2 Corintios 12:21 - Tüpä Ñe'ëngagwer

²¹ Asɨkɨye avei aso irise pe repia, esepia omboura Tüpä che chï agwä pe sui, che mboyase'o uka tiëtera peye yɨpɨsuive angaipa pereko va'e pɨpe, iyavei ndapemboasɨi etese mba'e tëi, yemboagwasa-gwasa tëisa iyavei mba'e pe remimbotarai peyapo va'ekwer.

Tũpa Ñehengagüer

²¹ Asɨquɨye avei aso irise pe repia, omboura Tũpa pe sui che chĩ ãgua, che mboyaseho uca tiẽtera peye setá pe cueseve peyemboangaipa vahe rese iyavei ndapemboasɨi etese mbahe tẽi, yemboaguasa-guasa tẽisa iyavei que mbahe pe remimbotarai peyapo vahecuer.

2 Corintios 12:21 Iomraidhean Croise

Romanos 13:13

Yande katu yagwata yande reko ɨ̇vi tuprɨsa pɨpe, inungar yagwatase arɨ pɨpe. Ani yaikora kagwar pɨpe tëi iyavei pietasa rupi, ndayaikoi chira poropota raisa pɨpe, iyavei ndayayapoi chira mba'e naporäi va'e, ndayaikoi chiaveira yande pɨ'añemoñeta nda'oyoyai va'e pɨpe iyavei ndayaroɨröi chira ava imba'e rese sereko.

Romanos 9:2

ndavɨ'ai ete che pɨ'a pɨpe iyavei oime mba'e tasɨ va'e cheu yepi,

1 Corintios 5:1

Yandusa avei ñepëi pe pa'ü pendar vɨrekose gwembirekorä osɨ rekoyar. Evokoi oyapo va'e yemboagwasasa naporäi ete, Tüpä reroyasare'ɨ̇ ite ndoyapoi evokoi nungar mba'e tëi yuvɨreko.

2 Corintios 10:6

iyavei ore oroyemoigätu ite opakatu ndiporeroyai va'e rekokwer reroyɨ agwä, pe rane rumo peroya tuprɨra.

2 Corintios 12:7

sese che yemboɨvateai e'ɨ̇ agwä che ker nungar mba'e che pɨ'amondɨi va'e rembiepiagwer rese Tüpä ombou tekoasɨsa cheu. A'e avɨye yu che kutu gwasu va'e, ndoyavɨi avei Karugwar marä-marä tëi che rereko va'e.

2 Corintios 13:2

Akoi yɨpɨndar oyemboangaipa va'e yuvɨreko, ambuae opakatu yuvɨrekoi va'e upe avei aipo a'e, kurïtëi aiko amombrɨ pesui amombe'u irira aipo peü asose imoñuvɨrïosa yupagwer rupi pe pɨri: asoirise rumo pe repia, ndopoparaɨsuereko iri chietera,

2 Corintios 8:24

Sese pe rekokwer kwa agwä, pemboyekwa katu pe poroaɨsusa supiete va'e chupe yuvɨreko, evokoiyase tovɨroya ite che ayeroyase iyavei ayembovɨ'ase pe rekokwer rese.

Gálatas 5:19

Yande remimbotarai suindar yande rembiapoai ikwasa tuprɨ ite: a'e yemboagwasa tëisa, teko kɨ'asa, mba'e tëi aposa,

Colosenses 3:5

Evokoiyase pepoi opakatu ko mba'e naporäi va'e ko ɨvɨ pɨpendar tëi pe rese oime va'e sui: ndapeyemboagwasai chira, ndapeyapoi chira mba'e tëi pe rekokwer pɨpe, ndapeipotarai chira pɨ'añemoñeta raisa, ndapeipotarai chira ambuae ava mba'e (esepia, a'e ni'ä oyoya mba'e ra'anga tëi mboeteisa rese).

Hebreos 13:4

Pe opakatu pemboetei avei mendasa, iyavei peiko pe reko maräne'ɨ̇sa pɨpe mendasa rese; esepia Tüpä oikwara oyemboagwasa tëi va'e upe.

2 San Pedro 2:18

Esepia oñe'ë tuprɨai anga'u tëi ava mongere'ɨ̇ agwä ava pɨ'añemoñeta raisa rupi seroyevɨ agwä, ipɨpe sui ombopa tëi a'e ava seko katuprɨ pota va'e yuvɨreko evokoi nungar mba'e tëi pɨpe iyevɨ iri agwä.

San Judas 1:23

Peipɨtɨvɨïra ava karugwar ratave ivɨapi rägwer sui, ambuae peiparaɨsuerekora, pesɨkɨyera rumo ichui, ndapeipotai chira iturukwar esepia gwekokwerai pɨpe omongɨ'a gwetekwer yuvɨreko.

San Judas 1:7

Iyavei ambuae mbigwai eta, iyavei Sodoma pendar Gomorra pendar iyavei a'e tekwa ɨvɨrindar oyemondo oyemboagwasa-gwasa tëi agwä yuvɨreko, iyavei oyeeraso uka mba'e-mba'e tëi pɨpe yuvɨreko. Ipɨpe sui oiporara tata gwasu apɨre'ɨ̇ va'e yuvɨreko a'e opɨta opakatu yande yembosɨkɨye agwä.

Apocalipsis 21:8

Akoi ava osɨkɨyeai va'e rumo che rekokwer sui, ndache reroyai va'e, ava ndiporoepia potai va'e, oporoyuka va'e, akoi ava oyemboagwasa tëi va'e, ipaye serai va'e, mba'e ra'anga mboeteisar tëi iyavei opakatu ava semirä-mirä tëi va'e, a'e opara yuvɨraso ɨpa nungar azufre okai pirätä va'e pɨpe, a'e ni'ä imoñuvɨrïo manosa.”

Apocalipsis 22:15

Ava re'ɨi ndiporeroyai va'e rumo opɨtapara okarve tëi yuvɨreko, iyavei ava ipaye serai va'e, oyemboagwasa-gwasa tëi va'e, oporoyuka va'e, mba'e ra'anga upe tëi oyerure va'e, iyavei opakatu ava oipotarai va'e oporombopa-mbopa tëi agwä yepi.”

Apocalipsis 22:20

Akoi omombe'u va'e ko ñe'ësa, aipo e'i: “Supiete ayevɨ poyavara.” Egwë te'i ayase. ¡Erio, che Yar Jesús!