Jueces 2:1 - Biblia Yanowamö

¹ Jicala jamö Jeobaa etä a̦jele culanö, Boquimi jamö a damoa majölaledayoma. Isaeli ebä lija abenaja a cuma. —Ejido jamö bämacö fa co̦länö, eja bämacö bälöa lämaqueyoluma. Wamacö nö badabö lija ya wa̦ nö wäo ja, ya tä a̦fa ulufi wäyäö lä balöono wei jamö showadawä. Ya bä nowa taö ja, abenaja ya e cuma. “Ei ya wa̦ nö lä wäole, obi ma cui, ya wa̦ nia shomiblou majöomi”, ya e cuma.

Jueces 2:1 Iomraidhean Croise

Génesis 12:7

Ö̦jamö lä Ablamö nija Jeobaa a fa damolalunö, a wa̦ fama. —Cafä nija bä nia lä nodiblou wei bä lä cui nija, ei ya tä ulifi nia jöböaö —a nowa tama. Cama nija Jeobaa a damolaliyoma cudeenö, ö̦jamö lä showawä, bä yalo maqueblamobä täcö i̦taquema, Jeobaa nija bä yalo dodobobä.

Génesis 16:13

Jeobaa e a̦ a̦jele ji̦lilema yalo, Acala a wa̦ bädaliyoma. —¡Joo yai! Yai Bada bei ya etä a̦jele ma dalalöfe, ¡ya nofi demi lä showai! —a cuma. Inaja Acala a cuma yalo, Täbä lä dablaö wei a dodijiwä, Yai Bada a wa̦fa jilaa showadaquema, a wa̦ lä wayomano wei a lä cui.

Génesis 48:16

Ö̦jö Jeobaa etä a̦jele lä cuinö, wa̦lidiwä tä bluca lä cuono wei tä ja, showadi wale nowamaö cudeenö, wale bayelibou showaa lä cule. Ö̦jö Yai Bada nija, ei cäcöbö ijilu lä cui cäcöbö fa bayeliblamonö, cäcöbö bayeliobä. “Jacobo nija cäcöbö nodiblaliyoma cäcöbö”, cäcöbö nofi tabou juobeje. Fayä Isaacö a ma cui, a̦iwä Ablaamö a ma cui, “Ö̦jö lä ecöbö nodiwä yai”, cäcöbö nofi tabobeje. Cäcöbö fa balalönö, bei ijilubö ebä nodiwä ca̦i blucablou mö feduo showaobä —a cuma.

Éxodo 14:14

Cafä wamacö ishou mlai, Jeobaa a nia ishou baläläo. Cafä wamacö lä cui, yanöcöwä wamacö cuobä, ö̦jö lä —bä nowa tama.

Éxodo 14:19

Ö̦jö däjä, Yai Bada etä a̦jele lä cui, Isaeli ebä lä toujono wei bä nija tä juu lä balöano wei tä lä cui, a nojablou nomöjölayoma. Ölajashi a bada comadiwä lä cui, a juu lä balöano wei a lä cui, a nojablou fa majölonö, bä balalubou nomöjöoma.

Éxodo 20:2

—Cafä wamacö nija ya bufiblamobä, camiyä bei ya Jeobaa. Ejido jamö wamacö nö lä bleaamano wejei däjä, bämacö lä co̦leno wei, ö̦jö ya.

Éxodo 33:14

—Ja̦o —Jeobaa a cuma— Camiyänö bäfä ca̦i juu weicätä. Bäfä bufi ca̦i yanöcömabofälöö weicätä —a cuma.

Números 14:34

Tä ulifi bomaöje däjä, 40 tä mö didi lä tablamaleno wejeinaja, inaja showawä bä nö bleaaö showai däjä, lasha 40 a nia famaö cuoje. ¿Ö̦jö tawä? Täbä mö didi lä tablamaleno wejeinaja, lasha ya nia famaö cuo. Lasha 40 a famaö mlao showaoje däjä, bä doblou lä mlaono wei tä nowa ja, bä nö nia bleaaö. ’Ya nö lä yuo wei tä nia dablaöje —a cuma—. Inaja wafä bä nowa ta.

Josué 3:10

Ö̦jö däjä, abenaja Josué a cuma. —Jeobaa a demi cua shi lä wa̦lilenö bämalecö ca̦i cua lä cule. Camiyä bämacö fubä jamö Canaanateli bä ma cui, idida bä ma cui, ebeo bä ma cui, feleseo bä ma cui, jejeseo bä ma cui, amoleo bä ma cui, jebuseo bä ma cui, ö̦jö bä nia bluca yashublaö baläläo. Tä taö dodijio wä. ¿Ö̦jö tawä? Ö̦jö wama tä a̦ nofi bejedi tabobä, abenaja a nia cuaaö.

Jueces 11:24

Afä tä lä cuinö, Quemosi wama tä nofi lä mölabolenö wamacö dobäö ja, ¿wama a nofi nia taboimi daanö? Inaja showawä, Jeobaa yama tä lä bufiblalenö yamalecö dobäö ja, yama tä nofi nia tabou lä. Yamalecö bälömabou nomöjöobä bä yashublaö ja, yamacö nia yai bälöo.

Jueces 13:2

Bei. Solateli a wa̦fa Manoa cuoma. Dani nodiwä e cuoma. Bä suwäbö e shibönabödalou fa mlacunö, moli ma cui a ijilubö cuonomi.

Jueces 13:3

Ö̦jö a suwä lija Jeobaa etä a̦jele fa wawälönö, abenaja a nowa suwä tama. —Bei. Wa shibönabödalou fa mlacunö, wa ijilubö cua ma mlai, wa nia shibönabölayou. Ijilufä wa nia tabou.

Jueces 2:5

Bä ö̦cöblaama cudeenö, Boquimi tä ulufi a̦fa jilaquemaje. Jeobaa lija ö̦jamö yalo bä dodobomaje.

Jueces 6:8

Jeobaa a wa̦no wäyälewä a shimölema, Isaeli ebä lija. Abenaja a cuma. —Jeobaa ya wa̦no taö lä cule, Isaeli bäma ecö lija a bufiblamobä a lä cui. Ejido jamö bämalecö co̦lema. Bämalecö nö lä bleaamano wejei jamö culanö, bämalecö luluboimama.