Juan 8:15 - Biblia Yanowamö

¹⁵ ’Cafä wamacö lä cuinö, yanowamö showadi bä bufi lä cuaablalou weinaja, wamacö bufi fa cuaablalonö, wama täbä li jömaö. Camiyä ya lä cuinö ya täbä jömaimi.

Juan 8:15 Iomraidhean Croise

Lucas 12:14

Ö̦jö ma cui, abinaja Jesúsnö a nowa tama. —Cafä wafäcö nija faafä ya etäbä sheleleblaö juobä wale läamanomije. Dodijidawä wafä etäbä shelelebou juobä yami —a nowa tama.

Juan 12:47

’Ai bänö wale a̦ ma ji̦liaö wejei ma cui, wale a̦ nofi cadidiboimije ja, ö̦jö bä lä cui ya bä nia jömaö showadaomi. Yanowamö ya täbä jömaö showadaobä, bita jamö ya juno malä mlai. Ya täbä jucäabä, ya yai juma.

Juan 18:36

Abinaja Jesús e cuma. —Bita jamö ya bada läobä yami. Yanowamö täbä nija ya bada läobä ya cuo fa cunoja, wale a̦ lä juaö wejei bä lä cui bä nö ishobö wei, judio bä nija ya jöböamou mlaobä. Ma, bita jamö bä bada lä nosiemou weinaja, ya bada cuobä yami —e cuma.

Juan 3:17

Yai Bada tänö bita jamö bä Ijilubö wale lä shömöleno wei ya lä cui, yanowamö ya täbä nö bleaamabä wale shömano malä mlai. Ya täbä yai jucäabä wale shömölema.

Juan 7:24

Wama täbä jömaö däjä, bä bufi yai da dayäo. Wamacö bejedimolanö bä yai jömaö da cadidioje. Inaja tä mömou cuwä ma cui, wamacö bufi nia lobe cuu jaödaomi —bä nowa tama.

Juan 8:11

—Ma, tä a̦ wäyäle. Moli ma cui, a wa̦ ca̦i fanomi —a suwä cuma. Abinaja Jesús e cuma. —Camiyä ma cui, ya wa̦ ca̦i nia faimi. A da co̦jamö. Wa̦lidiwä wa tä taö co̦daaö mlai —e cuma.

Romanos 2:1

Ai wama bä lä jimaö wei däjä, cafä wamacö ma cui wamacö ca̦i jimamou mö feduo. Ai wama bä nö bleaamaö lä bufio wei däjä, cafä wamacö ma cui wamacö ca̦i waimamou mö feduo. Wama bä ma jimaö wei ma cui, inaja showawä cafä wamacö ca̦i malä cuaaö wei.

1 Corintios 2:15

Ö̦jö ma cui, Yai Bada tä Bufi lä tabou wejei bä mö feduwä lä cuinö, tä bluca lä cublou wei tä nö ö̦jöböaöje. Tä nö dodijidawä ö̦jöböaöje, tä nö ca̦i wa̦lidiwä ö̦jöböaöje. Cama bänö tä nö bluca ma ö̦jöböaö wejei ma cui, mojodi täbä lija cama bä bufi nö ö̦jöböamoimi. Yai Bada ebä lija bä lä mojodi wei bä bufi shi̦lo wedinajamou.

2 Corintios 5:16

Yanowamö täbänö täbä nofi lä tabou wejeinaja, fei däjä ya täbä nofi taboimi majöwä. Shädayai. Cristo a ma cui, a nofi tabou lä balöono wejeinaja camiyä ya ma cuinö ya nofi ca̦i jole tabou mö feduo balöoma. Inaja ya nofi jole tabou ma balöono wei ma cui, fei däjä inaja ya bufi cuimi.

Santiago 2:4

wamacö dobloimi. Bä mömou lä dodijidai tä ja bä möla dijä. Bei bufi mlai, bei wama bä sibosi li möö buo malä cui.

1 Samuel 16:7

Ö̦jö ma cui, Samuel lija abenaja Jeobaa a cuma. —A mömou lä dodijidai tä ma cui ja, a lä yaläjäi tä ma cui ja, ö̦jö tä ja a möla dijä. Ya waii malä waiquii. Yanowamö täbänö bä möö lä cuaaö wejeinaja, camiyä Jeobaa yanö inaja ya bä möö cuaaimi. Bei bä sibosi li möö buoje. Bei bä bufi lä cui, camiyänö ya bä bufi yai li möö —a Jeobaa cuma.