Levítico 2:2 - Biblia Yanowamö

² Nofi bäyäalewä bä nija si cobejewä ji̦bä yai lä dodijidai ji̦bä nia ca̦i juu, Aaloni nodiwä ebä nija. ’Ö̦jö däjä, dabö dabö ubänö ji̦bä fe lä liyäyano wei ji̦bä ja, nofi bäyäalewä anö moli ji̦bä nia maoaö, täbä wa̦queshi nö cle̦deli lä u̦cucamou wei täbä shuu befi ca̦i —a cuma—. Wale dobäö bufi lä doblao wei ya tä nofi tabobä, ö̦jö moli ji̦bä lä maoamou wei, yalo bä lä dodoblamou wei bä maqueblamobä täcö jamö, ji̦bä nia ö̦shömaö. Cowa wacö ja ji̦bä nia ö̦shömaö. Ji̦bä ö̦shö dodobobeje ji̦bä. Camiyä Jeobaa yanö, ö̦jö ya tä nö fa u̦cucalänö, “Tä dodijidawä”, ya tä nofi nia tabou.

Levítico 2:2 Iomraidhean Croise

Levítico 1:13

Ö̦jö ma cui, yalo a ca̦i lä juu wei a lä cuinö, bei shicö nia yaluu, bei matabä ca̦i. Ö̦jö däjä, camiyä nija nofi bäyäalewänö yalo comi bä nia dodobou. Yalo bä maqueblamobä täcö jamö a nia ö̦shömaö. Cowa wacö ja bä nia ö̦shömaö. Bä ö̦shö dodobobeje cäbä. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

Levítico 1:17

’Bei falolabö juwäbolanö, a nia yalo cacablaö ma cui a nia cacablaö showadaomi —a cuma—. Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä anö yalo a nia ö̦shömaö. Cowa wacöbä jamö a̦shobä lä maqueo wei a̦shobä ja, yalo a nia maqueaö feyacao. Cowa wacö ja a nia ö̦shömaö. A ö̦shö dodobobeje a. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

Levítico 1:9

’Ö̦jö ma cui, yalo a ca̦i lä juu wei a lä cuinö, bei shicö nia yaluu, bei matabä ca̦i —a cuma—. Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä anö yalo comi bä nia ö̦shömaö. Cowa wacö ja bä nia ö̦shömaö. Bä ö̦shö dodobobeje cäbä. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

Levítico 2:16

Ö̦jö däjä, wale dobäö bufi lä doblao wei ya tä nofi tabobä, wa mobä lä dodobou wei mobä ja, nofi bäyäalewänö ai mobä nia mashi ö̦shömaö. ¿Ö̦jö tawä? Dabö dabö ubänö, dicama mobä fe lä liyäyano wei mobä nia ö̦shömaö, täbä wa̦queshi nö cle̦deli lä u̦cucamou wei täbä shuu befi ca̦i. Cowa wacö ja mobä nia ö̦shömaö. Camiyä Jeobaa ya nija mobä ö̦shö dodobobeje mobä.

Levítico 2:9

’Ö̦jö däjä, lo̦shi mobä ja, nii wa ji̦bä lä dodobou wei ji̦bä ja, nofi bäyäalewä anö ai ji̦bä mashi nia däaö —a cuma—. Wale dobäö bufi lä doblao wei ya tä nofi tabobä, ö̦jö ji̦bä mashi lä däamou wei, yalo bä maqueblamobä täcö jamö ji̦bä nia ö̦shömaö. Cowa wacö ja ji̦bä nia ö̦shömaö. Ji̦bä dodobobeje ji̦bä. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

Levítico 4:31

’¿Ö̦jö tawä? —a cuma—. Ö̦jö däjä, bei dabö bä nia comi däaö, Jeobaa wale a̦ oquemabobeje bä yalo lä shämou wei bei dabö bä comi lä däaö wejeinaja showawä. Yalo bä maqueblamobä täcö jamö, nofi bäyäalewänö bä nia dabö dabö ö̦shömaö. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya nofi tabobä. Ö̦jö ya etä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö.

Levítico 5:11

’Ö̦jö ma cui, joledo cäcöbö luluabä etä cuami ja, wacocoa calaba cäcöbö luluabä etä cuami ja, abinaja a nia cuaaö —a cuma—. A doblono lä mlai etä nowa wa̦lidiwä mladobä, lo̦shi mobä fa washishanö, ji̦bä si nia cobejeblaö. Jaboca blowäjäjäwä a ja, si cobejewä ji̦bä fe fa lajoblamalönö, ji̦bä nia ca̦i juimaö. Dabö dabö ubänö ji̦bä fe nia liyäyaimi. Täbä wa̦queshi nö cle̦deli lä u̦cucamou wei täbä shuu möcashi nia ca̦i jushishaimi. Wa̦lidiwä tä nowa mladobä ji̦bä malä cui —Jeobaa a cuma.

Levítico 5:12

’Nofi bäyäalewä nija ji̦bä ca̦i fa junö, ö̦jönö moli ji̦bä nia maoaö —a cuma—. Wale dobäö bufi lä doblao wei ya tä nofi tabobä, ö̦jö moli ji̦bä lä maoamou wei, yalo bä lä dodoblamou wei bä maqueblamobä täcö jamö, ji̦bä nia ö̦shömaö yädämou. ¿Ö̦jö tawä? Wa̦lidiwä tä nowa mladobä ji̦bä.

Hechos 10:4

Yai Bada tä a̦jele nija a mamo quilili showalanö, a wa̦ juoma. —¿Wedi cätä, Bada tä? Abinaja a̦jele e cuma. —Showadi Yai Bada nija wa nö bayeli lä nacao wei tä a̦ ji̦limou culadi. Bä lä jo̦li wei, wa bä showadi lä dobäö wei, ö̦jö tä ca̦i dablamodayou. Yai Bada tänö cafä wa nofi jaducubou.