Hebreos 3:1 - Tüpä Ñe'ëngagwer

¹ Evokoiyase, che rɨvrɨ eta iporavoprɨ, pe Tüpä remienoi peiko va'e chupe narä, peyapɨsaka tuprɨ Cristo Jesús rekokwer rese, a'e sekoi yandeu Jesús ñe'ë mombe'usar iyavei pa'i ɨvate katu va'e yande yeroya agwä.

Tũpa Ñehengagüer

¹ Evocoiyase, che rɨvɨreta, iporavoprɨ, pe Tũpa remienoi peico vahe chupe nara. Peyapɨsaca tuprɨ Jesucristo recocuer rese. Ahe secoi yandeu apóstol iyavei pahi ɨvate catu vahe yande yeroyasa.

Hebreos 3:1 Iomraidhean Croise

San Juan 17:3

Iyavei ko tekovesa apɨre'ɨ̇ pɨpe yɨpɨndar nde kwa rane itera yuvɨreko, ñepëi Tüpä supiete va'e nderekosa pɨpe, iyavei akoi erembou va'e Jesucristo ko ɨvɨ pɨpe.”

San Juan 20:21

Ipare Jesús aipo e'i iri gwemimbo'e eta upe: –¡Teko tuprɨsa tasekoi perese! Inungar che Ru che mbou, egwë a'e aveira che pe rereko kuri.

San Juan 20:27

Ipare aipo e'i Tomás upe: –Emoinge nekwä ko'ave, iyavei ema'e ko che po rese; iyavei embou ndepo emoinge che ɨke rese. Ani ereikora poreroya'ɨ̇sa pɨpe; ¡che reroya katu eve!

Los Hechos 1:15

Evokoiyase ñepëi arɨ pɨpe oñemonu'ä gwasu ciento veinte ava yuvɨreko, ipa'üve Pedro opü'a aipo e'i ava upe:

Romanos 11:17

Judío eta inungar olivo räkä yasɨaprɨ tëi, pe evokoiyase nda'ei va'e judío ɨvɨra ka'a pɨpendar räkä nungar peiko va'e, peso yasɨaprɨ rendagwerve. Ipɨpe sui peipɨsɨ vɨrawäsa pe rekove agwä.

Romanos 15:27

A'e egwë e'i gwemimbotar rupi yuvɨreko iyavei iya ite imboyevɨ agwä yuvɨreko chupe a'e mba'e tuprɨ oyeupe apo agwer rese, esepia yɨpɨndar Jesús reroyasar judío yuvɨrekoi va'e oikwa uka ko tekokwer Tüpä suindar a'e ava nda'ei va'e judío yuvɨrekoi va'e upe, sese iya ite imboyevɨ agwä ko ɨvɨ pɨpendar porerekosa chupe.

Romanos 15:8

Che rumo aipo a'e peü Cristo ou judío pɨtɨ̇vɨï Tüpä remimombe'ugwer mboavɨye agwä judío ramoi araka'endar upe, egwë e'i Tüpä oñe'ë mboavɨyesa mboyekwa.

Romanos 9:24

Yande avei yande renoi oyeupe, judío anise nda'ei va'e judío yande rekose.”

1 Corintios 10:17

Yepe yandereta iteanga yaiko viña, opakatu ite ni'ä ya'u mboyape ñepëi ava sui, ipɨpe sui avei yaiko ñepëi ava nungar yepi.

1 Corintios 9:23

Che ayapo ko opakatu mba'e ñe'ësa avɨye va'e pɨsɨrösa resendar, aipɨsɨ va'erä avei mba'e avɨye va'e ichui.

2 Corintios 1:7

Ore oroyeroya ite pereko va'e poreroyasa rese, esepia oroikwa ore paraɨsu agwer nungar tuprɨ peiko, egwë peye avei peipɨsɨ ore vɨ'asa Tüpä suindar.

