Juan 17:11 - Biblia Yanowamö

¹¹ Fei däjä, ei bita a lä cui ya nia daaö. Iba bä cuo juo däjä, cafä nijamö ya nia co̦o. ’Fabe. Cafä yami wa yaia —a cuma—. Cafä sho bäfäcö moli lä culenaja bä molio mö feduobä, bä da nowama. Cafä wa lojodenö wa bä nowamabä, camiyä nija wa lojode lä wäyämono wei tä showawä lä cuinö.

Juan 17:11 Iomraidhean Croise

Mateo 10:16

’Bämacö shömaö lä cule —Jesús a cuma—. Ji̦ima bä waiteli lä läle jamö, oweja bä shäablamou si ijejewä lä cuo weinaja, wamacö nia cuo. Olu bä moyawe lä culenaja, bä moyawäa da cuicu. Joledo bä a̦ ji̦limamou oquejewä lä culenaja, bä a̦ ca̦i oquewä cuo mö da feduo.

Mateo 5:48

Ma. Faafä a lä culadi a doblaa lä culenaja, wamacö cuo mö feduobä wama ecö.

Mateo 6:9

’¿Ö̦jö tawä? —a cuma—. Yai Bada nija wamacö nö bayeli nacao ja, abinaja wamacö yai cubä. “Fabe, yamacö lä Fö̦ömou wei wa lä culadi, cafä wa wa̦fa shino doblao wäyämobä wa. Wa wa̦fa jole jole jayumamou buobä wami.

Juan 13:1

Yai Bada a waiteli lä jayuano wei tä nofi nia co̦camoaö jaödao co̦omaje. Bä Fö̦ö e nijamö a nia co̦o lä jaödaono wei, Jesúsnö tä daö waiquioma. Ei tä bita tabi nia feiaö co̦oma. Cama ebä bita jamö lä cule, bä showadi lä nofimadino wei, bä nofimaö mladonomi. A waicobä jamö ma cui bä nofimaö fe yadio showaoma.

Juan 13:3

Jesús a lä cuinö, jödödöwä täbä lojodobobä, bä Fö̦ö enö Bada a yai tablamaö lä waiquilayono wei tä daö waiquioma. Yai Bada nija a cuo lä balöono wei tä ca̦i daö showaoma. Ö̦jö nijamö a nia lä co̦o wei tä ca̦i.

Juan 14:20

Ö̦jö däjä, wamacö bufi nia yai jaducublou. Fayä nija camiyä ya lä cule, wama tä nia daö wawädoo. Camiyä nija cafä wamacö lä cule, wama tä ca̦i nia daö. Cafä wamacö nija camiyä ya cua mö lä fedule tä ca̦i.

Juan 16:28

Fayä nijamö ya culanö, bita jamö ya waloqueyoluma. Fei däjä ei bita ya tabi fa feicönö, Fayä nijamö ya nia co̦jamöö —a cuma.

Juan 16:33

Camiyä nija wamacö culanö, wamacö bufi yanöcöo fe yadiobä ya wa̦. Bita jamö wamacö cua showalanö, wamacö nö nia ma bleaamaö wejei ma cui, bä bufi nö da wa̦lojoicu. Bita jamö a lä nosiemou wei a nija ya nö wa̦loblou waiquilayoma —a cuma.

Juan 17:23

Cama bä nija ya culanö, camiyä nija cafä wa ca̦i cuobä. Ö̦jö däjä, cama bä ma cui, moli dodijiwä bä ca̦i cuo mö feduo showaobä. Yanowamö täbä bufi jaducublobä. Cafänö eja camiyä wale lä shömöleno wei wale dabeje. Cafänö camiyä wale lä nofimalenaja, iba wa bä nofimaö mö lä feduo wei tä lä cui, ö̦jö tä ca̦i dabeje.

Juan 17:25

’Fabe, cafä wa lä cadidou wei wa. Yanowamö täbänö wa daö ma mlajei ma cui, camiyänö bäfä daö. Iba bä lä cuinö, eja wale lä shömöleno wei, wale ca̦i daöje.

Juan 17:6

’Fabe —a cuma—. Ei bita jamö afä wa bä lä tabono wei, camiyä nija wa bä jöböbema. Wa bä lä jöböbeno wei bä nija, cafä bäfä damalalema. Wa wa̦ nofi cadidibouje.

