Juan 3:15 - Biblia Yanowamö

¹⁵ Camiyä wale a̦ bejedi lä bufii wejei bä bluca lä cui, bä ba̦limi cuobä.

Juan 3:15 Iomraidhean Croise

Números 21:9

Einaja Jeobaa a cuma cudeenö, duo shibä ja Moisesinö olu cäcö nö idubö basublalema. Fii fi jamö cäcö fa shadimacönö, olu bänö bä si lä wädöno wejei bä lä cui, cäcö nö idubö mödaöje däjä, bä demi cuo fe yadioma.

Mateo 18:10

Abinaja Jesús a cuma. —Ei iba ai a wai lä cui, a nofi wa̦libo dijejä. Bämacö nowa taö lä cule. Ö̦jö bä nija Yai Bada tänö a̦jele ebä malä lämabole. Ö̦jö bä a̦jele lä cui bä a̦ nö wäobä, Fayä a lä culadi nija bä malä ajedeladi.

Mateo 25:46

’Ö̦jö däjä, bä nö bleaaö shi wa̦libä, bä nia alayofälöö. Ö̦jö ma cui, bä lä cadidou wei bä lä cui, ba̦limi bä nia lä cudio wei jamö ö̦jö bä nia juu ayao —Jesús a cuma.

Marcos 16:16

Wale a̦ bejedi lä bufii wejei bä lä cui, bä fe fa ojoblamolunö, bä jucäamou wä. Ö̦jö ma cui, wale a̦ bejedi bufii lä mlajei bä waimamobä cäbä.

Lucas 19:10

Camiyä ya lä yanowamöblaleyoluno wei ya lä cuinö, bä lä mojoluu wei ya bä dayäabä ya malä waloqueyoluno wei, ya bä co̦ablaö co̦obä —a nowa tama.

Juan 1:12

Ö̦jö ma cui, a wa̦ juaö fe lä yadiono wejei bä lä cui, a wa̦ bejedi lä bufino wejei, Yai Bada ijilubö ebä cuobä, bä tablamalema.

Juan 16:33

Camiyä nija wamacö culanö, wamacö bufi yanöcöo fe yadiobä ya wa̦. Bita jamö wamacö cua showalanö, wamacö nö nia ma bleaamaö wejei ma cui, bä bufi nö da wa̦lojoicu. Bita jamö a lä nosiemou wei a nija ya nö wa̦loblou waiquilayoma —a cuma.

Juan 20:31

Ö̦jö ma cui, Jesús wama tä a̦ bejedi bufibä, ya tä a̦ oni taaö lä cule. “Yai Bada tänö a shömabä a lä yaileno wei, ö̦jö Jesús a waiquiwä”, wama a nofi yai tabobä. “Yai Bada bei Ijilubö e”, wama a nofi ca̦i tabobä. Inaja wama a nofi tabolanö, cama a wa̦nö ba̦limi wamacö cuobä.

Juan 3:16

’Yai Bada tänö yanowamö täbä nofimaö fa dodijionö, bä Ijilubö moli ya e lä cui yale shömölema. Wale a̦ bejedi lä bufii wejei bä bluca lä cui, bä nomaö mlai ja bä ba̦limi cuobä.

Juan 3:36

Ö̦jö bä Ijilubö e a̦ bejedi lä bufii wejei bä lä cui, ba̦limi bä cuobä bä li. Ö̦jö ma cui, bä Ijilubö e a̦ juaö lä mlajei bä lä cui, ö̦jö bä nia ba̦limi cuomi. Yai Bada tä nö wa̦lowä lä jushudou wei tänö bä nö bleaabä ö̦jö bä li.

Juan 5:24

’Cafä wamacö nija ei ya wa̦ lä cui, bejedi lä ya wa̦—a cuma—. Wale a̦ fa ji̦liajenö, wale lä shömöleno wei a wa̦ bejedi lä bufii wejei bä lä cui, ba̦limi bä cuobä bä li waiquiwä. Bä dobloimi jömamobä bämi. Ö̦jö bä lä cui, bä nomabä bä ma cuono wei ma cui, bä ba̦limiblou nomöjöa lä cule.

Juan 6:27

’Nii bä mladou si lä ijejei bä ja, bä cuaablalou fe balojoo dijä. Täbä ba̦limi cuobä cäcö nii ja, wamacö shino yai ojodamobä. Ö̦jö cäcö nii ja wamacö dobämobä, ei lä ya waiquiwä, camiyä ya lä yanowamöblaleyoluno wei ya lä cui. Fayä Yai Bada tänö wale nö malä ö̦jöböamale —bä nowa tama.

Juan 6:40

Abinaja Fayänö täbä taamaö bufi doblao malä cui. Bä Ijilubö wale nö yai lä ö̦jöböaö wejei bä lä cui, wale a̦ bejedi bufiije ja, bä ba̦limi tamabou bufi doblao. Tä lä jödödöblole däjä, ö̦jö ya bä nia demi jocädamaö co̦o —a cuma.

Juan 6:47

’Cafä wamacö nija ei ya wa̦ lä cui, bejedi lä ya wa̦ —a cuma—. Wale a̦ bejedi lä bufii wejei bä lä cui, ba̦limi bä cuobä bä li waiquiwä.