2 Corintios 9:13

A'e evokoiyase omboeteira Tüpä yuvɨreko, esepia ko pe poropɨtɨ̇vɨïsa pɨpe pemboyekwa itera pe Cristo ñe'ë reroyasa peiko, a'e avei omboeteira Tüpä yuvɨreko. Esepia pemondoño itera mba'e pe porerekosa chupe, iyavei opakatu ambuae ava upe.

Efesios 3:6

Ko ñe'ësa ndikwasai va'e pɨpe: Tüpä oñe'ë opakatu ava ɨvɨ pɨpendar upe yaiko va'erä Cristo Jesús rese, yaipɨsɨ va'erä avei iporovasasa oyoya tuprɨra tekwa Israel pendar rese kuri.

Efesios 4:1

Sese Cristo rekokwer mombe'usa sui che rokendasa pɨpe, peiko tuprɨra pe kwaita rupi Tüpä pe renoisa pɨpe a'e peü.

Efesios 4:4

Yaiko ñepëi nungar Cristo rese iyavei yareko ñepëi Espíritu, egwë e'i avei Tüpä yande poravo ñepëi gwarösa rereko agwä.

Filipenses 3:14

esepia Tüpä che renoi ɨvave che so agwä aipɨsɨ va'erä iporerekosa ɨva pendar Cristo Jesús rese che rekose.

Colosenses 1:12

avɨye ndeu peyera pe vɨ'aretesa pɨpe yande Ru Tüpä upe, esepia a'e omoigätu pe rekokwer peipɨsɨ agwä iporerekosa oime va'erä opakatu sembiporavo upe akoi yuvɨrekoi va'e Tüpä poroesapesa pɨpe.

Colosenses 1:22

kurïtëi rumo Tüpä iñeröi peü pe reroyevɨ oyeupe Cristo mano pɨpe. A'e ni'ä egwë e'i Vu rovai ipe'aprɨ pe rereko oyeupe narä, pe reko maräne'ɨ̇ agwä mba'e avɨe'ɨ̇sa pɨpe ava rovake.

Colosenses 3:12

Esepia Tüpä pe raɨsu eteprɨ iyavei pe poravo toyuvɨrekoi cheu narä oyapave. Evokoiyase peyapora ko nungar mba'e, peporoaɨsura, peavara peyeupe, peñemominira, pe reko mbegwera iyavei peñemosañora.

1 Tesalonicenses 2:12

iyavei oromondo pe kwaitarä pe reko tuprɨ agwä Tüpä remimbotar rupi. A'e ni'ä oñe'ë peü peiko va'erä sese imborerekwasa porañetesave.

1 Tesalonicenses 5:27

Che opokwai yande Yar rer pɨpe, peyerokɨ ko kwachiar opakatu yande rɨvrɨ eta upe.

2 Tesalonicenses 1:11

Ko rese oroyerure pe rese yepi, oroporandu yande Ru Tüpä upe tape rereko tuprɨ gwemienoi pe rekosa pɨpe, iyavei tomboavɨye gweko pirätäsa pɨpe opakatu ñepëi-pëi mba'e peyapo pota va'e, iyavei opakatu mba'e pe rembiapo avɨye va'e, sese pe yeroyasa pɨpe.

2 Tesalonicenses 2:14

Ko rese ni'ä Tüpä oñe'ë peü, ko ñe'ësa pɨsɨrösa resendar ore oromombe'u va'e rupi: tovɨreko che Ra'ɨrɨ Jesucristo reko porañetesa yuvɨreko oyapave.

1 Timoteo 6:12

Eyemovɨräkwä mba'e tëi upe Tüpä reroyasave; erepoi rene tekovesa apɨre'ɨ̇ va'e sui, sese ni'ä Tüpä oñe'ë ndeu, iyavei eremombe'u ite ni'ä Tüpä reroyasa nde reko agwä ava eta rovai.

