1 Corintios 6:9 - Tüpä Ñe'ëngagwer

^9-10 ¿Ndapeikwai vo akoi ava mba'e-mba'e tëi aposar ndoyuvɨroikei chietera Tüpä mborerekwasa pɨpe kuri? Ndapeyembopa ukai chira, yemboagwasasa angaipa pɨpe iyavei oyerure va'e mba'e ra'anga upe tëi, oyemboagwasa tëi va'e, iyavei kuimba'e yuvɨrekoi va'e kuña rekokwer nungar pɨpe, iyavei kuimba'e yuvɨrekoi va'e oyese ae, iyavei mba'e ñomisar, iyavei ava nomombe'ui va'e mba'e supi, iyavei kagwar, iyavei ava iñe'ë-ñe'ë tëi va'e, iyavei ava imondarai va'e yuvɨreko, a'e ndoyuvɨroikei chietera Tüpä mborerekwasave kuri.

Tũpa Ñehengagüer

^9-10 ¡Pe niha peicua acoi ava mbahe-mbahe tẽi aposar ndoyuvɨroiquei chietera Tũpa mborerecuasa pɨpe curi! Peyembopa ucai rene chupe. Esepia, acoi ava oyemboaguasa-guasa tẽi vahe, mbahe rahanga upe tẽi oyeroquɨ vahe, omendasa sui oyemboaguasa vahe, cuimbahe pãve oyapo vahe mbahe oyese ae yuvɨreco, imonda rai vahe, oipota rai vahe ambuae ava mbahe, osavaɨpo serai vahe, imahechiroi ai vahe, iyavei ava vɨrocua yesapɨhaño tẽi vahe mbahe tẽi pɨpe ambuae ava mbahe, ahe opacatu ndoyuvɨrasoi chira ɨvave Tũpa mborerecuasave curi.

1 Corintios 6:9 Iomraidhean Croise

San Mateo 19:29

Iyavei opakatu oseya va'e che rekokwer sui tëi gwëtä, anise vɨvrɨ, anise gweindrɨ, anise oyesupa, anise osɨ, anise gwa'ɨrɨ, anise oɨvɨ avei, a'e oipɨsɨra cien yupagwer mba'e, iyavei oipɨsɨra tekovesa apɨre'ɨ̇ ndopai va'e.

San Mateo 25:34

A'ese che Mborerekwar ɨvate katu va'e aipo a'era che akato kotɨndar upe: ‘Perio opakatu, che Ru sui sovasaprɨ peiko va'e, peike che Ru Tüpä mborerekwasa pɨpe; a'e akoi yɨpɨve ɨvɨ apo ramo suive imoigätuprɨ peü narä.

San Lucas 21:8

Jesús omboyevɨ chupe: “Peikwa katu peyembopa ukai rene. Esepia ni'ä seta ava yugwerura cherer pɨpe. Aipo e'ira yuvɨreko: ‘Che aiko Poropɨsɨrösar’, iyavei ‘Kurïtëi osupitɨ arɨ imombe'uprɨ.’ Pe rumo ndapegwatai chira supi yuvɨreko.

Los Hechos 20:32

“Sese, che rɨvrɨ eta, opoeyara Tüpä povrɨve iyavei iñe'ësa iporovasasa resendar pɨpe. A'e pe movɨräkwä katura pe rereko iyavei omboura opakatu mba'e gwemimombe'u peü opakatu ambuae gwembiporavo reseve.

Los Hechos 24:25

Pablo rumo omombe'use chupe teko ɨ̇visa resendar, teko ñearösa resendar avei, a'ese Félix osɨkɨyepave aipo e'i chupe: –Esoño kurïtëi. Añe'ë irira ndeu arekose arɨ mba'e rese porandu agwä.

Romanos 1:18

Supiete ni'ä Tüpä omboyekwa itera oñemoɨrösa ɨva sui opakatu ava vɨroyasare'ɨ̇ upe, ndasekoporäi va'e upe avei, mba'e gwembiapoai sui ndoikwa uka potai va'e ko ñe'ësa supiete va'e ambuae ava upe yuvɨreko.

1 Corintios 15:33

Peyembopa ukai eme evokoi nungar ava upe: “Esepia ava naporäi va'e pɨri peikose, a'e evokoiyase vɨrovara pe reko tuprɨsa yuvɨreko.”

1 Corintios 15:50

Che rɨvrɨ eta, ko mba'e amombe'u potami peü, akoi ava upe gwetekwer reseve, ndiyai ete seike agwä ɨvave Tüpä mborerekwasave, esepia ko yande rete okañɨ tëi va'erä, ndoipɨsɨi chira tekokwer apɨre'ɨ̇ va'e.

1 Corintios 3:16

¿Ndapeikwai vo Tüpä rëtä peikose, iyavei Tüpä Espíritu sekoise pe rese?

1 Corintios 5:1

Yandusa avei ñepëi pe pa'ü pendar vɨrekose gwembirekorä osɨ rekoyar. Evokoi oyapo va'e yemboagwasasa naporäi ete, Tüpä reroyasare'ɨ̇ ite ndoyapoi evokoi nungar mba'e tëi yuvɨreko.