Hechos 13:41

Bei. Yai Bada wama a wa̦ nö lä waiblaö wei wamacö lä cui. Wamacö bufi nia möblou ca̦i nomaö. Cafä wamacö bälöo däjä, ya tä nia taö nö malä quiliaö wei. Wamacö ma yömölaö wejei ma cui, wama tä a̦ nia bejedi bufiimi. ’¿Ö̦jö tawä? —Pablo a cuma—. Einaja tä a̦ cuu.

Hechos 8:36

Ö̦jö yo jamö cäcöbö befi ca̦i fa lälälönö, mau u jamö cäcöbö waloquema. Ö̦jö däjä, abinaja bada a cuma. —Fei mau u da mö, fei, fei. Camiyä ya fe ojoblamou showadaobä, ¿ai bei tä läami daanö? —a cuma.

Romanos 5:21

bä bayeliblamou fe yadiobä. ¿Ö̦jö tawä? Wa̦lidiwä tänö täbä bluca jaba nomablou lä cuaano weinaja, inaja showawä täbä nofi lä ojodabou wei tänö, bä nia yai ba̦limi bluca cuo nomöjöoma. Bada tä Jesucristo a yai lä cuaano wei tänö, jai bä cadejewä waiquiwä, Yai Bada tänö bä nofi nia tabou fe yadioma.

1 Corintios 1:18

Shobali wacä jamö täbä cadidou lä showai täbä lija, fii balitama tefi ja Jesucristo a lä shäleno wejei tä a̦ ji̦limamou nofi mojodi talei. Cama bä lija tä a̦ ji̦limamou nofi ma mojodi wei ma cui, camiyä bämacö lä fucäamou wei bämacö lija tä a̦ ji̦limamou yai walalawä. Ö̦jö tä a̦nö Yai Bada tä lofote dablamou.

2 Corintios 4:3

Yama tä a̦ dodijidawä lä wäyäle tä a̦ lä cui, tä a̦ nofi mojodubou fe yadioje ja, bä nomaö shi wa̦lijiobä bä li waiquiwä yalo tä a̦ nofi li mojodubouje.

Gálatas 2:16

Camiyä judio bämacö yai ma cui, ei bäma tä daö. Jai bä dodijidawä waiquiwä, Yai Bada tänö bä nofi lä tabou wei bä lä cui, Jesucristo a nofi li mölabouje yalo bä nofi li tamamou. Moisesi tä a̦ ja bä fa cadidonö mlai. Camiyä judio bämacö ma cuinö, Jesucristo bäma a ca̦i bejedi malä bufibou wei. ¿Ya jolemou daanö? Moisesi tä a̦ ja bämacö lä cadidou wei tänö mlai, Cristo bäma a nofi yai mölabou yalo, jai bämacö dodijidawä waiquiwä bämalecö nofi li tabou. ¿Ö̦jö tawä? Yai Bada lija a nofi nia dodijidawä lä tamamou wei, Moisesi tä a̦ ja moli ma cui a cadidou malä mlai.

Gálatas 2:20

¿Ö̦jö tawä? Fii balitama tefi jamö Cristo a lä shäleno wejei däjä, camiyä ya ca̦i shämoa yädäa showalayoma. Fei däjä ya demi lä cule, Cristonö wale ca̦i demi cua. Camiyä ya bufi lä cuaablalou weinaja ya cuaaimi. ¿Ö̦jö tawä? Eja ya demi cua lä showale, Yai Bada bei Ijilubö ya e nofi mölabolanö ya e cua lä cule. Wale fa nofilänö, wale bayeliblabä cama a jibämoquema.

Hebreos 10:39

Ö̦jö ma cui, camiyä bämacö lä cui, bämacö bufi mö yabablou co̦obä bämacö malä mlai. ¿Ö̦jö tawä? Bämacö mö watäblamobä bämacömi. Ma, bäma a nofi yai mölabou. Ö̦jö lija bämacö lä nowamöo wei bämacö, bämacö dodijidawä cudio fe yadiobä.

Hebreos 7:25

Ö̦jö cudeenö, Jesús a lä cuaano wei tänö, Yai Bada lija bä lä ajedou wei bä lä cui bä nia nowamaö. Bä nowamabä ö̦jö Jesús a waiquiwä. Showadi bä bayelimaö bufibä a ba̦limi cua malä waiquiladi.

1 Juan 2:25

¿Ö̦jö tawä? Camiyä bämacö nija Jesucristonö tä a̦fa lä wäyäno wei tä lä cui, bämacö nia lä ba̦limiblou wei tä a̦fa yai wäyäma.

1 Juan 5:1

“Yai Bada tänö a shömabä a lä yaileno wei, ö̦jö Jesús a waiquiwä”, bä bufi lä cuu wei, Yai Bada bei ijilubö ebä waiquiwä. ¿Ö̦jö tawä? Bä fö̦ö ebä lä nofimaö wejei bä lä cuinö, bä ijilubö ebä ca̦i nofimaö mö feduo malä cujei.

1 Juan 5:20

Yai Bada a lä cui, ö̦jö a shino yai bejedimou. Ö̦jö bäma a dabä, bei Ijilubö e fa itoliyonö bämalecö bufi jaducumabou lä cule. Bä Ijilubö Jesucristo nija bämacö cua lä cule, a yai lä bejedi wei a lä cui nija. A bufiblamobä ö̦jö a shino yai bejedi cua ayaa. Ba̦limi bämacö cuobä, ö̦jö a waiquiwä.