1 Timoteo 6:2

Iyavei mbigwai vɨrekose gwerekwar Jesús reroyasar, sese ndiyai nomboyeroyai chira Jesús reroyasar rekosa rese yuvɨreko, iyakatu rumo omboyeroya tuprɨ katura gwerekwar yuvɨreko, esepia serekwar oipɨsɨ va'e iporavɨkɨsa, a'e Jesús reroyasar saɨsuprɨ yuvɨrekoi yepi. Eporombo'e iyavei emombe'u ko ñe'ësa eiko:

2 Timoteo 1:9

Tüpä ni'ä yande pɨsɨrö iyavei yande renoi yande reko tuprɨ agwä sese, nda'ei yande rembiapo pɨpe. A'e rumo gwemimbotar rupi yande raɨsu Cristo Jesús rese yande rekose, a'e Tüpä ite yande raɨsu yɨpɨsuive ɨvɨ apo vɨte e'ɨ̇seve.

2 Timoteo 2:7

Eyapɨsaka tuprɨ ko che ñe'ë rese, yande Yar ni'ä osendukwa uka tuprɨra opakatu ko mba'e ndeu.

Hebreos 10:19

Sese che rɨvrɨ eta, iya ite kurïtëi yande reike agwä Tüpä rovai yande sɨkɨye e'ɨ̇sa pɨpe Jesús ruvɨ pɨpe sui,

Hebreos 10:21

Iyavei a'e yande pa'i ɨvate katu va'e ite sekoi Tüpä rëtä rärösar.

Hebreos 10:23

Yayemovɨräkwä katura mba'e avɨye va'e yande remiarö pɨpe yamombe'u va'e ava upe yande pɨ'añemoñeta rerova e'ɨ̇sa pɨpe. Esepia Tüpä omboavɨye itera mba'e gwemimombe'ugwer yandeu.

Hebreos 13:22

Che rɨvrɨ eta, peñemosaño che opomboarakwa va'e rese, movɨrö tëi ni'ä ko ñe'ësa aikwachia peü.

Hebreos 2:11

Esepia opakatu vɨreko ñepëi Vu yuvɨreko ko seko katuprɨ va'e, seko mbokatuprɨsar avei. Sese Tüpä Ra'ɨrɨ nochi ete, che rɨvrɨ eta peiko o'e agwä vɨroyasar upe.

Hebreos 2:17

Sese ni'ä sekoi vɨvɨreta nungar tuprɨ ite, sekoi va'erä pa'i eta rerekwar ɨvate katu va'e Tüpä upe oporavɨkɨ agwä, tomondo gwetekwer ava angaipa repɨrä ñeröisa reime agwä oyapave.

Hebreos 3:12

Che rɨvrɨ eta, peñearö katu tipo eme ñepëi ipɨ'añemoñeta naporäi va'e Tüpä reroya e'ɨ̇sa pɨpe oyepepɨ va'erä ichui.

Hebreos 3:14

Esepia yayemovɨräkwä tuprɨse Cristo rese, yande yeroyasa yɨpɨsuive yareko va'e pɨpe yande mano agwä rupi ete, a'ese yaiko itera sese.

Hebreos 6:20

a'eve Jesús oike yande raperä mboi agwä, egwë e'i a'e apɨre'ɨ̇ va'e ite pa'i ɨvate katu va'e gweko agwä, inungar tuprɨ Melquisedec araka'e.

Hebreos 7:26

Supiete Jesús pa'i ɨvate katu va'e sekoi, evokoi nungar ipane ite yandeu yɨpɨndar. A'e ndaseko maräi va'e, ndoyapoi va'e mba'e tëi gweko maräne'ɨ̇sa pɨpe, nda'oyoyai avei ava angaipa viyar rese, iyavei a'e ɨvate katu va'e ɨva pendar sui.

Hebreos 7:28

Moisés porokwaita rupi iporavoprɨ pa'i ɨvate katu va'erä ava nda'ei seko tuprɨ va'e; Tüpä rumo Moisés porokwaita pare osenoi ñepëi reseve Gwa'ɨrɨ seko katuprɨ va'e tasekoi pa'i ɨvate katu va'e apɨre'ɨ̇ va'erä ite oya.

