Apocalipsis 4:11 - Biblia Yanowamö

¹¹ Cafä bäfä nofi lä Badabou wei wa Bada. Bäfä lä bufibou wei cafä wa. Wa wa̦fa doblao tamou ayaobä, ö̦jö wa waiquiwä. Cafä wa lä cui, wa nofi dodijidawä tabou ayaobeje, ö̦jö wa. Cafä wa nofi ca̦i lojode doablamou ayaobä. Jödödöwä wa täbä malä tablaleno wei. Wa täbä tablaö fa bufinö wa täbä tablalema. Einaja bä amowabö a̦ cuu.

Apocalipsis 4:11 Iomraidhean Croise

Génesis 1:1

Jaba däjä, judu mösö ma cui, bita a ma cui, Yai Bada tänö tä bluca bädamalema.

Éxodo 20:11

’Jeobaa ya lä cuinö, 6 ya tä mö didi tablamalanö, ya täbä bluca malä tablaleno wei. Judu mösö ma cui, bita a ma cui, ö̦jamö täbä bluca lä cublai täbä ma cui, ya täbä bluca tablalema. Modu ubä ma cui, ö̦jamö täbä lä cubodi täbä ma cui, ö̦jö täbä ca̦i showawä. 7 tä mö jalu ja, ya ojodamou yanöcöblaliyoma. Ö̦jö cudeenö, wamacö yanöcöobä tä mö jalu lä cui, ya tä a̦fa jalu shomi wäa showadaquema, tä mö jalu yaiobä.

Hechos 14:15

—¿Wedi tabä inaja wamacö li cuaaö dicoa cule? Cafä wamacö lä culenaja, yafäcö cuwä mö feduwä yafäcö. Yanowamö bämacö bluca. ¿Ö̦jö tawä? Yafä tä a̦ dodijidawä bälaö mö juu lä cufe. Wama bä jole lä bufiblaö wei wama bä fa dacönö, Yai Bada nija wamacö bufi yai cuobä. Ö̦jö a shino ba̦limi cua ayaa. Judu mösö ma cui, bita a ma cui, modu u ma cui, ö̦jö bä bluca tablalema. Ö̦jö bä jamö bä bluca lä cule, bä ca̦i tablaö showaoma.

Hechos 17:24

’Bei —Pablo a cuma—. Mashita a bada lä tablaleno wei a lä cui, jödödöwä bä lä cublai bä ca̦i lä tablaleno wei a showawä lä cui, ö̦jö Yai Bada cätä. Fedu jamö ma cui, bita jamö ma cui, ö̦jö a shino Bada cua ayaa. Ö̦jö cudeenö, wamacö nö bayeli nacaobä wama e yano ma tablalei wei ma cui, a nia bälöomi.

Romanos 11:36

Camanö täbä bluca malä tablaleno wei. Cama a showawänö täbä bluca li fuwäbou. Camanö täbä tabobä täbä. ¿Ö̦jö tawä? Cama a wa̦fa shi̦lo doblao tamou shi wa̦libä. Inaja lä tä cuobä.

Efesios 3:9

Yai Bada tänö tä a̦ jaba lä jo̦yabono wei tä a̦ wawäblou fe yadiobä, camiyä lija täbä bufi nia bluca jaducäblamama. ¿Ö̦jö tawä? Yai Bada a lä cuinö, täbä bluca lä tablaleno wei a showawä lä cuinö, cama a nia cuaaö lä ja̦toono wei tä a̦ nia ya̦cumö wawäblamama.

Hebreos 1:10

Abenaja Yai Bada a ca̦i jo̦wa cuma, bä Ijilubö e lija. Cafä Bada wa lä cui, jaba däjä bita wa colo lä lofotoblamaleno wei wa. Judu mösö ma cui, cafä wa showawänö, wa mösö ca̦i lelemaquema.

Hebreos 1:2

Ö̦jö ma cui, fei däjä, Yai Bada tänö täbä nia lä jimaö wei tä cublou ajedou däjä, camiyä bämacö lija a wa̦no wäyämamou nomöjöobä, bä Ijilubö e yai shimöledayoma. ¿Ö̦jö tawä? Bä Ijilubö e lija, Yai Bada tänö jödödöwä tä lä cule tä bluca tablamalema. Ö̦jö täbä bluca ja a Bada läobä, a yaia showadalema.

