Apocalipsis 14:7 - Tüpä Ñe'ëngagwer

⁷ Ipare oñe'ë pirätä aipo e'i: “Pesɨkɨye Tüpä sui iyavei pesapukai seko ɨvatesa rese chupe, esepia ni'ä kurïtëi oyepota arɨ chupe ava rekokwer rese iporandu agwä. Pemboetei katu oyapo va'ekwer ɨva, ɨvɨ, paragwasu, ɨ o'ë va'e aveino.”

Tũpa Ñehengagüer

⁷ Ipare oñehe pĩrata aipo ehi: “Pesɨquɨye Tũpa sui iyavei pesapucai seco ɨvatesa rese chupe no. Esepia niha, cũritei oyepota arɨ chupe ava recocuer rese iporandu ãgua. Pemboetei catu oyapo vahecuer ɨva, ɨvɨ, para guasu, ɨ ohẽ vahe avei no” ehi.

Apocalipsis 14:7 Iomraidhean Croise

San Mateo 25:13

“Pe evokoiyase pema'emo'ära peyese–aipo e'i iri Jesús–, esepia ni'ä ndapeikwai ete mba'e arɨ pɨpe che ayevɨra vitu.”

San Lucas 17:18

¿Ko gweraño ite ambuae ɨvɨ pendar oyevɨ ou avɨye ndeu oya Tüpä upe?

Los Hechos 14:15

–Mbɨa eta, ¿ma'erä vo peyapo ko nungar? Ore rumo ava tëi, pe nungar avei oroiko. A'e gwä ite oroyu oromombe'u va'erä ñe'ësa avɨye va'e peü, pepoi va'erä ko mba'e egwë e'i tëi va'e mboeteisa sui, iyavei peyevɨ Tüpä supiete upe, a'e oyapo va'e ɨva, ɨvɨ, paragwasu, opakatu ipor reseve.

1 San Pedro 4:7

Vɨrovɨ rumo arɨ ipa va'e opakatu mba'e kañɨ agwä. Sese peikora yapɨsakasa pɨpe yeruresa pɨpe avei.

Apocalipsis 11:13

A'eseve voi oime ɨvɨ rɨrɨi tuvicha va'e, ichui tekwa gwasu imboopa yandepoyovaivesa ya'okwer opa onduru, a'ese siete mil tuprɨ ava opa omano yuvɨreko. Evokoiyase ava rumbɨrer, osɨkɨyepave tëi osapukai Tüpä ɨva pendar upe imboeteisa pɨpe yuvɨreko.

Apocalipsis 11:18

Ambuae tekwa re'ɨi pendar nde amotare'ɨ̇ ite yuvɨreko; nde ñemoɨrösa rumo kurïtëi oyepota, iyavei nde porandusa oime voira ava omano va'e upe; iyavei eremondora mba'e porerekosa nde rembigwai eta nde ñe'ë mombe'usar upe, ndeundar seko katuprɨ va'e upe iyavei akoi nde rer mboeteisar upe no, seko ɨvate va'e upe, seko ɨvɨ kotɨ katu va'e upe aveino; iyavei eremokañɨrä ko ɨvɨ pɨpe mba'e tëi aposar yuvɨreko.”

Apocalipsis 15:4

¿Uma pi'ä ndosɨkɨyei chira, ndesui che Yar? ¿Ava pi'ä nande mboetei chira nderereko? Nde gweraño ite ereiko seko maräne'ɨ̇ va'e; opakatu tekwa ɨvɨ rupindar yugwerura nde mboetei agwä yuvɨreko, esepia ni'ä, nde rembiapo mba'e supi tuprɨ va'e ite.”

Apocalipsis 16:9

Ipare opakatu ite ava yuvɨrokaipa tuprɨ; ndoyevɨi ete rumo Tüpä upe iyavei nomboetei ete yuvɨreko. Egwë e'i iñe'ë marä-marä tëiño mba'erasɨ rerekose Tüpä upe yuvɨreko.

Apocalipsis 18:10

Opɨtañora amombrɨve osɨkɨyepave iparaɨsusa sui, aipo e'i tëira yuvɨreko: “¡Ndeparaɨsu, ndeparaɨsu katu ite, eiko tekwa gwasu, Babilonia nde tekwa seko pirätä va'e ite ereiko viña! Esepia avɨyeteramo tëi oyepota ou teko asɨsa ndeu.”

Apocalipsis 18:17

¡Avɨyeteramo tëi rumo opa okañɨ imba'e eta ichui!” Evokoiyase opakatu ava ɨarusu pɨpendar rerekwar, ava ɨmbe'ɨ ɨvɨrindar ɨarusu rerogwatasar, paragwasu rupi oporavɨkɨ va'e oyeupe narä mba'e rereko agwä, a'e opaño opɨta amombrɨve yuvɨreko ichui

Apocalipsis 18:19

Ipare imboasɨpave omondo ɨvɨ ku'i oakäve yuvɨreko, oyase'o iyavei ndoyembovɨ'ai tëi, ipare säse yuvɨreko aipo e'i: “¡Ndeparaɨsu, ndeparaɨsu katu ite, eiko tekwa gwasu! Esepia ni'ä, evokoi tekwa gwasu mba'e eta pɨpe sui tëi ava vɨreko va'e ɨarusu paragwasu pɨpe a'e oyemomba'e yar yuvɨreko viña. ¡Avɨyeteramo tëi rumo opa okañɨ!”

Apocalipsis 19:5

Evokoiyase Tüpä renda sui tuprɨ oyeendu ñe'ësa aipo e'i va'e: “¡Pemboetei yande Ru Tüpä sereko opakatu peroya va'e, seko ɨvɨ kotɨ katumi va'e, seko ɨvate va'e avei, iyavei opakatu seroyasar peiko va'e osɨkɨye va'e avei ichui tomboetei yuvɨreko!”

Apocalipsis 4:11

“Ore Yar Tüpä, iya ite nde mboeteisa, ndeu sapukaisa nde pirätäsa rese, esepia nde ereyapo va'e mba'e opakatu; nde remimbotar rupi ni'ä oime opakatu mba'e.”

Apocalipsis 4:9

Evokoi yuvɨrekove va'e omboetei yuvɨreko, avɨye ndeu e'i ko ogwapɨ va'e öi tenda arɨve ndopai va'e upe.

Apocalipsis 8:10

Ipare imombosapɨsa mbigwai ɨva pendar omoñe'ë gwemimbɨ, a'ese yasɨtata tuvicha va'e ovɨapi ɨva sui ou, sendɨ gwasu inungar akoi ɨvɨra rese tata sendɨ gwasu va'e, a'e ovɨapi ɨai mombosapɨsa ya'okwer pɨpe iyavei ɨvɨ sui ɨ o'ë va'e mombosapɨsa ya'okwer pɨpe aveino.