1 Samue 13:2 - Wanano OT Portions

² Ã yoa cʉ̃ nʉmʉ Saulo to surara cjihtire besero taro, jipihtina to coyeare pji cahmachuha. Ti wihi pihtichʉ ñʉno, tres mil waro beseha tiro. To bese dʉhainare ti jia macaripʉta waroca tju pahñonocaha. Ã yoa to beserina sehere jʉna pʉa curua tju wa dapoha. Cʉ̃ curua macaina cjihtire dos mil waro tju wa dapoha. Pa curua macaina cjihti sehere mil waro tju wa dapoha. Ã yoa cʉ̃ curua macaina mil surara to tju warina sehere Gibeá wama tiri macapʉ to macʉno Jonatã mehne warocaha. To warocachʉ, Jonatã sehe tinare tí macapʉ sʉho naa wahaha. Sʉho na sʉ, tí macare tinare sʉho ñʉ cohtaa tiha tiro. Tí maca sehe Benjamí cjiro ya curua macaina ti jiri yahpapʉ jia tiha. Ã yoa pa curua, dos mil surara to tju warina sehere tiro Saulo to basita tinare Mima wama tiri macapʉ sʉho naa wahaha. Sʉho na sʉ, tí macare, tuhsʉ, tʉ̃ yucʉri payʉri dihtapʉ jiri maca Betel cʉ̃hʉre tinare sʉho ñʉ cohtaa tiha tiro cʉ̃hʉ.

1 Samue 13:2 Iomraidhean Croise

1 Samue 10:26

To ã coha tjuaa dutichʉ tʉhoro, Saulo cʉ̃hʉ to ya maca Gibeápʉ coha tjuaaro nia tiha. To ã coha tjuaachʉ ñʉno, Yawe sehe cãina mʉa cuiro maerainare ti tʉhotuapʉ noaa tʉhotua pja sʉchʉ yoaha. Ã jia tina cʉ̃hʉ Saulo mehne dahra dʉcaa taa, ji coaro mehne wahaa wahaha tiro mehne.

1 Samue 13:11

To sinino tachʉ, Samue sehe dói tirore sinitu ñʉ bahrañoha: —¿Dohse yoai ã yoari mʉhʉ? —ni sinitu ñʉha tirore. To ã ni sinitu ñʉchʉ tʉhoro, Saulo sehe õ sehe ni yʉhtiha: —“Yʉ masa cuiro mehne yʉhʉre cohã wahcã pihtia taapʉ nina” nicʉ, ã yoahti. Mʉhʉ cʉ̃hʉ “Taihtja” ni, mʉ yahu quihõri somanare dói cure wihierahre. Mʉ wihieraro wato, filisteo masa sehe yoato Mimapʉ wihi tarʉca tuhsʉhre.

1 Samue 13:5

à yoa filisteo masa surara cʉ̃hʉ tina mehne cahma wajãa taa, Mima wama tiri macapʉ wihi tarʉcʉ sʉ, tói cahmachurʉcʉ sʉa tiha tina cʉ̃hʉ. à cahmachurʉcʉ sʉa, padʉ pohcari yoaro sehe waro payʉ wihi tarʉcʉ sʉha tina. Cãina dahporo mehne wihiha. Paina tres mil bʉso, cawaloa wajaa bʉso, ti cahma wajãa bʉso mehne wihiha. à yoa tí bʉsopʉ wihiina surara sahserore ti quihõ ñʉchʉ, seis mil waro jiha. à yoa ti cahmachurʉcʉ sʉri maca Mima sehe Betavẽ wama tiri macai mari ñʉrocachʉ, sʉ̃ mʉja taro caha sehe tjuaa tiha.

1 Samue 8:11

Õ sehe ni yahu turiaha tiro tinare: —Mʉsa cahmariro rey mʉsare õ sehe yoahto jiyuhca. Cãina mʉsa pohna mʉare to surara cjihti tuaro mehne sõhto jiyuhca tiro. Ã yoa to surara sõhrinare tia curua tju wa dapohto jiyuhca. Cʉ̃ curuare ti cahma wajãa bʉso, cawaloa ti wajaa bʉsopʉ sã, cahma wajãhtina cjihti cũhto jiyuhca. Pa curuare to tunuria cawaloa ti wajaria mehne noho to waharoi to pano mʉroca mʉhta, ñʉ cohtahtina cjihti cũhto jiyuhca. Pa curuare to surara pʉhtoa cjihti cũhto jiyuhca. Ã cũno, cãinare mil surarare dutihtina pʉhtoa cjihti cũhto jiyuhca. Painare cincuenta surarare dutihtina pʉhtoa cjihti cũhto jiyuhca. ‘Ã yoa mʉsa pohna to surara sõ dʉharinare tjoa cãina bese namohto jiyuhca tiro. Ã besero, cãinare to cahma wajãa bʉso dojochʉ, ti cohtotahti cjihtire yoahtina cjihti cũhto jiyuhca. Painare to surara ti ya cahma wajã macaa wamoa cjihti dahrebasahtina cjihti cũhto jiyuhca. Painare toaare to toahti yahparire saha musiõbasahtina cjihti cũhto jiyuhca. Saha musio cũ tuhsʉ, tirore toabasahti jiyuhca tina. Ã yoa ti toari cjiri ti bʉcʉarʉcʉ sʉchʉ ñʉa, tinata tí dichare tirore nabasahti jiyuhca.