San Mateo 22:40 - Tüpä Ñe'ëngagwer

⁴⁰ Ko ñuvɨrïo porokwaita rupi ogwata opakatu Moisés porokwaita ikwachiaprɨ opakatu Tüpä ñe'ë mombe'usar rembikwachia avei.

Tũpa Ñehengagüer

⁴⁰ Co ñuvɨrío porocuaita rupi oguata opacatu Moisés porocuaita icuachiaprɨ, opacatu Tũpa ñehe mombehusar rembicuachía avei —ehi.

San Mateo 22:40 Iomraidhean Croise

San Mateo 7:12

Egwë e'i ete, peyapo pe ambuae ava eta rese mba'e peremimbotar ambuae oyapo va'erä avei ambuae yuvɨreko perese; esepia evokoi imboyoyasa mborokwaita rese Moisés porombo'esa rese aveino.”

San Juan 1:17

esepia mborokwaita yaipɨsɨ ou va'e Moisés sui yepi; poroaɨsusa rumo iyavei mba'e supiete va'e, a'e yavɨye ite Jesucristo rupi.

Romanos 13:9

Tüpä porokwaita aipo e'i: “Ndapeyemboagwasai chira, ndapeporoyukai chira, ndapemondai chira, ndaperemiräi chira, ndapeipotarai chiaveira ambuae ava mba'e”; ko iyavei opakatu ambuae Tüpä porokwaita sendusa tuprɨ ite ko ambuae ñe'ësa rese: “Pesaɨsu ava pe yeaɨsu nungar.”

Gálatas 5:14

Esepia ko opakatu porokwaita imboavɨyesa itera ñe'ësa aipo e'i va'e: “Esaɨsu ambuae ava nde yeaɨsu nungar.”

1 Timoteo 1:5

Sese ko amondo porokwaita ndeu yande yeaɨsu agwä yande pɨ'añemoñeta katuprɨsa pɨpe, yande reko yapɨsaka tuprɨsave, iyavei yande yeroyasa supiete va'e pɨpe.

Santiago 2:8

Supiete pemboavɨyese mborokwaita ɨvate katu va'e, inungar Ikwachiaprɨ pɨpe aipo e'i: “Esaɨsu ava ndeyeaɨsu nungar.”