Colosenses 1:9 - Tüpä Ñe'ëngagwer

⁹ Sese avei ore aipo nungar rendu ramoseve ndoroyerurepai ete pe rese, oroporandu pe rese toikwa tuprɨ opakatu Tüpä remimbotar omba'ekwasa Espíritu suindar pɨpe, sendukwa tuprɨsa pɨpe avei yuvɨreko ore yapave peü.

Tũpa Ñehengagüer

⁹ Sese avei ore aipo nungar rendu ramoseve ndoroyeroquɨpai pe rese. Oroyeroquɨ, oroporandu pe rese ‘toicua tuprɨ opacatu Tũpa remimbotar ombahecuasa Espíritu suindar pɨpe, senducua tuprɨsa pɨpe avei yuvɨreco’ ore yapave pẽu.

Colosenses 1:9 Iomraidhean Croise

San Juan 7:17

Akoi ñepëi ikere'ɨ̇ va'e oyapo va'erä Tüpä remimbotar, oikwara che porombo'esa nda'ei va'e che suindar a'e Tüpä suindar ite anise añe'ë cheyesui tëi vichiko.

Los Hechos 12:5

Evokoiyase Pedro sekoi vokendasave, särösa tuprɨ ite, Jesús reroyasar rumo oyerure pirätä Tüpä upe yuvɨreko sese.

Romanos 12:2

Peiko iri eme ko ɨvɨ pɨpendar pɨ'añemoñetasa tëi rupi; iyakatu rumo, pesekuñarö pe pɨ'añemoñetasa ipɨpe sui opakatu pe rekokwer oñekuñaröra, egwë peyese peikwara Tüpä remimbotar a'e mba'e avɨye va'e, semimbotar supi tuprɨ va'e ite.

1 Corintios 1:5

Egwë e'i sekokwer pɨpe sui Tüpä ombou opakatu pe reko tuprɨ katu agwä pemombe'u tuprɨ va'erä imba'ekwasa, opakatu mba'e supiete va'e kwa tuprɨ agwä avei,

Efesios 1:8

yande raɨsu pɨpe avei Tüpä ombou opakatu yande arakwa agwä iyavei yande yapɨsaka agwä,

Efesios 5:10

Sese peyembo'e katu mba'e yande Yar pɨ'a rupindar apo agwä rese.

Efesios 5:17

Sese peikoi rene ava ndoyemboarakwai va'e nungar; iya rumo peyembo'e katu yande Yar remimbotar apo agwä.

Efesios 6:6

Peporavɨkɨ tuprɨ katu chupe narä, nda'ei chira rumo pe repiaseño imbovɨ'a agwä tëi, peporavɨkɨra rumo pe kere'ɨ̇sa pɨpe Cristo rembigwai pe rekosa pɨpe, peyapora opakatu mba'e Tüpä remimbotar rupi ete.

Filipenses 1:4

iyavei che ayerurese, arɨ rupi ayerure opakatu pe rese Tüpä upe che vɨ'aretesa pɨpe yepi;

Colosenses 1:6

ko ñe'ësa imombe'usa avei opakatu peü. Ko ñe'ësa seta ava oipɨsɨ tuprɨ avei yuvɨreko ko ɨvɨ pɨpe, inungar akoi pesenduse yɨpɨndar Tüpä porovasasa resendar ñe'ësa, ipɨpe sui peikwa tuprɨ katu a'e porovasasa supiete va'e.

Colosenses 3:16

Topɨta tuprɨ Cristo ñe'ëngagwer pe pɨ'a pɨpe. Pe arakwasa tuprɨsave peyembo'e tuprɨ, peyemongere'ɨ̇ katu sapukaisa Tüpä suindar rese. Pesapukai opakatu sapukaisa Tüpä upendar pe pɨ'a pɨpe, avɨye ndeu pe esave yepi.

Colosenses 4:12

Epafras avei omondo oma'endu'asa peü, a'e pe rekwa pendar ite, Cristo Jesús rembigwai; a'e oyerure va'e pe rese yepi toyemovɨräkwä tuprɨ iyavei toyuvɨrekoi Tüpä remimbotar rupi yuvɨreko oyapave.

Colosenses 4:5

Peiko tuprɨ pe arakwasa pɨpe ava nda'ei va'e Cristo reroyasar rovake, peyapo tuprɨ mba'e ko tekokwer avɨye vɨteseve.

