1 San Juan 2:15 - Tüpä Ñe'ëngagwer

¹⁵ Ani pesaɨsura mba'e ɨvɨ pɨpendar, ani chiaveira pesaɨsu ɨpɨpendar mba'e. Akoi osaɨsu va'e mba'e ɨvɨ pɨpendar tëi, a'e ndosaɨsui yande Ru Tüpä yuvɨreko;

Tũpa Ñehengagüer

¹⁵ Evocoiyase pesaɨsu eme co mbahe tẽi ɨvɨ pɨpendar. Acoi ava co mbahe tẽi osaɨsu vahe, ahe ndosaɨsui yande Ru Tũpa yuvɨreco.

1 San Juan 2:15 Iomraidhean Croise

San Mateo 4:8

Ipare vɨraso iri tëi karugwar ɨvɨtrɨ ɨvate va'e apɨterve, ichui omboyekwapa tëi opakatu tekwa ɨvɨ pɨpendar, porañete gwasu va'e yemboɨvateaisa avei,

San Mateo 6:24

“Ndipoi chietera ava ñuvɨrïo gwerekwar omboyeroya va'e, esepia ñepëi oyamotare'ɨ̇ra, ambuae evokoiyase osaɨsu katura, osaɨsu katura ñepëi iyavei ambuae oyamotare'ɨ̇ra. Ndayaikatui ete Tüpä mboyeroya gwarepochi pota raisa pɨpe.”

San Lucas 16:13

“Ndipoi chira mbigwai omboyeroya va'e ñuvɨrïo gwerekwar; esepia ndoyambotai chira ñepëi, ambuae evokoiyase osaɨsu katura, ambuae saɨsuprɨ katura sekoi, ambuae evokoiyase ndosaɨsui chira. A'ese ndapeikatui chietera Tüpä pɨsɨ agwä pe mba'e eta rese.”

San Juan 15:19

Peikose ko ɨvɨ pɨpendarse viña, a'ese ava ko ɨvɨ pɨpendar pe raɨsuai etera viña, inungar a'e osaɨsuai oyesuindar yuvɨreko yepi. Che rumo opoporavo ko ɨvɨ pɨpendar pa'ü sui, sese ni'ä ko ɨvɨ pɨpendar ndapeambotai ete yuvɨreko, esepia ni'ä nda'e iri ete peiko ko ɨvɨ pɨpendar.

Romanos 12:2

Peiko iri eme ko ɨvɨ pɨpendar pɨ'añemoñetasa tëi rupi; iyakatu rumo, pesekuñarö pe pɨ'añemoñetasa ipɨpe sui opakatu pe rekokwer oñekuñaröra, egwë peyese peikwara Tüpä remimbotar a'e mba'e avɨye va'e, semimbotar supi tuprɨ va'e ite.

Gálatas 1:10

Che ndasekai ava tëi cherekoa'ä agwä, che rumo aseka Tüpä ite cherekoa'ä agwä. Ndasekai che ava rese aiko tuprɨ va'erä. ¡Akoi che tëi asekase aiko tuprɨ va'erä ava rese, evokoiyase nda'ei chietera Cristo rembigwai aiko viña!

Efesios 2:2

Ko ɨvɨ pɨpendar pɨ'a ñemoñetasa rupi tëi peiko iyavei ɨvate rupindar karugwar rerekwar porokwaita tëi avei peroya, a'e Tüpä reroyasare'ɨ̇ ombo'e va'e oiko.

1 Timoteo 6:10

Esepia gwarepochi pota raisa sui osë opakatu mba'e naporäi va'e; amove ava ipota raisa pɨpe oyepepɨ Tüpä reroyasa sui iyavei omombaraɨsu gwekokwer ipɨpe a'e ae yuvɨreko.

Santiago 1:27

Yarekose rumo yande rembieroya nimaräi va'e yande Ru Tüpä rovai: a'ese yaipɨtɨ̇vɨïra ndiyesupai va'e iyavei kuña imer mano va'ekwer iparaɨsusa rese, ndayayapoi chiaveira mba'e ɨvɨ pɨpendar ñaporäi va'e rembiapo nungar.

Santiago 4:4

¡Pe mbɨa, peyavɨ va'e pe rekokwer! ¿Ndapeikwai vo akoi ava Tüpä kwapare'ɨ̇ mborɨpar tëi yuvɨrekoi va'e, a'e Tüpä amotare'ɨ̇mbar yuvɨrekoi? Egwë e'i ete akoi oipota va'e ko ɨvɨ pɨpendar mba'e-mba'e tëi pɨpe gweko agwä, a'e oyeapo Tüpä amotare'ɨ̇mbar.

1 San Juan 3:17

Akoi ava mba'e yar imba'e eta va'e iyavei osepia tëise ambuae paraɨsusa, nomondoi rumo mba'e ipane va'e chupe, ¿marä e'i pi'ä evokoiyase Tüpä poroaɨsusa rereko opɨ'a pɨpe?

1 San Juan 4:5

Evokoi ko ɨvɨ pɨpendar tëi yuvɨrekoi va'e; esepia oñe'ë mba'e ɨvɨ pɨpendar rese tëi yuvɨreko, iyavei ava supindar a'e ite oyapɨsaka iñe'ë rese yuvɨreko.

1 San Juan 5:10

Akoi vɨroya va'e Tüpä Ra'ɨrɨ vɨreko ite semimombe'u opɨ'a pɨpe, akoi ndovɨroyai va'e rumo Tüpä, semiräñeteai va'e nungar tëi vɨreko, esepia ndovɨroyai Tüpä ñe'ë Ta'ɨrɨ resendar.