1 Corintios 5:10

Iyavei ko namombe'ui peyepepɨ va'erä opakatu mba'e ɨvɨ pɨpendar oime va'e yemboagwasasa sui, ani chiaveira mba'e ñomiprɨ sui, ani chiaveira mondasa sui, ani chiaveira yeruresa mba'e ra'anga upe tëi, imboavɨye agwä pesë itera ko ɨvɨ pɨpe sui viña.

1 Corintios 5:11

Che akoi aipo a'e peü ndapemborɨi chira ava che Jesucristo reroyasar aiko e'i anga'u tëi va'e, oyemboagwasase, anise oipotaraise ambuae ava mba'e, oyerure tëi va'e mba'e ra'anga upe, iyavei ima'echiröiai va'e, kagwar tëi va'e, anise imondarai va'e. Evokoi nungar ava pɨri ñepëi yepe ndapekarui chietera.

1 Corintios 6:18

Peyepepɨ voiño katu ava yemboagwasa-gwasa tëisa sui. Opakatu ambuae angaipa nda'ei yande retekwer rese narä ite. Akoi ava oyapo tëi va'e mba'e kuña rese, gwetekwer ae evokoiyase omomarä katu gwembiapo pɨpe sui tëi.

1 Corintios 6:19

¿Ndapeikwai vo pe retekwer Espíritu Maräne'ɨ̇ upendar ite sekoise a'e Tüpä ombou va'e peü, iyavei Espíritu Maräne'ɨ̇ sekoi ete pe rese? Pe evokoiyase nda'ei ete pe retekwer yar peiko,

1 Corintios 9:24

Peikwa ni'ä gwayɨsa oimese, ava opakatu gwasu yuvɨnoñase yuvɨreko, ivava katu va'e gweraño rumo oipɨsɨ porerekosa yepi. Evokoiyase inungar ko ivava katu va'e, egwë peye avei pe rekokwer pɨpe Tüpä porerekosa pɨsɨ agwä peiko.

2 Corintios 12:21

Asɨkɨye avei aso irise pe repia, esepia omboura Tüpä che chï agwä pe sui, che mboyase'o uka tiëtera peye yɨpɨsuive angaipa pereko va'e pɨpe, iyavei ndapemboasɨi etese mba'e tëi, yemboagwasa-gwasa tëisa iyavei mba'e pe remimbotarai peyapo va'ekwer.

Gálatas 6:7

Peyembopa eme katu pe ae: ndipoi chietera ava vɨroɨrö va'e Tüpä ñemoɨrösa pɨsɨ e'ɨ̇sa pɨpe. Egwë e'i ete yañotɨ̇se mba'e, ichui avei mba'e yaipɨsɨra.

Colosenses 3:5

Evokoiyase pepoi opakatu ko mba'e naporäi va'e ko ɨvɨ pɨpendar tëi pe rese oime va'e sui: ndapeyemboagwasai chira, ndapeyapoi chira mba'e tëi pe rekokwer pɨpe, ndapeipotarai chira pɨ'añemoñeta raisa, ndapeipotarai chira ambuae ava mba'e (esepia, a'e ni'ä oyoya mba'e ra'anga tëi mboeteisa rese).

Hebreos 12:14

Peiko katu ava upe mba'e tuprɨ pɨpe, peiko avei pe reko maräne'ɨ̇ pɨpe; esepia ava ndovɨrekoi va'e gweko maräne'ɨ̇, ndosepiai chietera yande Yar.

Hebreos 12:16

Tipo eme katu pe pa'ü pendar oyemboagwasa tëi va'e, tipo eme avei ava Tüpä upendar mba'e vɨroɨrö va'e pe pa'üve inungar Esaú araka'e, a'e omondo Tüpä porovasasa oyeupendar ta'ɨrɨ ɨpɨ gwekosa resendar mimoi repɨrä tëi vɨvrɨ upe.

Hebreos 13:4

Pe opakatu pemboetei avei mendasa, iyavei peiko pe reko maräne'ɨ̇sa pɨpe mendasa rese; esepia Tüpä oikwara oyemboagwasa tëi va'e upe.

Santiago 1:16

Che rɨvrɨ eta, che rembiaɨsu, peyembopai rene katu:

1 San Juan 3:7

Che ra'ɨreta, peyembopa uka eme ambuae ava upe, akoi oyapo va'e mba'e avɨye va'e yepi, a'e sekokwer avɨye va'e ite inungar Jesucristo;

Apocalipsis 21:8

Akoi ava osɨkɨyeai va'e rumo che rekokwer sui, ndache reroyai va'e, ava ndiporoepia potai va'e, oporoyuka va'e, akoi ava oyemboagwasa tëi va'e, ipaye serai va'e, mba'e ra'anga mboeteisar tëi iyavei opakatu ava semirä-mirä tëi va'e, a'e opara yuvɨraso ɨpa nungar azufre okai pirätä va'e pɨpe, a'e ni'ä imoñuvɨrïo manosa.”

Apocalipsis 22:15

Ava re'ɨi ndiporeroyai va'e rumo opɨtapara okarve tëi yuvɨreko, iyavei ava ipaye serai va'e, oyemboagwasa-gwasa tëi va'e, oporoyuka va'e, mba'e ra'anga upe tëi oyerure va'e, iyavei opakatu ava oipotarai va'e oporombopa-mbopa tëi agwä yepi.”