Apocalipsis 2:14 - Tüpä Ñe'ëngagwer

¹⁴ Che rumo aikwa mba'e pe resendar: eipeve amove ava ndoyepepɨ potai ete Balaam porombo'esa sui yuvɨreko. A'e omboarakwa Balac Israel pendar mboangaipa uka agwä, toyuvɨro'uño mba'e ro'o seropove'ëprɨ mba'e ra'anga upendar tëi oya, toyemboagwasaño yuvɨreko oyapave avei.

Tũpa Ñehengagüer

¹⁴ Che rumo aicua mbahe pe resendar: eipeve amove ava ndoyepepɨ potai eté Balaam porombohesa sui yuvɨreco. Ahe omboaracua Balac israelita mboangaipa uca ãgua, toyuvɨrohuño mbahe roho seropovẽheprɨ mbahe rahanga upendar tẽi, oya, iyavei, toyemboaguasaño yuvɨreco, oyapave avei.

Apocalipsis 2:14 Iomraidhean Croise

San Mateo 18:7

¡Iparaɨsu ko ɨvɨ pɨpendar che reroyasar omboangaipa uka va'e yuvɨreko! Oime rane itera, ¡paraɨsusa ava moangaipa uka tëisar upe kuri!

Los Hechos 15:29

Pe'ui rene mba'e mɨmba yukaprɨ seropove'ëprɨ mba'e ra'anga tëi upendar, ndape'ui chira mba'e ruvɨ mba'e mɨmba yukaprɨ suvɨ renosepɨre'ɨ̇ va'e iyavei ndapeagwasai chira. Pepoise evokoi mba'e naporäi va'e sui, oimerä mba'e tuprɨ peü. Aipo rupive Peiko tuprɨ.”

Los Hechos 21:25

Iyavei ava nda'ei va'e judío vɨroya ite yuvɨreko, a'e chupe ikwachiasa ite ore porokwaita: Pe'ui rene mba'e mɨmba yukaprɨ mba'e ra'anga tëi upendar seropove'ëprɨ, pe'ui rene mba'e ruvɨ, pe'ui rene mba'e mɨmba yukaprɨ ruvɨ renosepɨre'ɨ̇ va'e iyavei peagwasai rene.

Romanos 11:9

David avei aipo e'i araka'e: “Ipietasa toyevɨ mba'e tëi pɨpe iyavei pira mbo'asa nungar tasekoi chupe, ipɨpe sui toyuvɨro'a mba'e tëi pɨpe toyemombaraɨsu uka avei ipɨpe yuvɨreko.

Romanos 14:13

Sese, yande ndiya iri yañereroɨrö yaiko. Iyakatu rumo, ñepëi reseve pereko tuprɨ ambuae pe rɨvrɨ, angaipa pɨpe sereko uka e'ɨ̇ agwä, iyeroyasa momarä e'ɨ̇ agwä avei.

Romanos 14:21

Avɨye katu ndaya'uise mba'e ro'o, ndayaɨ'uise avei uva rɨkwer, iyavei ambuae mba'e ndayayapoise, ambuae ava Cristo reroyasar angaipa pɨpe seitɨ uka iri e'ɨ̇ agwä.

Romanos 9:32

¿Ma'erä pi'ä? Ndoyuvɨrekoi poreroyasa pɨpe, esepia a'e yuvɨrekoi pota gwemimbotar rupi tëi. Sese oyepɨapi yuvɨreko “ita yepɨapisa rese”

1 Corintios 1:23

yande rumo yamombe'u ite ñepëi Poropɨsɨrösa atɨka agwer kurusu rese yaiko. Ko ñe'ësa nda'ei ete avɨye va'e judío eta pɨ'a rupi, iyavei ava nda'ei va'e judío upe ko ñe'ësa osenduse avɨye akoi egwë e'i tëi va'e yuvɨreko chupe;

1 Corintios 7:2

pe agwasa-gwasa tëi e'ɨ̇ agwä rumo, iyakatu perekoño itera pe rembireko ñepëi-pëi, kuña avei evokoiyase tovɨreko oyakatu omer yuvɨreko.

Hebreos 13:4

Pe opakatu pemboetei avei mendasa, iyavei peiko pe reko maräne'ɨ̇sa pɨpe mendasa rese; esepia Tüpä oikwara oyemboagwasa tëi va'e upe.

1 San Pedro 2:8

Iyavei Ikwachiaprɨ pɨpe aipo e'i: “Ko ita gwasu iyavei ita ta'ɨ katu va'e sese oyepɨapira yuvɨreko.” Esepia a'e ovɨapi mba'e tëi pɨpe yuvɨreko Tüpä ñe'ëngagwer rendu pota e'ɨ̇save, evokoi nungar ava yuvɨrekoira mba'e tëi pɨpe.

2 San Pedro 2:15

Okañɨ tëi sekokwer yuvɨreko Tüpä ñe'ë mombe'usar Bosor ra'ɨrɨ Balaam rekokwerai nungar pɨpe, esepia oyepepɨ tekokwer avɨye va'e sui mba'e tëi apo agwä gwarepochi pota raisa pɨpe yuvɨreko.

San Judas 1:11

¡Iparaɨsu yuvɨreko!, Caín rekokwer rupi tuprɨ avei oyapo mba'e yuvɨreko. Inungar Balaam gwarepochi pota raisave pɨpe tëi oyavɨ gwekokwer, inungar avei Coré, omano oporeroya e'ɨ̇sa pɨpe.

Apocalipsis 2:20

Oime rumo mba'e pe rembiavɨ: peñemosaño evokoi kuña Jezabel pe pa'ü pendar upe, a'e akoi oñe'ë tëi anga'u va'e Tüpä rese viña, a'e rumo ombopa tëi oporombo'esa pɨpe che rembigwai iyemboagwasa-gwasa tëi uka agwä sereko iyavei o'u uka mba'e ro'o mba'e ra'anga tëi upe seropove'ëprɨ yuvɨreko chupe.

Apocalipsis 2:4

Che rumo aikwa oime mba'e nda'ei va'e che pɨ'a rupi pe rembiapo: ndapeyeaɨsu iri inungar yɨpɨndar.

Apocalipsis 21:8

Akoi ava osɨkɨyeai va'e rumo che rekokwer sui, ndache reroyai va'e, ava ndiporoepia potai va'e, oporoyuka va'e, akoi ava oyemboagwasa tëi va'e, ipaye serai va'e, mba'e ra'anga mboeteisar tëi iyavei opakatu ava semirä-mirä tëi va'e, a'e opara yuvɨraso ɨpa nungar azufre okai pirätä va'e pɨpe, a'e ni'ä imoñuvɨrïo manosa.”

Apocalipsis 22:15

Ava re'ɨi ndiporeroyai va'e rumo opɨtapara okarve tëi yuvɨreko, iyavei ava ipaye serai va'e, oyemboagwasa-gwasa tëi va'e, oporoyuka va'e, mba'e ra'anga upe tëi oyerure va'e, iyavei opakatu ava oipotarai va'e oporombopa-mbopa tëi agwä yepi.”