Juan 9:5 - Biblia Yanowamö

⁵ Eja, ei ya cua lä showale däjä, yanowamö ya täbä wacacamabobä ya shi̦i —bä nowa tama.

Juan 9:5 Iomraidhean Croise

Mateo 4:16

Ö̦jamö lä bä lä bälöle bänö, bä bufi nia lä wacacao wei tä shi̦i bada dalalemaje. Tä mö dödöobä jamö bä ma cuono wei ma cui, bä nö bleaaö shi wa̦libä bä ca̦i ma cuono wei ma cui, ö̦jö bä nijamö tä shi̦i ca̦i co̦blaliyoma. Einaja tä a̦ cuu.

Mateo 5:14

Abinaja Jesús e cuma. —Bita jamö täbä bluca lä bälöblai wama täbä wacacamabobä wamacö shi̦i, Yai Bada nija bä cadidofälöbä. ¿Ö̦jö tawä? Jefu tä bololo jamö a shabono cuo ja, a nia jo̦yao malä mlai. Inaja showawä, iba wamacö nia wawädowä lä dablamou wei wamacö.

Lucas 2:32

Judio bä lä mlai bä bufi jaducublobä, etä shi̦i nia wacacablou. Isaeli nodiwä, fei däjä yamacö nofi nia yai doablamou —Simeoni a cuma.

Juan 12:46

Cowa wacö shi̦i lä culenaja ya shi̦i cuobä, bita jamö ya waloqueyoluma, wale a̦ bejedi lä bufii wejei bä bluca lä cui, tä mö didiobä jamö bä shi wa̦lio mlaobä.

Juan 8:12

Judio bä nija Jesús a wa̦ faö co̦o ja, abinaja a cuma. —Yanowamö ya täbä wacacamabobä, camiyä ei ya shi̦i. Camiyä nija bä lä nocao wei bä lä cui, mö didi jamö bä nia juimi. Camiyä ya shi̦i wacacaobä jamö bä cuo ja, ba̦limi bä nia cuo —a cuma.

Hechos 13:47

Bada tänö yamalecö nosiemaö ja, abinaja tä a̦ malä cuu wei. Bämacö yaia waiquilema. Judio bä lä mlai bä nijamö, jai shi̦i jilajawä wama ecö nia cuo, bä bufi möblobä. Bä bälöo lä jödödole jamö ma cui, bä jucäamobä wama tä a̦ wäyäö cuaabä. ’¿Ö̦jö tawä? —Pablo a cuma—. Einaja tä a̦ cuu.

Hechos 26:18

Wa bä bufi möblamabä bäfä nia shömaö, bä mö jamoliblobä. Tä mö lä didi wei jamö bä ma cule ma cui, tä shi̦i lä wacacai jamö bä mö shino yaiblou nomöjöobä. Fecula bada tänö bä ma lojodobou däjä, ö̦jö tä fa dacöjenö, camiyä Yai Bada nija bä mö cublou nomöjöobä. Bä doblou lä mlai tä bluca ma cule, tä nowa mladobä. Camiyä wale nofi lä mölabou wejei tänö, iba bä lä yaile bä nija bä yädäblobä”, camiyä nija Bada tä cuma. ¿Ö̦jö tawä? —Pablo a cuma.

Hechos 26:23

Yai Bada tänö a shömabä a lä yaileno wei a wa̦fa wäyäö balöoje ja, a nö nia jo̦wa bleaamamaje. A fa shäblamonö, ba̦limi a nia demi jocädou co̦oma. ¿Ö̦jö tawä? Ai bä ba̦limiblou balöa mlai ja, cama a nia shino demi jocädou balöoma. A demi jocädou lä co̦ono wei tänö, Yai Bada tä shi̦i a̦fa nia wäyämou blaucoma, judio bä ma cui, judio bä lä mlai bä ma cui, bä bufi bluca jaducublobä —a cuma.

Efesios 5:14

Ö̦jö cudeenö abenaja tä a̦ oni cuu. Wa lä mile, ¡a da la̦lö! Nomawä wa lä blale, ¡a da jocäblalu! Ö̦jö däjä Cristonö wamacö bufi nia yai wacacamabou. Einaja tä a̦ oni cuu.

Apocalipsis 21:23

Ö̦jamö bä lä bälöle bänö, motoca a nia bufijaimije. Belibo a ma cui, inaja showawä. Yai Bada tä shi̦inö tä bluca wacacamabou malä waiquii. Oweja a wa̦fa ocalo lä jilamou wei a lä cui, cowa wacöbä shi̦i cublamobä tä lä culenaja a ca̦i cua malä waiquii.