Filipi 4:9 - Buk Niu In Hida Balu nol Dehet deng Apan-kloma ki in Dadi ka

⁹ Auk tui mi son muid Ama Lamtua lalan in nuli ka. Mi kon musti not auk in nuli kia, nol daek muid totoang asa man auk in aa nol tao net son nas. Eta mi tao muid ela lam, Ama Lamtua Allah tao kuat-tes mi dalen nas, le halin mi dalen nas tetesa, nol haup in nuil dame.

Filipi 4:9 Iomraidhean Croise

Matius 1:23

“Mi hii ke! Mam muik tana-bihatang mesa, haat-ana nabale, taan lo molota, un behe son. Kon un hua Tana-ana biklobeng mesa. Oen ngali Un ngala ka, Imanuel.” (Se dais Ibranin nam, ‘Imanuel’ nahin na noan: Ama Lamtua Allah leo-leo nol kita.)

Matius 28:20

Hidim tui one, le daek muid totoang prenta man Auk in tek mi son nas. Nangan ne! Auk leo-leo nol mi napiut, didiin apan-kloma ki kiamat.”

Matius 7:21

“Mam muik atuli in haman Auk noan, ‘Tuang!’ Mo oen suma aa deng sulan likun nas tuun. Mam Ama Lamtua Allah in ne sorga ku, hutun soleng one. Ta suma atuil man muid baktetebes Un in koma ngas siis, man Un simus le daid Un atulin.

Lukas 6:46

Hidim Yesus tupang napiut noan, “Mi taan in haman Auk tutungus noan, ‘Tuang’. Mo tasao le mi dai muid Auk in aa ka lo kia?

Lukas 8:21

Kon Un siut noan, “Hao! Mo elia: Auk inang nol pail-kakang baktetebes sas, mo atuil man in hii-ming Ama Lamtua Allah in Teka-teka ngas, hidim daek mudis sa.”

Yuhanis 13:17

Mi taan dais nias son, tiata mi ulat, eta mi lako-daek muid ela.

Yuhanis 15:14

Eta mi lako-daek muid Auk in prenta ngas sam, na mi daid Auk tapang.

Yuhanis 2:5

Mo Un mama tek atuil in daek se la ngas noan, “Hii ke! Un lok mi le tao saa lam, daek mudin tuun.”

Dehet deng Aan in Nutus sas 9:6

Nol ni kon, haung tama lako kota lu tia. Lius se ua le, halas-sam Auk tek ku noan, ku musti daek elola.”

Roma 15:33

Auk kohe-kanas le nodan Ama Lamtua leo-leo nol mia. Ta Un man tao atuli li le nuil babanan nol dame. Baktebes ela!

Roma 16:20

Ama Lamtua Allah sii man bel nal kit le nuil babanan, dame nol tetesa. Mam Un tao dudus uikjale kas laih tuan na in kuasa ka, nol tulu bel noan, mi man nala. Na nesang lo ka. Auk kohe-kanas le nodan kit Lamtuan Yesus Kristus tulu Un dalen banan na bel mia.

Korintus mesa la 10:31

Tiata mi kom le kaa tam, ninu tam, tao saa tuun kon no, daek nas totoang le tulu-balang Ama Lamtua Allah ngaal banan na.

Korintus mesa la 14:33

Ta se Ama Lamtua Allah lua lam, muik in nuu apa lo, nol muik in lobo-lau lo. Totoang nas ator babanan nol muik in sudung apa lo. Se ola-ol tuun, eta atuil in parsai ngas nakbua lam, oen tao elia:

Korintus mesa la 4:16

Tiata auk nodan le mi not muid auk in dake ka babanan.

Korintus dua la 13:11

Kaka-pail in namnau me! Auk dais in aa puis si elia, boa-blingin nol dael banan. Daek titu totoang dasi las. Hii-ming babanan auk in tui-teka nia. Nuil dalen mesa. Mi musti babanan apa mes nol mesa. Ta Ama Lamtua Allah namnau mia. Auk nodan le Un leo-leo nol mi tutungus, nol Un tulung mi le halin mi nuil daem apa, mes nol mesa.

Filipi 3:17

Kaka-pali me! Mi musti not auk in nuli kia. Mi in ne na ngas tenga ka lalan in nuli ka kon muid auk son. Mo in muid lo bii ngas, tui babanan deng one, le halin tao muid ela kon.

Filipi 4:7

Eta mi tao ela lam, mam Ama Lamtua tao mi dalen nas tetesa. Meman atuli li nangan taan dael tetesa, man kit hapun deng Ama Lamtua ka nol baktetebes lo. Mo undeng mi parsai se Yesus Kristus, tiata Ama Lamtua Allah tao mi dalen nas le tetesa, nol doha-tinang mia, le halin mi dalen nas nol mi nangan na bana-banan tukun.

Tesalonika mesa la 1:6

Undeng mi huil le muid Ama Lamtua in koma ka, tiata mi not muid kami, nol not muid Lamtua Yesus kon. Mo dedeng mi in sium Dehet Dais Banan na ka, muik atuli in tao sus mia. Ela kon no, mi nangan nam hutluul lo, undeng Ama Lamtua Koo Niu ka tao mi dalen kolo tutungus.

Tesalonika mesa la 2:14

Kaka-pali me! Mi halas-sam nuil muid Ama Lamtua lalan na babalu, mo mi atulin in bangsa mes nol mia ngas tao sus mia. Nini ela lam, mi kon haup susa banansila el atuil in parsai ne propinsi Yudea ngas, man haup susa deng oen atulin Yahudi las esan, undeng in parsai se Yesus Kristus sa.

Tesalonika mesa la 5:23

Auk kohe-kanas le nodan Ama Lamtua Allah halin tao niu mi dalen nas, nol mi in nuli ka totoang. Undeng Un in tao ka, tiata kit nuil daem nol apa. Nini ela lam, eta kit Lamtuan Yesus Kristus pait maa son nam, mi dil nal se Un sila-mata ka nol aap-inan, dalen, nol aap-hmangin man muik in kula-salan lo. Baktebes! Ta Lamtua Yesus man in haman mia, le daid Un atulin na nam, kil didi nol Un in aa ngas. Asa man Un aa son nam, Un taon le dadi. Hidim mam Un nol mi niu-hilin lakom se Ama Lamtua Allah sila-mata.

Tesalonika dua la 3:4

Nol kaim kon parsai baktetebes noan, Lamtua Yesus in tao bel mia ka, muid asa man kaim in tek mi son na. Nol taon elola ko mi daek napiut ela.

Timutius dua la 4:22

Auk nodan le Ama Lamtua Allah leo-leo nol ku tutungus. Nang le halin nam Ama Lamtua tulu Un dalen banan na bel mi totoang. Ela tuun tia, Paulus

Yakobus 1:22

Nol eta mi taan Ama Lamtua Dehet-dasin na son nam, mi musti daek mudin. Suma ming tuun deken! Ta eta mi suma ming tuun, mo daek mudin lo kam, na mi nole bali mi apan nas esan.

Petrus dua la 1:10

Kaak-pail in namnau me! Mi musti dil didi tapnaeng pait. Ama Lamtua huil nal mi son, le halin mi daid Un atulin. Tiata mi musti tulu bel noan, mi tamam daid Un nenan son. Eta dais man auk in teka apin nas tapnaeng tutungus se mi in nuli ka lam, mam mi nahim lo.

Yuhanis mesa la 3:22

Undeng kit daek muid Un in prenta ngas, nol tao Un dalen kolo, tiata kit sium nal totoang asa man kit in nodan deng Una ngas.