Apocalipsis 20:10 - Tũpa Ñehengagüer

¹⁰ Caruguar evocoiyase, ava mbopa-mbopa tẽisar, ahe opa imombosa ɨpa azufre ocai vahe pɨpe. Aheve acoi opa imombosa mbahe ɨpɨ vai iyavei Tũpa ñehe mombehusar angahu tẽi vahe avei no. Aheve iparaɨsura pɨ̃tu, arɨ yuvɨreco apɨrẽhɨ vaherã.

Tüpä Ñe'ëngagwer

¹⁰ Karugwar evokoiyase, ava mbopa-mbopa tëisar, a'e opa imombosa ɨpa azufre okai va'e pɨpe, a'eve akoi opa imombosa mba'e ɨpɨ vai Tüpä ñe'ë mombe'usar anga'u tëi va'e aveino. A'eve iparaɨsura pɨ̇tü, arɨ yuvɨreko apɨre'ɨ̇ va'erä.

Apocalipsis 20:10 Iomraidhean Croise

San Mateo 25:41

“Ahese aipo ahera cute che mbahe rese pocoẽhɨsa cotɨndar upe: ‘Pesɨrɨ che sui. Esepia, pe peico Tũpa ñemoɨrosavrɨ pendar. Pesopa tata guasu apɨrẽhɨsave, evocoi imoingatuprɨ opacatu caruguar upe nara serecuar reseve.

San Mateo 25:46

Ahe ava yuvɨrasora Tũpa ñemoɨrosa apɨrẽhɨ vahesave. Seco ɨ̃vi vahe rumo teco orɨ opaẽhɨsave yuvɨrasora” ehi Jesús oreu.

San Mateo 7:15

“Coiye yugüerura ava Tũpa Ñehengagüer mombehusar angahu tẽi pe pãhuve. Ahe ndoyavɨi chira ovesa ndaseco marai vahe yuvɨreco. Ipɨha pɨpe rumo secocuer avɨye mahembiar oñaro ai vahe. Sese peicua catu evocoi nungar sui.

San Marcos 9:44

Aheve acoi uru nomanoi vahe, tata ndogüei vahe avei.

Apocalipsis 16:13

Ipare asepia mbahe ɨpɨ oporomocañɨ vahe, mbahe ɨpɨ vai, ndahei vahe Tũpa ñehe mombehusar supi vahe avei, ahe yuvɨrecoi vahe yuru rupi yuvɨnose mbosapɨ caruguar vɨreque nungar.

Apocalipsis 19:20

Co mbahe ɨpɨ vai yɨpɨndar vahe soquendasa, oyoya evocoi Tũpa ñehe mombehusar angahu tẽi rese. Ahe acoi oyapo vahe mbahe yavai rai vahe yɨpɨndar mbahe ɨpɨ vai rovaque, evocoi mbahe yavai rai vahe apo pɨpe ombopa-mbopa tẽi ava, acoi seroyasar vɨreco vahe mbahe ɨpɨ vai rer oyese iyavei omboetei vahe sahanga yuvɨreco. Evocoiyase co mbahe ɨpɨ vai iyavei Tũpa ñehe mombehusar angahu tẽi, ahe opa imombosa secove reseve ɨpa azufre ocai vahe pɨpe yuvɨreco.

Apocalipsis 20:8

Ichui osẽra opacatú ava ɨvɨ pɨpendar mbopa-mbopa tẽi oico; osẽra ɨvɨ Gog mbopa tẽi ãgua, ɨvɨ Magog mbopa tẽi ãgua avei. Ipare omonuhara vavasave nara isundao eta. Esepia niha, ahe sehɨi eteprɨ yuvɨreco inungar ɨvɨ cuhi para guasu popɨ rupindar.

Apocalipsis 9:17

Ẽgüe ehi asepia cavayu rehɨi che quer nungar pɨpe, iharɨ pendar evocoiyase vɨreco opochiha rupi tuprɨ oyoepɨsa guarepochi apoprɨ yuvɨreco, ahe iparagüer pĩra vahe tata nungar, sovɨ vahe, iyu vahe avei no. Cavayu rehɨi ãca evocoiyase avɨye tuprɨ yagua pɨ̃ta ãca, iyuru sui evocoiyase yuvɨnose-nose tata, tãtachi iyavei azufre. Ipɨpe sui ava mombosapɨsa yahocuer opa tuprɨ omano yuvɨreco.