuna.

1 Korin 2:7

Kaba a niatei te ranga nemu lam nonei a niatei tere Sunahan te mous i manasa. Na a niniganiga tere Sunahan e haka beraien ra i mamuna te taniaia a pöata.

1 Korin 4:1

Alimiou go mar tara mera milam teka, alam u katunun kui tere Kristo, ti hapepeito kap rai a man raranga tere Sunahan ti mous i manasa.

2 Korin 4:3

Kaba tema alesala neia u Bulungana u Niga te hatei ne mulam tara palaiana u katuun, nori u katuun teka te karia tara maroro tena tia roua.

2 Korin 4:5

Alam ema habulungana nami a peisamulam. E möa. Alam e habulungana nem e Iesu Kristo nonei a Tsunono, na lam u katunun kui i tamilimiou e ka silem nonei e Iesu.

Galesia 2:2

E Sunahan noahas te hatarein tego la uu lia. Ba lia ena gum gono meraiegu a pal kapan turu Lotu me hatei ragien u Bulungana u Niga, ti roron ranga merai lia u katuun te halhal ria turu Jiu. Alia u mar hakats u teka: A toukui ti katoema lia i manasa te antunana i romana ena mots lalapukuna.

Epesis 1:9

E Sunahan e atei soköna, na nonei e haröto raira a ka te mous i manasa, a ka te ngilin kato meien e Kristo.

Epesis 3:11

Nonei a ka te ngileien i manasa na tara mamana pöata, na nonei a ka teka e butu hamana sila talana tere Iesu Kristo a Tsunono i tarara.

Epesis 6:19

Na limiou go singo be hase moulia, ba tara pöata te katsin ranga goua lia be Sunahan te hale noui lia u raranga, ba lia tema matout goui tego habulungana menai lia u Bulungana u Niga te mous i manasa.

Kolosi 2:2

Alia e kato silegu alimiou go sasaalaiam bate hiakaka haniga hoboto miou bate hatagala hase miou u hiangilngil i tamilimiou. Na limiou go atei sil haniga haseiam a manka te hamane milimiou na ka te hamousi e Sunahan i manasa, nonei e Kristo.

Kolosi 4:3

Na limiou go singo sil has ramoulam be Sunahan te kalatena a maroro tego habulungana menai lam u raranga i tanen bate hatei nem u bulungana tere Kristo, te mous i manasa. Taraha, nonei a ka te karabus sile gulia.

1 Tesalonaika 3:13

Taraha, a Tsunono e ngilena a torimilimiou ega gogoso nega matsköia i matana e Tamarara e Sunahan, tara pöata tena la pouts nama romana a Tsunono i tarara e Iesu na u katuun hoboto i tanen.

2 Tesalonaika 2:14

Tara pöata tu hatei raia lam alimiou u Bulungana u Niga, e Sunahan e ngö has raiou limiou, ba limiou te ka memiou a nikapan tere Iesu Kristo a Tsunono i tarara.

2 Tesalonaika 3:3

Kaba a Tsunono a katuun a hihipakoko. Nonei e kato hatagale nou a torimilimiou bate hatongo kap ranoua limiou tere Satan.

2 Timoti 1:9

Nonei te lu pouts raiou ra na te ngö has raioura tegi katuun uu ra i tanen. Nonei ema kato mei a ka teka ti kato haniga uu ra. Emoa, kaba turu ngilngil peisa i tanen ba nonei e taatagi koru ranoura me ngö ranoura i mamuna pöata.

2 Timoti 2:8

Hakats kapiin e Iesu Kristo te takei poutsia tara tou mate, a hatutubunei tere Devit a King. U Bulungana u Niga te habulungana naiegulia te hatei nanen.

Taitus 1:2

Ba nori te kameriou u hakhakatsina tegi hahaloso menaien a nitöatöa te ka nitöana. Na e Sunahan, tema tatei gamo nei e ranga hamana naia a nitöatöa teka i mamuna te butuia u puta.

Hibru 7:25

Na e Iesu e antunan lu pouts rena u katuun hoboto tara mamana pöata te la sila rima i tanen bate la uaier tere Sunahan, taraha nonei e ka nitöa silena tego singo sil meraien tere Sunahan.

1 Pita 1:20

E Sunahan e hopö kap naien i mam noa te habuteien a han i puta, kaba nonei e hagou haröto naien tara kapakapana pöata tega taguhu meraien limiou.

1 Pita 5:10

Alimiou e gamon sagoho lele mou a kamits, kaba i murinen e Sunahan e kato haniga pouts ranou u katuun u niga i tanen bate hatagala ranou limiou na u nihamana i tamilimiou tara mamana pöata. Nonei a Sunahan te roron taatagi ranou limiou bate ngö sil ranoui limiou tego na lu gono menami limiou e Kristo a nikapan i tanen te ka nitöana.

Revelesin 10:7

Kaba tara pöata te pihe noa a hatohitina a angelo a tuhil i tanen, be Sunahan te habutu hamane nou a ka te mous, a ka te hatei mam raien u katunun kui i tanen u propet tega katoeien.”