1 Tesalonicenses 1:3

Pe ni'ä yande Yar rese pe yeroya tuprɨsa pɨpe peporavɨkɨño yepi, iyavei pe poroaɨsusa pɨpe peyapo mba'e Tüpä upe, iyavei peñemosaño mba'e tëi upe Jesucristo rärösa pereko va'e rese. Sese ore ma'endu'a pe rese arɨ yakatu rupi yande Ru Tüpä rovai.

1 Tesalonicenses 5:17

Iyavei peyerurera arɨ yakatu rupi no.

2 Tesalonicenses 1:11

Ko rese oroyerure pe rese yepi, oroporandu yande Ru Tüpä upe tape rereko tuprɨ gwemienoi pe rekosa pɨpe, iyavei tomboavɨye gweko pirätäsa pɨpe opakatu ñepëi-pëi mba'e peyapo pota va'e, iyavei opakatu mba'e pe rembiapo avɨye va'e, sese pe yeroyasa pɨpe.

Filemón 1:4

Che ni'ä avɨye ndeu a'e yande Ru Tüpä upe che yeruresa pɨpe nde rese yepi,

Filemón 1:6

Iyavei aporandu Tüpä upe nde rese ereyeroyase yande Yar rese, inungar ore orovɨroya a'e ndererasora mba'e avɨye va'e apo agwä ore rupi yande Yar Cristo raɨsupave yepi.

Hebreos 10:36

Pe rumo peyemovɨräkwäño itera mba'e-mba'e tëi upe Tüpä remimbotar apo agwä semimombe'ugwer oime va'erä pɨsɨ agwä kuri.

Hebreos 13:21

tombou pe reko mo'ɨ̇visa iyavei pe reko avɨyesa opakatu pe semimbotar apo agwä; iyavei a'e toyapo mba'e opakatu gwemimbotar yande rese Jesucristo rembiapo sui. ¡Egwë te'i imboeteiprɨ apɨre'ɨ̇ tasekoi Cristo yepi! Amén.

Santiago 1:5

Iyavei akoi ipanese pe pa'ü pendar upe yarakwa agwä, toporandu Tüpä upe, evokoiyase a'e omboura chupe; esepia Tüpä opakatu upe mba'e ombou gwekate'ɨ̇sa pɨpe iyavei omba'e mboasɨ e'ɨ̇sa pɨpe avei.

Santiago 3:17

akoi vɨreko va'e rumo Tüpä suindar arakwasa, a'e vɨreko itera opakatu ava rovake gweko maräne'ɨ̇sa iyavei sekoira gweko mbegwesa pɨpe; a'e ndaseko asɨi chiaveira. Iyavei oyemoigätu voi va'e, a'e oporoparaɨsuereko va'e, nomboyoavɨratɨi va'e gwekokwer, a'e ipɨ'a ñemoñetasa ñepëi reseve va'e iyavei oyapo tuprɨ va'e mba'e.

1 San Pedro 2:15

Esepia Tüpä oipota peyapora mba'e avɨye va'e ava mba'e ndoikwai va'e upe, ndayarakwai va'e upe iyavei pe rese iñe'ë-ñe'ë tëi e'ɨ̇ agwä.

1 San Pedro 4:2

ipɨpe sui ndoyuvɨreko iri chira arɨ rupi ava tëi pɨ'a ñemoñetasa pɨpe, Tüpä remimbotar rupi ete rumo oyapo pota mba'e ko ɨvɨ pɨpe yuvɨrekoi vɨtese.

1 San Juan 2:17

Ko ɨvɨ pɨpendar ava opa itera okañɨ, mba'e tëi potaraisa aposa pɨpe; akoi ava oyapo va'e rumo Tüpä remimbotar, yuvɨrekoira apɨre'ɨ̇ va'erä ite.

1 San Juan 5:20

Yaikwa avei ni'ä Tüpä Ra'ɨrɨ ouse ko ɨvɨ pɨpe, ombou arakwasa yandeu yaikwa va'erä Tüpä supiete va'e. Yaiko avei Ta'ɨrɨ Jesucristo rese, a'e avei Tüpä supiete va'e iyavei tekovesa apɨre'ɨ̇ va'e.