Lucas 10:16 - Biblia Yanowamö

¹⁶ Ö̦jö däjä, abinaja Jesús a cuma, cama ebä lä nocamabono wei bä nija. —Cafä wamacö a̦ ji̦liaöje ja, camiyä ma cui wale a̦ ji̦liaö mö feduoje. Wamacö a̦ waii dicooje ja, camiyä ma cui wale a̦ waii mö feduoje. Inaja showawä, camiyä wale a̦ lä waii wejei bä lä cuinö, wale lä shömöleno wei a ma cui, ö̦jö a wa̦ waii mö feduoje —a cuma.

Lucas 10:16 Iomraidhean Croise

Éxodo 16:7

’Jeobaa wama a wa̦fa da tablei, wamacö a̦ ji̦lilema. Ö̦jö cudeenö, fena ja Jeobaa wama tä shi̦i nia dablaö fenao. Camiyä yafäcö nija wamacö a̦ ma fano wei ma cui, cama nija wamacö yai jushuoma. Camiyä yafäcö nija wamacö jölabä tä malä mlai. Jeobaa cama yafä a wa̦no yai wäyäö mada cublei —bä nowa taböma.

Éxodo 16:8

Abinaja Moisesi a cuu co̦oma. —Yalo bä ja, wamacö nia weyade lä dobäö wei, Jeobaa a. Nii bä ja wamacö nia bädömaö lä fenao wei a lä cui, ö̦jö a showawä. Wama a wa̦fa da tablei, wamacö a̦ malä ji̦lileno wei. ¿Ö̦jö tawä? Camiyä yafäcö nija wamacö a̦ ma fano wei ma cui, cama Jeobaa nija wamacö yai jushuoma —bä nowa tama.

Números 14:11

Moisesi nija abinaja Jeobaa a cuma. —Uo. ¿Fei bänö wale nofi wa̦libou shi wa̦lii waiquiweje daanö? Wale nö lojode ö̦jöböabeje, cama bä nija ya nö bluca ma quiliano wei ma cui, ¿wale a̦ bejedi bufiimi shi wa̦lii waiquiweje tawä?

Números 14:2

Ö̦jö däjä, Isaeli ebä a̦ bufi bluca jushujuwä ca̦i fama, Moisesi, Aaloni cäcöbö nija. Abinaja bä bluca cuma. —Ejido jamö yamacö nomaö showadao fa cunoja, tä nö doblaobö wei. Ei tä ulifi lä blocole jamö ma cui, bämacö nomablou showadao fa cunoja, tä nö doblaobö wei.

Números 16:11

Cafänö wa bä ca̦i bluca lä cule wamacö lä cuinö, Aaloni mlai, Jeobaa wama a nabä yai toujou lä cule. Wamacö bluca nia cuaaö shelelou mö lä feduo wei, Aaloninö tä nabä li shömöanomi. Cama nija wamacö a̦ bufi jushujuwä ca̦i fabä ami —Moisesi a cuma.

Mateo 10:40

Abinaja Jesús a cuma. —Cafä dodijidawä wamacö co̦blamaöje ja, camiyä ma cui wale dodijidawä co̦blamaö mö feduoje. Inaja showawä, dodijidawä wale lä co̦blamaö wejei bä lä cuinö, wale lä shömöleno wei a ma cui, ö̦jö a ca̦i dodijidawä co̦blamaö mö feduoje.

Mateo 18:5

’Ei a lä culenaja a wai ijilu lä cui, a shomi ma cui, camiyä ya wa̦nö a wai nofimaö fe yadioje ja, camiyä ma cui wale nofimaö mö feduoje —a cuma—.

Marcos 9:37

—Ei a lä culenaja a wai ijilu lä cui, a shomi ma cui, camiyä ya wa̦nö a wai nofimaö fe yadioje ja, camiyä ma cui wale nofimaö mö feduoje. Inaja showawä, camiyä wale nofimaöje ja, wale lä shömöleno wei a ma cui, ö̦jö a nofimaö mö feduo showaoje —bä nowa tama.

Lucas 9:48

Ö̦jö däjä, abinaja bä nowa tama. —Ei ijilu a lä cui, a shomi ma cui, camiyä ya wa̦nö a wai nofimaö fe yadioje ja, camiyä ma cui wale nofimaö mö feduoje. Inaja showawä, camiyä wale nofimaöje ja, wale lä shömöleno wei a ma cui, ö̦jö a nofimaö mö feduo showaoje. ¿Ö̦jö tawä? Cafä wamacö nijamö a jömöo lä mlai a lä cui, a nofi bada tabou lä mlajei, ö̦jö a lä cui, Yai Bada tänö bada bei a nofi shino yai tabou.

Juan 12:44

Jesús a wa̦ i̦cali faö ja, abinaja a cuma. —Wale a̦ bejedi lä bufii wejei bä lä cuinö, camiyä wale a̦ bufii ayaomije. Wale lä shömöleno wei a ma cui, ö̦jö lä a wa̦ bejedi ca̦i bufii showaweje.

Juan 12:48

Wale lä waii wejei, wale a̦ juaö lä mlajei bä lä cui, obi bä nia yai jömamou. Tä lä jödödöblole däjä, wale a̦ lä waileno wejei ya wa̦ showawänö, bä nia jömamou.

Juan 13:20

’Cafä wamacö nija ei ya wa̦ lä cui, bejedi lä ya wa̦. Ya bä lä shömaö wei bä lä cui, dodijidawä bä co̦blamaöje ja, camiyä ma cui wale dodijidawä co̦blamaö mö feduoje. Inaja showawä, camiyä dodijidawä wale lä co̦blamaö wejei bä lä cuinö, wale lä shömöleno wei a ma cui, ö̦jö a dodijidawä co̦blamaö mö feduoje —a cuma.

Hechos 5:4

’Wa täca jöböaö showao mlao däjä, afä täca cadidiwä cuoma. Wa täca fa jöböcönö, ö̦jö täca nowa ja wa bä blada lä däleno wei, afä bä ca̦i blada cuo showaoma. Wa bä jöböaö bufi doblao ja, wa bä jöböabä bä li cuoma. Wa bä noshi umabou bufi doblao ja, wa bä noshi ca̦i umabobä. Einaja tä yai ma cuono wei ma cui, ¿wedi tä tabä, jai wa bä comi jöböquema bei wa wa̦ li cuaaö dicooma? Yanowamö yamacö nija wa jolemonomi. Yai Bada nija wa yai jolemoa dicolayoma —Pedronö a nowa tama.

Gálatas 4:14

Wamale jalili bayeliblaö ja, wamacö nö bleaablaloma ma cui wamale nö waiblanomi. Ma, wamale nofi wa̦libou mlai ja, Yai Bada a̦jele wama etä dodijidawä bälömabou nö lä cuobö weinaja, inaja showawä camiyä lija wamacö ca̦i cuaama. Jesucristo wama a nofi nö lä tabobö weinaja showawä.

1 Tesalonicenses 4:8

¿Ö̦jö tawä? Ei tä a̦ ja yamalecö a̦ ji̦liblaö lä mlai, camiyä yamalecö a̦ ji̦liblaimi bädawä mlai, Yai Bada wama a wa̦ yai ji̦liblaimi. Cafä wamacö lija a Bufi lä jibäamou wei wama a wa̦ li waii.