Juan 8:19 - Biblia Yanowamö

¹⁹ Inaja a cuma yalo, abinaja bä cuu nomöjöoma. —¿Wedi jamö Faafä bei a, ö̦jö lä? Abinaja Jesúsnö bä nowa tama. —Fayä wama a daimi waiquiwä. Camiyä wamale ca̦i daimi. Camiyä wamale daö fa cunoja, Fayä a ma cui, wama a nö ca̦i daö mö feduobö wei—bä nowa tama.

Juan 8:19 Iomraidhean Croise

Mateo 11:25

Ö̦jö däjä, abinaja Jesús a cuma, Yai Bada nija. —Fabe. Fedu jamö ma cui, bita jamö ma cui, cafä lä wa shino Bada cua ayaa. Ei ya tä a̦ lä wäyäfe, bä bufi a̦fa moyawä lä taö wejei bä nija wa tä a̦ nofi mojodumabou. Bä bufi a̦fa dao lä taö wejei bä ma cui nija, inaja showawä. Inaja ö̦jö wa bä ma taamabou däjä ma cui, jai ijilu täbä lä cule bä nija wa tä a̦ yai wawäblamalema.

Juan 1:10

Bei Tä a̦, a wa̦fa lä jilou wei a lä cui, bita jamö a waloqueyoluma. Cama a wa̦nö täbä bluca ma tablamolayono wei ma cui, a nö ö̦jöböanomije.

Juan 1:18

Yanowamö bämacö nija Yai Bada tä dablamoimi. Tä dablamou ma mlai ma cui, bä Ijilubö moli e lä cuinö, bä Fö̦ö e nija a lä ajedelenö, ö̦jönö tä damalalema.

Juan 15:21

Ö̦jö ma cui, wale lä shömöleno wei a daimije yalo, iba wamacö cudeenö wamacö nia inaja taamaö dodijioje.

Juan 16:3

Camiyä wale daimije yalo, Fayä a ca̦i daimije cudeenö, bä nia inaja cuaaö.

Juan 17:3

Cafä Yai Bada wa bejedi cua lä ayale wa daöje ja, camiyä Jesucristo wale lä shömöleno wei wale ca̦i daö mö feduoje ja, ö̦jö tänö bä nia ba̦limi cuo.

Juan 7:28

Inaja bä cuma yalo, Yai Bada etä yafi jamö Jesúsnö bä damaö ja, a wa̦ i̦cali fama. Abinaja a cuma. —¿Camiyä wamale daö da culanö? Camiyä ma cui, ya jaba lä cuono wei jamö wama tä daimi. Ö̦jö ma cui, camiyä ya juu bufi doblao tänö ya juu bädaonomi. Wale lä shömöleno wei a lä cui a bejedimou. Ö̦jö wama a ca̦i daimi.

1 Corintios 15:34

Bä bufi da jaducäicu. Wa̦lidiwä wama tä taö dicoo mlai. “Yai Bada ya daö”, wamacö cuu ma cui, ai wamacö bejedimou malä mlai. Wamacö shädayaimobä ya wa̦.

Gálatas 4:9

Ö̦jö ma cui fei däjä Yai Bada wama a daö. Ma, camanö cafä wamacö li yai daö. ¿Ö̦jö tawä? Ö̦jö wama a daö ma waiquile ma cui, ¿fecula wama bä nia bufijaö co̦o daanö? Ö̦jö bä ujudi. Ö̦jö bänö täbä bayeliblamoimi. Ö̦jö bä lija wamacö jaba nosiemamou nö ma bleaano wei ma cui, ¿wamacö nia jibäamou mö yabao co̦o dicoo daanö?

Efesios 1:17

Fayä a lä doblaladi lija ya nacou, Bada tä Jesucristo lija a lä bufiblamou wei a lä cui. Wamacö bufi jaducämabobä ya wa̦ faö. Yai Bada wama a jaba lä dale, wama a yai daö balafälöbä.

Colosenses 1:10

Dodijidawä wamacö cuobä ya wa̦ faö. Bada tä Jesucristo bäma ecö lä cui, dodijidawä bämacö cuobä bäma ecö waiquiwä malä cui, Jesucristo bäma a bufi yai doblamabobä. Wamacö lä bayeliblayou wei tä lä cui, ö̦jö wama tä shi̦lo yai balamabä yamacö a̦ ca̦i faö. Yai Bada tä lä cui, wama tä ca̦i daö cadidiobä.

Colosenses 1:15

Bei bämacö mamocu yainö Yai Bada bäma a dablaö ma mlai ma cui, cama a lä owäbole a damalalema, bä Ijilubö e lä cui. Yai Bada tänö täbä jödödöwä lä tablaleno wei täbä ja, bä Ijilubö e Bada läa.

Hebreos 1:3

Yai Bada bä Ijilubö e lä cuinö, bä Fö̦ö e doblao damalalema. Yai Bada a cuwä lä dodijiinaja, inaja showawä bä Ijilubö e cuwä mö feduwä. Cama a wa̦ lofotenö, jödödöwä tä fuwäbou showaa lä cule. ¿Ö̦jö tawä? Yanowamö täbä doblou lä mlai täbä bufi aublobä tä tama. Ö̦jö däjä, Yai Bada tä nö shi̦lo wa̦lojaö lä ayai tä lä dicäladi jamö, a dicäquedayoma. Yai Bada jayu boco mashi jamö a dicäquedayoma.

1 Juan 2:23

Yai Bada bei Ijilubö e lä waii wejei bä lä cuinö, bä Fö̦ö e ma cui e taboimije. “Ö̦jö lä a waiquiwä”, Jesús a nofi tabolajenö, a nofi lä mölabou wejei bä lä cuinö, Jesús, bä Fö̦ö sho cäcöbä tabou bolacaaje.

1 Juan 5:20

Yai Bada a lä cui, ö̦jö a shino yai bejedimou. Ö̦jö bäma a dabä, bei Ijilubö e fa itoliyonö bämalecö bufi jaducumabou lä cule. Bä Ijilubö Jesucristo nija bämacö cua lä cule, a yai lä bejedi wei a lä cui nija. A bufiblamobä ö̦jö a shino yai bejedi cua ayaa. Ba̦limi bämacö cuobä, ö̦jö a waiquiwä.

2 Juan 1:9

Jesucristonö tä a̦ lä wäyäno wei tä a̦ jamö, shomi tä a̦ coyocobou lä dicoo wejei bänö Yai Bada tä taboimije. Jesucristonö tä a̦ yai lä wäyäno wei tä a̦ jamö bä lä cadidou wei bä lä cuinö, bä Fö̦ö e ma cui, bä Ijilubö e ma cui, ö̦jö lä cäcöbö tabou bolacaaje.