Éxodo 15:5 - Wanano OT Portions

⁵ Dia pjiri ma topapʉ tina cjiri diha caha sʉ pihtia wahara. Ã jia tãca tí ma topapʉ to diha caha sʉboro seheta diha caha sʉ pihtia wahara tina cjiri.

Éxodo 15:5 Iomraidhean Croise

Éxodo 14:28

Pjiri ma to jimariro cjiro seheta to tjuaachʉ, jipihtina israe masare nʉnʉ tirina cjiri, ti cahma wajã bʉso, cawaloa buipʉ cahma wajãina cʉ̃hʉ, ne cʉ̃iro dʉhsaro marieno mini yaria pihtia wahaha tina.

Éxodo 15:10

Ti ã ni durucuri baharo jipachʉta, mʉhʉ sehe putirocaro yoaro sehe wihnonore warocara. Mʉ ã warocaro mehne ahri mapʉ mini yaria pihtia wahara tina. Picha yapa diapʉ to diha caha sʉboro seheta bʉjʉa pahcõri tiropʉ diha pihtia wahara tina.

Éxodo 15:16

Wacũenoca tinare cuaro pja sʉchʉ, cʉa yʉhdʉa wahaahca tina. Yawe, tua yʉhdʉrʉcʉ sʉriro mʉ jia tia quitire tʉho cʉa waha, ne dohse yoa masisi tina. Ti ã wahachʉ, sã, mʉ wiorina, tuhsʉ, mʉ yaina wahachʉ mʉ yoarina sehe ti ya yahpari cahai yʉhdʉ wahcãnahca. Sã ã yʉhdʉ wahcãchʉ, tina sehe tãca mʉnánoi to coãno yoaro seheta sãre ne soro yoasi.

Joná 2:2

—Yʉ Cohamacʉ Yawe, mʉhʉ sehe dohoria macainare cʉãri ma wʉrʉpʉ yʉhʉre doca ñonoca dutihre. Mʉ dutiro mehne yʉhʉre ti ã doca ñori baharo, ñano yʉhdʉhi yʉhʉ. Ahri ma wʉrʉre ne dohse yoa yʉhdʉ witi masierahi yʉhʉ. Diapʉ yʉ pahsachʉ, bʉjʉa pahcõri wʉri yʉhʉre doca wahã sʉ mʉjahre. Yʉhʉre ã waharo wato, yʉhʉ sehe õ sehe ni tʉhotumahi: “Yʉhʉ Yawe mehne buhiri ti tuhsʉhti. Ã jiro tiro yʉhʉre ñʉ payoerara. To ã ñʉ payoerachʉ, yariaa wahai tai nica yʉhʉ. Ã yariacʉ, Cohamacʉ buhiri marieriro to ya wʉhʉ, Jerusalẽpʉ macari wʉhʉre ne pari turi ñʉsi” ni, tʉhotumahi. Ã yoa wahya yʉhdʉa waha, diha minia wahai yʉhʉ jʉna. Diha minia, dia topapʉ macaa tʉ̃ yucʉri dahpotopʉ diha caha sʉhi. Yʉ ã diha caha sʉchʉ, dia topapʉ macaa tja sehe yʉ dapupʉ suhriahre. Ã cʉãnopʉ jicʉ, õ sehe ni tʉhotumahi yʉhʉ: “Mipʉ pinihta yʉhʉre tó puro tjica. Yʉ yʉhdʉ witiboro mariahna. Yajeripohna duhua wahai taipʉ nica yʉhʉ” ni, tʉhotumahi. Ã ni tʉhotuihta, mʉhʉ cʉ̃hʉre wacũ batoahi yʉhʉ. Ã jicʉ sañurucuro mehne mʉ yoadohoa sini batoahi yʉhʉ. Yʉ ã sini batoachʉ, yʉ mʉhʉre siniri sehe mʉ cahapʉ sʉ mʉano yoaro sehe wahari jire, mʉhʉ buhiri marieriro ya wʉhʉpʉ mʉ jiro wato. Ã jicʉ mʉhʉ Yawe yʉ Cohamacʉ sehe yʉhʉre yʉ mini yariaborore yʉhdoi tai, wacũenoca ahriro wahi wʉrʉ yʉhʉre chʉnocachʉ yoahre.