Hebreos 9:11

Cristo rumo ou, iyavei a'e ite kurïtëi yande Pa'i Ɨvate katu va'e sekoi mba'e avɨye va'e gweru yandeu. A'e pa'i reikesa rumo nda'ei ava rembiapo nungar tëi, a'e rumo avɨye katu iyavei nda'ei ete ko ɨvɨ pɨpe yapoprɨ.

Hebreos 9:15

Sese, Jesucristo sekoi mba'e ipɨasu va'e moigätusar, esepia omanosa pɨpe oipɨsɨrö ava angaipa sui ipɨpe avei oime ñeröisa yɨpɨndar mborokwaita vrɨve yuvɨrekoi va'e upe, iyavei toipɨsɨ che rembiporavo yuvɨreko oyeupendar mba'e apɨre'ɨ̇ va'e che remimombe'ugwer rupi oyapave Tüpä egwë e'i.

1 San Pedro 2:9

Pe rumo iporavoprɨ peiko Tüpä upe narä, inungar pa'i mborerekwar ɨvate katu va'e pɨtɨ̇vɨïsar, iyavei iporavoprɨ peiko Tüpä remimbotar rupi pereko maräne'ɨ̇sa pɨpe. Egwë peye Tüpä reko pirätäsa mombe'u agwä peiko, esepia a'e pe renose pɨ̇tümimbisa nungar pe rekokwerai sui, tesapesa porañete va'e pɨpe pe reike agwä.

1 San Pedro 3:5

Egwë e'i avei kuña seko katuprɨ va'e gweko porañetesa imboyekwa araka'e; a'e oyeroya Tüpä rese, omer avei omboyeroya yuvɨreko.

1 San Pedro 5:1

Che amboarakwa pota pe pa'ü pendar Jesús ñe'ë rärösar yuvɨrekoi va'e, inungar avei ni'ä che aiko asepia va'e ite yande Yar mombaraɨsu agwer, inungar a'e vɨreko teko orɨsa, egwë a'e aveira akoi yande Yar oyevɨse kuri.

1 San Pedro 5:10

Koiye peparaɨsu pare rumo, Tüpä teiete pe reko mo'ɨ̇vi tuprɨra, iyavei pe reko movɨräkwära, pe momirätä aveira pe yepepɨ irie'ɨ̇ agwä ichui. Tüpä ni'ä oporoaɨsusa pɨpe yande poravo oyeupe narä, yande yaso va'erä supi teko orɨ ndopai va'esave yaiko va'erä Jesucristo rese yande rekosa pɨpe.

1 San Juan 1:3

Oromombe'u ñe'ësa orosepia va'e orosendu va'e avei peü, ipɨpe sui peiko va'erä orerese, inungar ore oroiko yande Ru Tüpä rese, Ta'ɨrɨ Jesucristo rese avei.

San Judas 1:1

Che Judas, aiko Jesucristo rembigwai, Santiago rɨvrɨ. Che aikwachia ko che ñe'ë peü. Pe ni'ä yande Ru Tüpä rembiaɨsu semienoi peiko. Jesucristo ni'ä perärö opakatu mba'e-mba'e tëi sui.

Apocalipsis 17:14

Ipare ovavara Ovesami a'e Cristo sekoi va'e rese yuvɨreko; Ovesami a'e Cristo sekoi va'e osekopɨra, esepia ni'ä Ovesami a'e yande Yar Cristo sekoi va'e opakatu ava Yar iyavei mborerekwar ɨvate katu va'e sekoi opakatu mborerekwareta Rerekwar, akoi ava yuvɨrekoi va'e sese, a'e senoiprɨ iyavei iporavoprɨ oyemovɨräkwäño va'e ite supi ogwata agwä yuvɨreko.”

Apocalipsis 18:20

Peyembovɨ'año, pe ɨva pendar evokoi tekwa gwasu rese; iyavei peyembovɨ'año katu, peiko va'e tekwa maräne'ɨ̇ pendar, iyavei Jesús ñe'ë mombe'usa reta Tüpä ñe'ë mombe'usa reta aveino, esepia ni'ä Tüpä opa omokañɨ, peü narä mba'e avɨye va'e aposa pɨpe.