Juan 7:33

Ö̦jö däjä, judio bä nija abinaja Jesús a cuma. —Cafä wamacö nija ya nö dedejedou fa bälonö, wale lä shömöleno wei nijamö ya nia juu co̦o.

Hechos 3:21

Fedu jamö Jesús a cublaa balöadayoa. Eja Yai Bada tänö tä bluca cadejeblaö lä bufiole däjä, a shömaö co̦o wä. Inaja Yai Bada tä malä cuno wei. ¿Ö̦jö tawä? Yai Bada a wa̦no wäyälewä bä a̦ fa cadidonö, ö̦jö tä a̦fa wayoaö malä balöono wejei.

Romanos 12:5

Inaja showawä, Cristo lija bämacö bluca yädäa yalo, bämacö li moli. Bämacö bluca nia lä bayeliblamou wei bämacö shomiblawä.

Romanos 9:17

Tä a̦ malä cuu wei. Ejidoteli bada a wa̦fa wäyäö ja, abenaja Yai Bada a cuma. Ö̦jö ma cui, cama lija ya lofote nia fa dablamonö ya li tabou. Ya lofote fa damolalunö, jödödöwä täbä lä bälöblai bä lijamö, wale a̦fa wäyäö blaucobeje, ya li demimabou showaa bäa lä cule. Einaja a cuma.

1 Corintios 1:10

Iba wamacö. Bada tä Jesucristo a wa̦nö bämacö yömölaö. Moli tä a̦ showawä ja, bä bufi da shalilo. Wamacö a̦ fa majöablalonö, wamacö bufi shedecou mlai. Moli tä a̦ ja wamacö fa cadidonö, wamacö dodijabä.

Gálatas 3:28

¿Ö̦jö tawä? Jesucristo lija täbä moliblou. Judio bä ma cui, judio bä lä mlai bä ma cui, bä nosie fuamobä bä lä tabou wejei bä ma cui, bä tabou lä mlajei bä ma cui, wa̦lo bä ma cui, suwä bä ma cui, Jesucristo lija, moli bä bluca cublou.

Efesios 4:4

Moli a lija bämacö bluca yädäa yalo, moli bämacö. Bluca bämacö lija, moli a lä cui a Bufi bälöblawä. Yai Bada tänö bämalecö lä nacano wei däjä, bämalecö a̦fa bayeliblou lä wäyäno wei tä a̦ moli ja, bämacö bluca mölaö.

Filipenses 2:9

Inaja a ojode cuoma yalo, Yai Bada tänö Bada tä yai tablamalema. Ai täbä a̦fa bada ma wäyämou wei ma cui, ö̦jö a wa̦fa shi̦lo yai Bada jilamou dodijiobä, a Bada tablamalema.

Hebreos 1:3

Yai Bada bä Ijilubö e lä cuinö, bä Fö̦ö e doblao damalalema. Yai Bada a cuwä lä dodijiinaja, inaja showawä bä Ijilubö e cuwä mö feduwä. Cama a wa̦ lofotenö, jödödöwä tä fuwäbou showaa lä cule. ¿Ö̦jö tawä? Yanowamö täbä doblou lä mlai täbä bufi aublobä tä tama. Ö̦jö däjä, Yai Bada tä nö shi̦lo wa̦lojaö lä ayai tä lä dicäladi jamö, a dicäquedayoma. Yai Bada jayu boco mashi jamö a dicäquedayoma.

Hebreos 9:24

Ö̦jö cudeenö, yanowamö täbänö Yai Bada etä yano lä tablaleno wejei jamö, Cristo a fanomi. Ö̦jö a yano lä cui, fedu jamö a yano yai lä culadi a nö li owä cuo balöo bädaoma. Fedu jamö, Yai Bada etä yai yano lä culadi jamö, Cristo a shi̦lo yai falayoma, Yai Bada tä lä culadi jamö bämalecö nofi yai bäyäbodayobä.

