Txesusu Nànyaketxho ro komo 21:40 - Hixkaryána Novo Testamento

⁴⁰ Hàà, kasko kahpa, kekon hatà, arymano ynye ro komo yohà. Kasko kahpa, àwyanye. Okayàmno ytxoho yawo rma nehxakon hatà, Pawru. Natahoyotkay hatà, tatàknye harha toto komo yehtxoho me. Dà, natàknatxehkatxownà hatà, nyamoro, omeroro. Àro ke nàrwonàmye hatà, Pawru, Xuknewyana komo rwon yaw hatà.

Txesusu Nànyaketxho ro komo 21:40 Iomraidhean Croise

Rukasà 23:38

Txesus yohoye nehxakon hatà, àmenhosaho. Xuknewyana komo kayaryet heno mosonà katxho rma àro hatà, àmenhosaho.

Xowawu 19:13

Àro wyaro tàwya enytxatxhe rma, bàn yaye Txesusu yokhoy hatà, Peratusu. Tahonà ymo hona neryewtay hatà, onytxano ytxoho ro hona, anhàtho komo yanàhnohtoho ro hona. Toh yonyhoryexaho onà, karyeno ymo, katxho rma àro hatà. Kakmata katxho me rma nehxakon hatà, Xuknewyana komo rwonà.

Xowawu 19:17

Àro ke Txesusu yatxownà hatà. Yahkotoheno yarhotxownà hatà, àwya. Àhona tamoyathotho rma yaryakon hatà. Owto ymo hoye toy hatà. Amoyathono ytxoho ro na toy hatà. Okno yhutho yotxhotho onà katxho na rma toy hatà. Korkota katxho rma àro hatà, Xuknewyana komo rwonà.

Xowawu 19:20

Xuknewyana komo rwon yaw hatà, Homayana komo rwon yaw xarha hatà, Kryekyana komo rwon yaw xarha hatà. Nenyatxkon hatà, toto komo, Xuknewyana komo rma, thenyenohnà komo rma, moxehra owto ymo yesnàr ke.

Xowawu 5:2

Xerusaryen watxan hotarà màhto nay hatà, tuna, ukuthonà txko. Àhotarà yosotà rma, kahneru katxho me nay hatà. Tuna yosot haxa, Betesata katxho me nay hatà. Xuknewyana komo rwonà àro hatà. Tuna yohoye nay hatà, toh yexaho, thatawo, 5 me hatà, bamtotàhkaxe ro hatà. Bànke xarha nay hatà.

Txesusu Nànyaketxho ro komo 1:19

Àro wyaro noro heno yonytxetxkon hatà, Xerusaryen hon komo, omeroro. Àro ke, noro heno yowtotho yosohtotxownà hatà. Akewdama me nesohtotxownà hatà. Xuknewyana komo rwonà àro ha, Akewdama katxho. Toto kamsukutho hutwatxho onà katxho me rma naha.

Txesusu Nànyaketxho ro komo 12:17

Tamor ke ryhe, ayatàknatxoko kekon hatà, Petru, àwyanye. Kohkomo wya tkurunhothàrà yokarymay hatà, àwyanye. Watxa ymo yaye, Kohkomo wya tonampatakatxhàrà rma yokarymay hatà. Àro wyaro ryexetxhàrà rma ekarymatxoko, Txaku wya, Txesusu mryenon komo wya xarha, kekon hatà, àwyanye. Àro wyaro tàwya katxhe rma, toy hatà, anaro yosaka.

Txesusu Nànyaketxho ro komo 13:16

Àro ke nasanàmye hatà, Pawru. Natahoyotkay hatà. Onà wyaro nkekon hatà. Ehsayewyana komo y, anar komo xarha, Khoryenkom hona xeny komo rma, uro enytxatxoko, kekon hatà.

