2 Corintios 8:3 - Tüpä Ñe'ëngagwer

³ Che ni'ä asepia ite omondose oporerekosa okatugwer rupi yuvɨreko, ipare omondo iri ete oporerekosa gwemimbotar rupi yuvɨreko

Tũpa Ñehengagüer

³ Supi eté oquerẽhɨsa pɨpe omondo ité ocatugüer rupi; amove oseca iri mbahe güemimbotar rupi yuvɨreco.

2 Corintios 8:3 Iomraidhean Croise

San Marcos 14:8

Ko kuña oyapo mba'e okatugwer rupi; opa voi omoɨäkwä che rete che mano e'ɨ̇ vɨteseve.

Los Hechos 11:29

Evokoiyase Jesús reroyasar Antioquía pendar omondo pota voi okatugwer rupi Jesús reroyasar Judea pendar pɨtɨ̇vɨï agwä yuvɨreko.

Romanos 10:2

Supiete ikere'ɨ̇ Tüpä upe mboravɨkɨ apo agwä yuvɨreko viña; okere'ɨ̇sa sui rumo oyavɨ sendukwa e'ɨ̇sa pɨpe yuvɨreko.

1 Corintios 16:2

Domingo yakatu iya pe avei peipe'a voimi gwarepochi pe poravɨkɨ reprɨ sui yapokatu agwä, eipeve che yepotase, ndapeyemañeko iri chira gwarepochi monu'ä agwä rese peiko.

1 Corintios 9:17

Tüpä ndache kwaise oñe'ë mombe'u agwä viña, che rumo che kere'ɨ̇sa pɨpe amombe'use; a'ese aipɨsɨra ichuindar porerekosa, egwë nda'ei rumo, esepia che amboavɨye ite Tüpä porokwaita vichiko.

Gálatas 4:15

¿Marä peye pevɨ'aretesa rereko kurïtëi? Ndacheremiräi chietera aipo peü, esepia supiete penosera revo pembou va'erä peresa cheu viña.

Filipenses 2:13

esepia, Tüpä ombou pe kere'ɨ̇sa semimbotar apo agwä, gwemimbotar rupi avei ombou pirätäsa imboavɨye agwä peü.

Colosenses 4:13

Che aikwa ite Epafras rekokwer, a'e oyemboakɨ oyeruresa pɨpe pe rekokwer rese, Laodicea pendar rekokwer rese, Hierápolis pendar rekokwer rese avei.

1 Tesalonicenses 2:8

egwë oro'e avei ore pe raɨsu, sese nda'ei Tüpä ñe'ëngagwer gweraño oromondo pota peü, ore rekokwer aveino. ¡Esepia orovɨreko ite poraɨsusa pe rese!

Filemón 1:14

Che rumo ndaipotai mba'e apo nde pɨ'a ñemoñetasa kwae'ɨ̇ vɨteseve, nde rumo ereyapora ko mba'e avɨye va'e cheu nda'ei chira nde remimbotar tëi nde kere'ɨ̇ gwer rupi ete.

1 San Pedro 4:11

Akoi ava oñe'ë tuprɨai va'e, a'e tomombe'u Tüpä ñe'ë ite. Akoi peporopɨtɨ̇vɨï potase, peyapoño Tüpä ombou va'e pirätäsa pɨpe peü. Opakatu mba'e peyapo va'e, peyapo katu Jesucristo rer pɨpe Tüpä mboetei agwä, esepia chupendar ite imboeteisa iyavei imborerekwasa apɨre'ɨ̇ va'erä ite. Amén.

1 San Pedro 5:2

Pesärö tuprɨ katu ava Tüpä upendar imondoprɨ va'e peü; peyapora pe kere'ɨ̇sa pɨpe ite, a'e ni'ä Tüpä oipota, nda'ei ambuae yande kwaisa pɨpe tëi, nda'ei avei gwarepochi pota raisa pɨpe, peyapora rumo mboravɨkɨ pe kere'ɨ̇sa pɨpe ite.