Colosenses 2:23 - Tüpä Ñe'ëngagwer

²³ Ko mba'e avɨye anga'u arakwasa supiete va'e, esepia seroyasar a'e e'iño oyeruresa upe, oyeekomomini tëi iyavei omombaraɨsu gwetekwer yuvɨreko viña, a'e arakwasa rumo egwë e'i tëi va'e, esepia ndayande pɨtɨ̇vɨï ete yande yepepɨ agwä yande remimbotarai sui.

Tũpa Ñehengagüer

²³ Co mbahe avɨye angahu aracuasa supi eté vahe. Esepia, seroyasar ahe ehiño oyeruresa uve, oyeecomomini tẽi iyavei omombaraɨsu güetecuer yuvɨreco viña. Ahe aracuasa rumo ẽgüe ehi tẽi vahe. Esepia, ndayande pɨ̃tɨvɨi eté yande yepepɨ ãgua yande remimbotarai sui.

Colosenses 2:23 Iomraidhean Croise

Romanos 13:14

Iya rumo, perekora yande Yar Jesucristo rekokwer peyese, anichira pe pɨ'añemoñeta mba'e-mba'e tëi apo agwä pe remimbotarai pɨpe tëi.

Efesios 5:29

Supiete ndipoi ete ava ndosaɨsui va'e gwetekwer, a'e rumo okaruño ite oyemovɨräkwä agwä, oñearö tuprɨ avei egwë e'i avei Cristo opakatu vɨroyasar upe,

Colosenses 2:18

Peyapɨsakai rene ava ñe'ë katuprɨai porombopasa rese iyeruresa mbigwai ɨva pendar rese, iyavei osepia pota va'e mba'e ndayasepia va'e oyese yuvɨreko oyeeko mboɨvateai tëi va'e opɨ'a ñemoñetasa pɨpe yuvɨreko.

Colosenses 2:22

Opakatu ko nungar porokwaita okañɨ tëi va'erä, esepia a'e ava remimbotar tëi yembo'esa iporokwaita tëi avei.

Colosenses 2:8

Peikwa katu: peyembopa ukai rene araka'endar tëi ava arakwasa pɨpe, esepia a'e egwë e'i tëi va'e, ava suindar tëi yembo'esa, ɨvɨ pɨpendar ava seko ɨvate katu va'e pɨ'a ñemoñetasa tëi, nda'ei Cristo suindar porombo'esa.

1 Timoteo 4:3

Ko ava ni'ä, anichira yamenda, e'i tëi ava upe yuvɨreko; anichira ya'u opakatu mba'e, e'i avei chupe, Tüpä rembiapo rumo ko tembi'u poromovɨräkwäsa, sese Jesús reroyasar iyavei oikwa tuprɨ va'e mba'e supiete va'e yuvɨro'ura avɨye ndeu o'esa pɨpe Tüpä upe yuvɨreko.

1 Timoteo 4:8

esepia yepe avɨyeño chi'ï yande retekwer yamovɨräkwä viña, yande Yar upe yande reko agwä avɨye katu opakatu yande reko upe narä. Esepia a'e yande pɨtɨ̇vɨïra yande rekove agwä kurïtëi iyavei kuri yande rekove agwä.