U pas te koloto menai e Pol turu kristenira i Rom 15:5 - U Bulunagana U Niga

⁵ E Sunahan te tuol hatagala nitöana na te hatagala nitöa ranoura ega hala rai limiou a masalohana bate kukutemiou a markato tere Iesu Kristo.

U pas te koloto menai e Pol turu kristenira i Rom 15:5 Iomraidhean Croise

Aposol 4:32

A pala ti hamana i ka mei u töa puku u tori na u töa puku u hakats. E möa ta töa i taren tega ranga bate poeiena, “A manka teka, a manka pepeisa i tar.” E möa. Kaba mamanaka hoboto i taren era manka hobotoien.

U pas te koloto menai e Pol turu kristenira i Rom 12:16

Kaka haniga gono meraiam u katuun, möa tu hapanpan iam. Kaka haniga gono meraiam u katuun papala, ba tema pei mi alimiou lahas te ka memiou a niatei.

U pas te koloto menai e Pol turu kristenira i Rom 15:13

E Sunahan e tatei hala ranei ra u raranga hamana tegi hamana sil menaien ra. Nonei e tatei kato hasasaala ranou limiou bate hala ranei limiou a masalohana te hamana uami limiou i tanen. Ba u Namnamei i tanen te hala ranoui limiou a nitagala tego hamana nitöa uamia limiou turu raranga hamana i tanen.

U pas te koloto menai e Pol turu kristenira i Rom 15:3

Taraha, e Kristo has ema kato sile ii tega hasasaala peisa menaien a peisanen. E möa. Ti mar koloto has menaien turu Buku u Göagono te poeiena, “U ranga u omi turu katuun ti ranga homi na ioulö e rus uanama i tar.” Na ka teka e butu hamanaia tere Kristo.

1 Korin 1:10

Alia e ranga hatagala koru meragou limiou tara solona a Tsunono i tarara e Iesu Kristo, alimiou go haniga hobotoiam batema kats kilkile mi a peisa milimiou. Alimiou go kagono hobotoiam, bate ka memiou u töa puku u hakats na u ngil.

2 Korin 13:11

Matsi hahatoulana, alia e hakapa talegu u raranga i tar. Alimiou go torohana hatagala koruiam tego matskö koru uaiam limiou. Hengo taleiam u raranga i tar. Na limiou go hia tangtanganaiam bate ka haniga hobotomiou. Alimiou go markato uaiam teka be Sunahan te ka gono mera nou limiou, taraha nonei a mouna a markato te hiangilngil uaier na te hiakaka haniga uaier.

2 Korin 7:6

Kaba e Sunahan e roron kato hasasaala rena u katuun te kamer a nitaatagi, na nonei e kato hasasaala has raiou lam tara pöata te tukuia e Taitus.

Epesis 5:2

E Iesu e taatagi koru raioura me mate sil ranoura. A tou mate i tanen e here nei u haats te soka hamasi hanigan töa uana tere Sunahan, be Sunahan te ngil korue nen. Te markato tala uanen teka ba limiou te ngil koru has ramiou a palaier u katuun.

Pilipai 1:27

A markato i tamilimiou ega matskö gono mei u Bulungana u Niga. Alia ena tara lel toum ragou limiou tsi e möa? Kaba alia e ngilin hengo noahas nagou tego tuol hatagala uaiam limiou bate ka memiou u töa puku u hakats, ba limiou te tagala hoboto silemiou u hihatutsina turu Bulungana u Niga.

Pilipai 2:2

Temar kato tala uanen teka, ba limiou te katoe miou a man markato a man niga. Ba lia te ka megou a nisasaala a kapan saluhe koru, na lia e ranga hatagala gia i tamilimiou, alimiou go ka meiam u töa puku u hakats bate hiangilngil hamana miou, na limiou go ka heremi a töa puku a katuun. Te markato uamou limiou teka, ba lia te sasaala nitöa gou.

Pilipai 3:16

Na ragi pile hakarapotein a markato a niga ti lu hakapa mamira.

Pilipai 4:2

Alimiou oro Yuodia mere Sintiki, alia e ranga hataatagi gia i tamilimiou, alimiou go torohanan hiakaka hanigaiam, taraha alimiou u mun toulana te hamana uami limiou tara Tsunono.

1 Pita 3:20

A man namnamei teka nori u katuun u hihipus ti kaia tara pöata tere Noa i manasa. Nonei tara pöata e Sunahan e solon hahaloso me tuatami koruna tara pöata te kuie ia e Noa a tolaala. Kaba a töal puku a katuun ti töatöa turu uolo pan, a palai i mate.

1 Pita 3:8

U raranga teka e la uana i tamilimiou hoboto. Alimiou go ka meiam u töa puku u hakats bate hiataatagi miou. Alimiou go hiangilngil iam te hamana hoboto uamilimiou tere Kristo bate heremi a man munmun toulana. Ba limiou te tami mia tara tabi bate haka putemiou a peisa milimiou.

2 Pita 3:15

Alimiou go atei sileiam a Tsunono e hahalosena tegi habirits uu katuun i tanen, ba nonei te lupouts ranen. Nonei e hale ii e toularara e Pol u hakhakats u niga ba nonei e mar koloto has ualala iesana i tamilimiou, te markato uanen tara man pas hoboto i tanen. Palaina a man raranga i tanen e ka mena a toukui pan tegi atei sil menaien, na u katuun u tutu na u katuun te hula hakatsir e hatuts hakölo ner a mouna a manka teka, te markato has mena rien a palaina u raranga turu Buku u Göagono. Ba nori te kato homi tsiponer a peisaren.

2 Pita 3:9

A Tsunono ema hamokomoko nei tega kato menaien a manka te ranga hamana naien tega katoeien, temar hakats uaier a palair u katuun. E möa. Nonei e hahaloso ranou limiou, taraha nonei ema ngile nei ta töa ta katuun ega taia, kaba e ngilena u katuun hoboto egi habirits ban a man hakats na man markato a man omi i taren.