Apocalipsis 1:6

Jesucristonö bämalecö ca̦i fa cuonö, Yai Bada bäma ecö cuobä bämalecö tablamalema. Bä Fö̦ö e nija bämacö ojodamou ajedeobä, nofi bäyäalewä bämalecö tablamalema. ¿Ö̦jö tawä? ¡Jesucristo a wa̦fa shino doblao tamobä! ¡Ö̦jö a lojode bälöo dodijio shi wa̦libä! ¡Inaja lä tä cuobä!

Apocalipsis 10:6

Boco fa yalejedalunö abinaja a cuma. —Ya wa̦ nö wäo cadidia lä cule. Tä demi cua shi̦ lä wa̦lile tä malä cule. Judu mösö tablalema, ö̦jamö täbä bluca lä culadi täbä ca̦i. Bita a ca̦i taa mö fedublalema, ö̦jamö täbä bluca lä cublai täbä ca̦i. Modu u ca̦i bada tablalema, ö̦jamö täbä bluca lä cubodi täbä ca̦i. Fei däjä a nö nia dadiomi.

Apocalipsis 14:7

A wa̦ i̦cali faö ja, abinaja a̦jele a cuma. —Yai Bada tä nö quili da taje. A wa̦fa Bada lojode ca̦i da taje. Täbä bluca lä bälöblai täbä jömabä, etä malä cublalufe. Wamacö möfe fa boalunö a wa̦fa Bada doblao da taje. Judu mösö ma cui, bita a ma cui, modu ubä ma cui, ubä fe lä jojoblai ubä ma cui, ö̦jö täbä bluca tablalema —a cuma.

Apocalipsis 19:1

Ö̦jö a̦jele a wa̦ faö fa balöonö, fedu jamö ai ya täbä a̦ i̦cali faö ji̦lilema. Jai bluca täbä co̦camolayoma dejemi täbä a̦ bada ji̦limamou cuoma. Abinaja täbä cuma. —¡Yai Bada a nofi da doablaje! ¡Bämalecö lä jucäaö wei ö̦jö a, Yai Bada bäma a lä bufibou wei a lä cui! ¡Ö̦jö a wa̦fa shino doblao tamobä! ¡Ö̦jö a nö shino wa̦lojaö ayawä!

Apocalipsis 5:12

Bä i̦cali a̦ faö ja, abinaja bä cuma. Oweja a wa̦fa ocalo lä jilamou wei, a lä shämono wei a lä cui, ö̦jö a nofi lojode doablamobä a yai. Täbä nowa lä bluca wei täbä ja a dobäbeje a. Ö̦jö a bufi nofi shino yai jaducuwä doablamobä. A nö a̦fa ca̦i wa̦lojaö tabeje. A nofi dodijidawä ca̦i tabobeje. A wa̦fa ca̦i doblao tamobä. ¡Bäma a nofi dobobä, ö̦jö a yai! Einaja bä cuma.

Apocalipsis 5:2

Ö̦jö däjä, a̦jele lojode ya bada dalalema. A wa̦ faö lojodoaö ja abinaja a cuma. —Mai cocobä jädödabä, oni si calomabä, ¿wedi bei a yai? —a cuma.

Apocalipsis 5:9

Amowa dude tä a̦ ca̦i tamaje. Abinaja bä amowabö a̦ cuma. Oni wa si däabä, mai wa cocobä caloblabä, cafä wa yai. Cafä wa shämou fa läonö, bei wa i̦yäbönö yanowamö wa täbä nowa bluca malä comaqueno wei. Yai Bada tänö bä tabobä, bluca bä yaiablalou lä nodiaö wei bä nijamö, cama wa ebä nowa comaquema. Bluca bä caficö a̦ lä bou wejei bä nijamö ca̦i. Shomi bä bluca lä bälöblai bä nijamö ca̦i. Bluca bä bälöblawä lä yaiblai bä nijamö ca̦i.