Txesusu Nànyaketxho ro komo 19:33

Xuknewyana kom hoko xarha, ewakhàra nehxatxkon hatà. Àro ke, tkukuru komo wahanonkatxownà hatà, Xuknewyana komo. Ohxe tehtxoho komo yokarymany me wahanonkatxownà hatà, towahke harha toto komo yesnàr horà. Aryesantàrye rma noro hatà, ànwahanonkatxhàyamo. Moson tenytxatxe, ketxkon hatà, toto komo, ukukuru komo rma. Àro ke natahoyotkay hatà, Aryesantàrye, tatàknye harha toto komo yehtxoho me. Tàrwonàmrà xe rma nehxakon haryhe tà, akoronye, tkukuru komo kurunhonàr horà, Xuknewyana komo rma kurunhonàr horà.

Txesusu Nànyaketxho ro komo 21:35

Àwenarye tetxkon hatà, toto komo, thenyenohnà komo. Etahatxok ha, ketxkon hatà, Pawru hoko. Etahatxok ha. Etahanàr xe rma haxa nehxatxkon hatà. Àro ke Pawru yanàmtxownà hatà, arymano ynye ro komo, toto kom hona ukurunhonàr horà. Anàmsah me rma natxownà hatà, okayàmno ytxoho yarye.

Txesusu Nànyaketxho ro komo 22:2

Xuknewyana komo rwon yawo ryhe nàrwonakon hatà, Pawru, ànenytxanàr kom me. Àro ke, tatàknye rma haxa nehxatxkon hatà.

Txesusu Nànyaketxho ro komo 26:14

Fuhto, amna nehurkaye, omeroro, yukryeka hona. Àrwo wenytxaye. Rakoro nàrwonakonà, Xuknewyana komo rwon yawo, kekon hatà. Sawru y, Sawru y, àsok tawro uro meryewhamnohyano, kekonà, rowya. Tanye yamoyen yawo ro tehroknyetoko, thoko rma noseryewhamnohyan hamà, faka. Àro wyaro rma rha, owya ryeryewhamnohnàtoko, ohoko rma moseryewhamnohyaha, kekonà, rowya, kekon hatà, Pawru.

Txesusu Nànyaketxho ro komo 6:1

Nehamyatxkonà rma hatà, Txesusu mryenon komo. Xuknewyana komo rma mokyam nehxatxkon hakahpa tà. Ukukur komo, Kryekyana komo rwon yawo nehxatxkon hatà, Kryekyana komo yowto honotho me tesnàr komo ke. Ukukur komo xarha, Xuknewyana komo rwon yaw haxa nehxatxkon hatà. Omeroro rma nehamyatxkon hatà. Àtoko rma nàrwonatxkon hatà, Kryekyana rwon yawon komo. Anar kom hoko, Xuknewyana rwon yawon kom hoko rma, nàrwonatxkon hatà. Àsok tawro hana. Emahona ro tokamxem me nehxakon hatà, ànyahrà komo, woràskomo komo wya, enyonkaxemo komo wya, ànyahpànàtho komo wya. Onà wyaro nketxkon mak hatà, Kryekyana rwon yawon komo. Tàmpàn me nay hamà, amna wya, amna wosàn komo wya, ketxkon hatà. Xuknewyana rwon yawon komo wya marma tàmsom me nay hamà, ketxkon hatà. Tàmsom me rma naha haryhe, atxke txko, amna wosàn komo wya, ketxkon hatà, Kryekyana rwon yawon komo.

Xowawu Nenyetxho 16:16

Àro ke, ronenyàr me rma, toto komo yohamnohtxownà, worokyamo komo, 3 komo rma. Ahmakeknon hona ryhe nehamnohtxownà. Ekmàryewyana komo rwonà rma àro ha, Ahmakeknon katxho.

Xowawu Nenyetxho 9:11

Nyamoro kayaryetà ymo, yuhnayen yoh me nehxakonà. Noro ymo yosotà ryhe, Akmaknon katxho me naha. Ekmàryewyana komo rwonà rma àro ha, Akmaknon katxho. Aporyon katxho me rma naha, Kryekyana komo wya. Anàhnohno ynye katxho me rma naha.