Lucas 7:6 - Biblia Yanowamö

⁶ Ö̦jö bä nija Jesús a nocaa showalayofälöma. Ö̦jö ma cui, Lomateli bada e yafi jamö a ajedoimaö ja, cama nofi ebä shömöa mö baquema, a wa̦no wäyäbeje. Abinaja Jesús a nowa tamaje. —Bada tä. Sodado bä ca̦i lä cule yama a wa̦no taö. Wa yabäcaö bufiomi. Wa nö jo̦wa yafimabimi. A quilii. “Wale bayeliblabä yami”, a bufi cuu. Judio a malä mlai.

Lucas 7:6 Iomraidhean Croise

Génesis 32:10

Showadi wale nofimabä, ya ma mlai ma cui, showadi wale bayeliblabä, ya ma mlai ma cui, wa wa̦ cadidoma. Cafä wa nosie juamobä ya lä cui, showadi wale bayeliblaö fe yadioma, wa wa̦ nö wäo ja, wa lä cuno weinaja showawä. Ei Jodana u jamö, ya yami jaba lä bucaduqueno wei däjä, fii ya defi shino malä bono wei. Fei däjä yamacö bluca. Bolacabö yamacö cuo mö feduobä, iba ya bä malä sheleleblamalöfe —Jacobo a cuma.

Mateo 20:28

camiyä ya lä cuaaö weinaja showawä. Camiyä ya lä yanowamöblaleyoluno wei ya ma cui, ya nosiemobä ya junomi. Ya bä yai bayeliblabä, ya li waloqueyoluma. Yanowamö ai ya bä nowa ca̦i bluca co̦amabä, ya jöböamou mö juma —bä nowa tama.

Mateo 3:11

Abinaja Juan a cuma. —Camiyänö bämacö fe ojoblaö däjä, mau u ja bämacö jödödöblamaö, wa̦lidiwä tä ja wamacö bufi lädou dablamobä. Inaja camiyä ya cuaaö ma balöo wei ma cui, camiyä ya nodi jamö, a nö yai lä wa̦lojaö wei a nia waloo nomöjöoyoluu. Ö̦jö a shino yai doblaa ayaa cudeenö, ya bayeliblaö bädaobä tä ma cui ja, ya nö quilibö wei. Bei mamicö lä didio wei ecö bädawä ma cui, ya etäbä nö yefibou quilibö wei. Ö̦jö a lä cuinö, bejedi lä wamacö nia yai jödödöblaö. Mau unö mlai, Yai Bada a Bufinö wamacö nia jödödöblaö. Cowa wacönö täbä ca̦i nia jödödöblaö.

Marcos 5:24

Jailo nija Jesús a nocaa showalayofälöma. Täbä bluca lä co̦camono wei bä mashicou fa dodijionö, a juu cuaabä jamö a bacäjamamaje.

Lucas 5:8

Simón Pedro a lä cuinö, yuli bä bluca lä ya̦calöfe tä fa dalalönö, Jesús cotä jamö a quilili diyäliquema. A fa diyäliicunö, e a̦ fama. —Bada tä. Camiyä nija a ajedo dijä. Ya doblou malä mlai —a cuma.

Lucas 7:4

Jesús nija judio bada bä fa waloicunö, a nacablalamaje. Bä a̦ fe blacäjou ja, abinaja bä cuma. —Ö̦jö lä a bada lä cui, wa bayeliblabä a waiquiwä. A dodijaö. ¿Ö̦jö tawä?

Lucas 7:5

Judio bämalecö malä nofimaö wei. Yamacö yododabä a yafi tablalema —bä cuma.

Lucas 7:7

Ö̦jö cudeenö, cama a icuo showadao mlai, camiyä yamalecö shömöa lälema. Eja culanö ma cui, wa wa̦ blajawä famaö bufii, a nosie juamobä a lä cui, a jalou showadaobä.

Lucas 8:49

A wa̦ faö showao däjä, bada e yafi jamö ai e cuo lä jäono wei e waloa mö baquema. Jailo a bada nija abinaja a cuma. —Bei. Inaja lä waiquiwä. Tääfä a waicou waiquio cublei. Tä a̦ lä wäyäö wei a yabäcaö fe blacäjo dijä —a cuma.

Hechos 10:38

Ö̦jö Nasaleteli Jesús a lä cui, Yai Bada tänö a bayelibou ja, bei Bufinö a jödödöboma. A nö ca̦i wa̦lojomaboma. ¿Ö̦jö tawä? Täbä shino bayeliblaö cuaama. Fecula bada tänö bä nö lä bleaamano wei, bä bluca ca̦i jalomaö cuaama. Yai Bada tänö a ca̦i malä cuono wei.

Santiago 4:10

Yai Bada nija wamacö jömöo mlai, bä a̦fa shino dobloimi da wäyämo. Ö̦jö däjä, dodijidawä wamacö nia taamabou fe yadio.

Santiago 4:6

Ö̦jö ma cui, Yai Bada tänö bämalecö nofi yai ojodabou lä dodijio wei etä wawäblou talei. Ö̦jö cudeenö abinaja tä a̦ ca̦i cuu. Cama bä lä jömöo wei bä lä cui nija Yai Bada a wa̦ Bufi lämou. Ö̦jö ma cui, bä jömöo lä mlai bä lä cui bä nofi yai ojodabou.