Éxodo 32:13 - Wanano OT Portions

¹³ Mʉhʉre dahra cohtaina cjiri Abrahã, to macʉno Isaa, to panamino Israe cʉ̃hʉre mʉ yahu cũri cjiripʉre wacũboca mʉhʉ. Mʉhʉ sehe quihõno mʉ niriro seheta yoariro jira. Ã jicʉ cua pisaro mehne tinare mʉ õ sehe ni yahu cũri cjiripʉre wacũboca: “Mʉsare ji nʉnʉ tihtinare payʉ waro wahachʉ yoaihtja, ñahpichoha poca yoaro sehe. Ã yoa yʉhʉ ahri yahpare mʉsa panamanare waihtja ti ã cjʉa turia dijahto sehe” nia tiha mʉhʉ tina cjirire cua pisaro mehne. Mʉ ã ni yahu cũri cjirire wacũboca mʉhʉ —ni Moise ño payoro mehne sinitu ñʉha Yawere.

Éxodo 32:13 Iomraidhean Croise

Génesis 12:2

Mʉhʉre õ sehe yoa, noano wahachʉ yoaihtja. Mʉ panamana, mʉhʉre ji nʉnʉ tihtina cjihti payʉ wahachʉ yoaihtja. Ã yoa mʉhʉre masa ti wacũnohoriro yoa, tuhsʉ, noano wahachʉ yoaihtja. Tí yʉ noano wahachʉ yoaa mehne mʉhʉ sehe painapʉre, payʉ masare noano waha turiachʉ yoahtiro cjihto jira mʉhʉ.

Génesis 12:7

Tói Yawe sehe Abrãre bajua, õ sehe niha: —Mʉhʉre ji turia dijahtina cjihtire ahri yahpa, Canaã yahpare waihtja —niha. To ã nichʉ tʉhoro, Abrã sehe tãa mehne dahre mʉori tuhu yoa, tirore ño payoha.

Génesis 15:18

à wahachʉ yoariro sehe Yawe jiha. Tíre ñono, Abrãre cua pisaro mehne “Õ sehe yoaihtja mʉhʉre” ni, yahuro taro niha. à jiro õ sehe niha tirore: —Ahri yahpare mʉhʉre ji turiahtina, mʉ ya curua macainareta waihtja. Tí yahpa Egipto yahpa ji bato tiroi ji dʉca, pʉ pjiri ma, Éufrate ma dʉhtʉ cahapʉ ji batoarohca.

Génesis 15:5

To ã niri baharo, Cohamacʉ Abrãre sopacapʉ na wijaa, õ sehe niha tjoa: —Mʉanopʉ ñʉ mʉo, ñahpichoha pocare quihõ ñʉjʉta. Quihõ ñʉpaihta, quihõ bihosi mʉhʉ. Mʉ quihõ bihoeraro seheta mʉ panamana, mʉhʉre ji turiahtina cjihti cʉ̃hʉ payʉ waro jiahca —niha tiro.

Génesis 15:7

Baharo Cohamacʉ õ sehe ni namoha: —Yʉhʉ jija Yawe. Yʉhʉta mʉhʉre Urpʉ, Mesopotamia yahpai jiri macapʉ jirirore na wiohi ahri yahpa, Canaã yahpa mʉ ya yahpa cjihtore wai tai —niha.

Génesis 17:8

à yoa ahri yahpa, Canaã yahpa, mipʉre mʉ ji sito tari yahpare mʉhʉre, ã jichʉ mʉ panamana cjihti cʉ̃hʉre waihtja. Ti ã cjʉarucuhti yahpa jirohca ahri yahpa. à yoa yʉhʉ sehe ti Cohamacʉ ã jirucuihtja —niha Abrahãre.

Génesis 22:16

Õ sehe ni yahuha: —Yʉ yoa dutiare ne soro nieracʉhta, yoara mʉhʉ. “Mʉ macʉ cʉ̃iro jirirore wajã, jʉ̃ wa mʉo, ño payoga yʉhʉre” yʉ mʉhʉre ni sinichʉ, “Ne yoasi” nierara mʉhʉ yʉhʉre. Ã jicʉ yʉhʉ Yawe sehe mʉhʉre cua pisaro mehne yʉ yahuare potocã sohtori tiihtja.

Génesis 22:17

Mʉhʉre potocãta noano wahachʉ yoaihtja. Mʉhʉre ji nʉnʉ tihtina cʉ̃hʉre payʉ wahachʉ yoaihtja, ñahpichoha poca, mʉanopʉ jia poca yoaro sehe. Padʉro pjiri ma dʉhtʉ cahai jia pohca yoaro sehe payʉ wahaahca. Tuhsʉ, parore mʉhʉre yahu namoihtja: Mʉhʉre ji nʉnʉ tihtina sehe tinare ñʉ tuhtiina mehne ã cahma wajã yʉhdʉrʉcaina jirucuahca.

Génesis 24:7

Tópʉta yʉ pʉcʉsʉma mehne, yʉ coyea mehne jia timai yʉhʉ. Tí yahpapʉ jiriroreta Yawe, mʉanore bajuamehneriro yʉhʉre na wiohre. Yʉhʉre to na wiori baharo, cua pisaro mehne ahri yahpare, mipʉ mari jiri yahpare “Mʉ panamana mʉhʉre ji turiahtinare waihtja” ni tuhsʉa tire yʉhʉre tiro. Ã jiro cʉ̃iro to anjore mʉhʉ mehne warocarohca tó macaricoro yʉ macʉ namo cjihtore boca, mʉ na tahto sehe.

Éxodo 13:11

à yoa Moise israe masare õ sehe ni yahu turia namoha tjoa: —Tiro Yawe mari ñʉchʉsʉma cjirire ã yoa mʉsa cʉ̃hʉre cua pisaro mehne to yahuriro cjiro seheta mipʉre yoa, sohtori tiro taro niyuhca. à jiro to niriro cjiro seheta mʉsare õi jiinare na wio, cananeo masa ti jiri yahpapʉ na sʉ, tí yahpare mʉsare wa, sohtori tihto jiyuhca.

Éxodo 13:5

‘Ã yoa mari ñʉchʉsʉma cjiri Canaã yahpapʉ ti jia tiri pjapʉre Yawe sehe to basi tina cjirire cua pisaro mehne õ sehe nia tiyuhca: “Ahri yahpa, cananeo masa, hitita masa, amorreo masa, heveo masa, jebuseo masa cʉ̃hʉ ti jiri yahpare mʉsa panamana mʉsare ji turiainapʉre waihtja” nia tiyuhca tiro tina cjirire. To ã niri yahpa cjiro sehe noari yahpa, jipihtia chʉa jiri yahpa jiyuhca. Tí yahpapʉ Yawe mʉsare to na sãachʉ, ahri yahpa Egipto yahpare mʉsa wijaari dacho cjirore wacũhtina jiyuhca mʉsa. Tí dacho cjirore wacũna, cʉhmaripe wahma cʉhma sãari sʉ̃hi bose nʉmʉri yoa mʉjahtina jiyuhca.