Lucas 8:21 - Biblia Yanowamö

²¹ Ö̦jö ma cui, abinaja Jesús a cuu mö feduoma. —Yai Bada etä a̦ ji̦liaöje däjä, tä a̦ juaö lä showadao wejei bä lä cui, ö̦jö iba nayä cäbä, iba mashi ö̦jö bä ca̦i li showawä —Jesús a cuma.

Lucas 8:21 Iomraidhean Croise

Mateo 17:5

A wa̦ faö showai ja, ölajashi a bada au fa itolunö, bä jo̦yablalema. Ö̦jö däjä, ölajashi jamö culanö a wa̦ bädaliyoma. —Ei Ijiluyä a, ya lä nofimaö wei. Wale bufi lä doblamabou wei a. A wa̦ da ji̦liläje —a cuma.

Mateo 25:40

’¿Ö̦jö tawä? —Jesús a cuma—. Ö̦jö lä däjä, Bada ya yai lä cui, abinaja ya nia cudou. “Cafä wamacö nija ei ya wa̦ lä cui, bejedi lä ya wa̦. Iba ai bä wai cua lä bädale bä ma cui, ö̦jö wama bä lä bayeliblaö wei däjä, jai camiyä wamale bayeliblama, bämacö nofi tabou showadaoma”, ya nia cudou.

Mateo 25:45

Ö̦jö däjä, abinaja ya bä nowa nia taö. “Cafä wamacö nija ei ya wa̦ lä cui, bejedi lä ya wa̦. Iba ai bä wai cua lä bädale bä ma cui, ö̦jö wama bä bayeliblaö lä mlaono wei däjä, jai camiyä wamale bayeliblanomi wamacö cuoma”, ya bä nowa nia taö.

Mateo 28:10

Ö̦jö däjä, abinaja Jesús e cuma. —Cäcöbö quilii dicoo dijä. Fääshäyä wafä bä nia yömölajalayou, Calilea jamö bä jufälöbä. Ö̦jamö lä wale nia möö co̦oje —e cuma.

Lucas 8:15

’A mashita lä dodijidai jamö ai mobä bläläa lä culayono weinaja, ai bä ma cuinö tä a̦ ji̦liaö cuwä mö feduweje —a cuma—. Ö̦jö bä lä dodijaö wei bä lä cuinö, bä bufi bejedimolanö tä a̦ ji̦liaö cuaaöje. Tä a̦ fa ji̦liajenö, tä a̦ nofi jaducubou dodijioje. Bä bufi yanöcölanö tä a̦ juadiije ja, etä yai dodijidawä cublaliyo.

Lucas 8:20

Jesús nija abinaja ai e cuma. —Naafä a ma cui, fääshäfä bä ma cui, bä ublaa siboa lä cubiyedi. Wa möö bufi doblaoje —a cuma.

Juan 13:17

¿Ö̦jö tawä? Bämacö lä yömölale tä ja, wamacö bufi fa jaducuicunö wamale a̦ juaö ja, wamacö bufi nia yai doblalou.

Juan 20:17

—Wale jubaö shi jalimou dicoo dijä —Jesúsnö a nowa tama—. Fayä a lä culadi jamö ya junomi showawä. Fääshäyä bä nija wale a̦fa yai da wäyädu. Fayä nijamö ya juu, cafä wamacönö wama a nofi Fö̦ömaö lä showale a lä cui nijamö. ¿Ö̦jö tawä? Yai Bada ya lä bufiblale a lä cui nija ya juu, wama a ca̦i bufiblaö mö lä feduo wei a nija —a nowa tama.

2 Corintios 5:16

Yanowamö täbänö täbä nofi lä tabou wejeinaja, fei däjä ya täbä nofi taboimi majöwä. Shädayai. Cristo a ma cui, a nofi tabou lä balöono wejeinaja camiyä ya ma cuinö ya nofi ca̦i jole tabou mö feduo balöoma. Inaja ya nofi jole tabou ma balöono wei ma cui, fei däjä inaja ya bufi cuimi.

2 Corintios 6:18

Camiyä wamale nofi nia ca̦i Fö̦ömaö. Inaja showawä, cafä wamacö lija ya nia ijilumou. Ijiluyä wamacö nia cuo, tääyä wamacö nia ca̦i cuo. Bada ya shi̦lo lofote lä ayai, inaja ya cuu waiquiwä. Einaja Bada a cuma.

Santiago 1:22

Ö̦jö ma cui, Yai Bada wama tä a̦ ji̦liaö bädao mlai ja, tä a̦ lä cuu weinaja wamacö yai cuaabä. Wama tä a̦ ji̦liaö bädao ja, wamacö nia mölaa bälayou.

1 Juan 2:29

Jesucristo wama a cadejewä daö waiquiwä ja lä, bufi wedinajamou mlai ja, Yai Bada bei ijilubö wama ebä nö nia ca̦i ö̦jöböaö. Bä cadejewä mö lä fedule bä lä cui, ö̦jö lä bei ebä waiquiwä.

3 Juan 1:11

Bäfä lä nofimale. Wa̦lidiwä tä lä taö wejei bä owäma dijä. Bä lä dodijaö wei bä shino yai da owäma. Bä lä dodijaö wei bä lä cui, ö̦jö Yai Bada bei ebä li waiquiwä. Bä doblou lä mlai bä lä cuinö, Yai Bada tä daimije.