Santiago 4:4

¡Uo! Shominaja wamacö bufi lä cuaablalou wei wamacö lä cuinö, ¿ei bei wama tä daö mlaa culawä? Yanowamö täbä showadi lä cuaaö wei tä ja wamacö bufi cuo dicoo ja, Yai Bada wama tä nö nabämaö waiquiwä. Ö̦jö cudeenö, ö̦jö tä jamö wamacö cuo bufi lä doblao wei wamacö lä cui, Yai Bada nija wamacö nö nabämobä wamacö li cuaaö.

1 Pedro 1:5

Ba̦limi bämacö cuobä, ya̦cumö bämalecö nia malä jucäaö wei. Yai Bada tänö täbä nia lä jömaö wei tä cublou däjä, tä nia wawäblou. Bämacö nia lä dobämou wei bämacö lä cui, Yai Bada bäma a nofi mölabou yalo, cama tä lojodenö bämalecö nowamaö showaa lä cule. Ö̦jö cudeenö bämacö bufi doblalou.

1 Juan 3:12

Caino bäma a owämaö mlai, bä fääshä e lä shäleno wei a lä cui. ¿Wedi tä tabä a li shälema, ö̦jö lä? Wa̦lidiwä talewä cama Caino a cuo dodijioma yalo, bä fääshä e shino dodijaö ayaoma cudeenö a li shälema.

1 Juan 5:19

Camiyä Yai Bada bei ijilubö bäma ecö waiquiwä ma cui, a yai lä wa̦lidii a lä cuinö, yanowamö täbä bluca tabou dicoa. Ö̦jö bäma tä ca̦i daö.

Judas 1:1

Jesucristo ya nosie juabä ei camiyä Juda cä ya e, Santiago ya e mashi lä cui. Yai Bada tänö wamacö lä nacaleno wei wamacö nija, ei ya tä a̦ oni shömaö lä cule. Yai Bada bäma a nofi lä Fö̦ömalenö wamacö nofimaö dodijia lä cule. Jesucristonö wamacö lä nowamaö wei wamacö.

Judas 1:24

Jesucristo a lä cuaano wei tänö, Yai Bada a yami cua lä ayalenö bämacö jucäaö. Dodijidawä wamacö yai tamabobä a. Wamacö shomiablalou mlai ja, cafä wamacö nija wa̦lidiwä wiisibö tä wai cua mlai ja, cama etä shi̦i lä cule jamö wamacö nia dodijidawä lä ublamabou wei, ö̦jö lä a waiquiwä. Wamacö bufi nia ca̦i doblamabou. Tä ulifi tablamou showao mlao däjä ma cui, fei däjä ma cui, obi ma cui, ö̦jö a wa̦fa doblao tamou shi wa̦libä a waiquiwä. Wawädowä a nofi Badabobeje. A nö ca̦i lojode ö̦jöböabeje. Inaja lä tä cuobä.

Apocalipsis 15:4

Bada tä. Bluca täbä nija wa wa̦fa nö quili tamobä wa. Wa wa̦fa yai lojode tamobä wa. Cafä yami wa yaia malä ayale. Wa lä bejedimou wei tä damolaliyoma yalo, cafä nija bä möfe bolanö, bluca bä bälöblawä lä yaiblai bänö wa wa̦fa nia Bada doblao tayoluuje. Einaja bä amowabö a̦ cuma.

Apocalipsis 19:12

¿Ö̦jö tawä? Bei mamocu lä cui, jai cowa wacö lä culenaja mamocu cuwä. Bada täbänö täbä lä yojobou wejei täbä wai bluca ja, a fe yojoo. Cama a wa̦fa oni ma tamoqueno wei ma cui, cama a wa̦fa shino damou ayawä. Ai täbä nija a wa̦fa damamoimi.

Apocalipsis 4:8

¿Ö̦jö tawä? Ö̦jö 4 täbä lä cui, 6 täbä majecö cublawä. Bei bä majecö mabucabö jamö ma cui, cama comi bä jamö bä mamobä cublawä nö mlawä. Ö̦jö täbä lä cuinö, täbä yanöcöblou balöa mlai ja ei tä a̦ amowa shino tadiije. Yai Bada tä Bada lojode lä ayai, ¡yami a yaia! Jaba däjä tä cuo fa showaonö tä cua lä showale, ¡yami a yaia! Tä nia juu lä co̦o wei tä showawä lä cui, ¡yami a yaia! Einaja täbä amowamou ja täbä cudii.