Apocalipsis 13:2 - Biblia Yanowamö

² Yalo ya waiteli lä dalaleno wei a lä cui, qui̦danali bä lä culenaja a cuoma. Bei mamicö lä cui, däbä bä mamicö lä culenaja mamicö cuoma. Öla bä caficö lä culenaja caficö cuo mö feduoma. Ö̦jö däjä yaitawä täcö lä cuinö a yädämalema. A lojode cublou mö feduobä etä jöbäquema. Cama etäcö jamö täcö döcälanö, täcö nosiemou lojode lä culenaja a cublou mö feduobä, a dobälema.

Apocalipsis 13:2 Iomraidhean Croise

2 Timoteo 4:17

Ya icuobä jamö, Bada tänö wale ca̦i cuo showaoma. Ö̦jönö wale nö wa̦lojomaboma yalo, Jesucristo ya etä a̦ wäyäö jödödöo fe yadio showaoma, judio bä lä mlai bä blucanö tä a̦ yai ji̦liaö walalaobeje. ¿Ö̦jö tawä? Inaja tä fa cuonö, wale shäö showadaobeje tä ma cuono wei ma cui, Yai Bada tänö wale nowamaö fe yadioma.

1 Pedro 5:8

Bä da moyaweicu, ö̦jö lä. Bä nö ca̦i da daicu. Wamacö nofi lä wa̦libou wei a fecula bada lä cuinö, wamacö nabä queobä wamacö nofi taö malä cuaaö wei, öla bä waiteli lämou lä cuaaö weinaja showawä.

Apocalipsis 12:13

Bita jamö yaitawä täcö shäyäamou fa damolalunö, bä ijilubö wa̦lo a lä tablaleno wei a nabä suwä cadidou showadaoma.

Apocalipsis 12:15

Suwä a docufälöbä jamö, ö̦jö yaitawä täcö lä cuinö, mau bada u lä culenaja u joblalema, a nia fa bacayuafälönö.

Apocalipsis 12:9

Ö̦jö däjä Yaitawä täcö bada shäyäbalemaje, täcö cuo lä balöono wei täcö lä cui. Fecula bada täcö a̦fa jilou. Sadanasi täcö a̦fa ca̦i jilou. Jödödöwä bä lä bälöblai bä lä mölamaö wei täcö. Cama täcö ma cui, cama ebä ma cui, bita jamö ö̦jö bä bluca shäyäbalemaje.

Apocalipsis 13:12

¿Ö̦jö tawä? Yalo waiteli a jaba lä wawälayono wei jamö a culanö, a wa̦ bayeliblaö. Jaba a lä cui a wa̦ ji̦limamou blaucou lä culenaja, ö̦jö a wa̦ ca̦i ji̦liaö blaucaö mö feduaje. Bita jamö bä yanowamö bluca lä bälöblai, ö̦jönö bä nosiemaö. Bä möfe bolanö, yalo a waiteli jaba lä cui a wa̦fa bada doblao tabeje bä nosiemaö, a bada jaloa fe lä yadilayono wei a lä cui.

Apocalipsis 13:4

Yalo waiteli a nö wa̦lojomaboma yalo, yaitawä täcö nija bä möfe bolanö, täcö a̦fa bada doblao tamaje. Yalo waiteli a ma cui, ö̦jö nija bä möfe bolanö, a wa̦fa bada doblao ca̦i taö mö feduoje ja, abinaja bä cuma. —Cafä yalo waiteli wa lä culenaja, ai a cua bädaami. Cafä nija bä nö nia lä wa̦lojaö wei bä cuami —bä cuma.

Apocalipsis 16:10

Ö̦jö däjä a̦jele 5 a lä cuinö, yalo waiteli a döcäobä etäcö jamö e toubä löquema. Toubä fa löcönö, yalo waiteli anö cama ebä ca̦i lä cuono wei jamö tä mö bada dödöblaliyoma. ¿Ö̦jö tawä? Bä nö ninili bleaaö fe balojoa ja, cama bä aca wädöobloma.

Apocalipsis 17:12

Abinaja a a̦jele cuma. —Yalo waiteli 10 wa yo̦labä lä möno wei yo̦labänö, shomi 10 bä nia bada läblamou mö lä feduo wei bä jömamou. Bä lämaboimi showaweje. Ö̦jö ma cui, yalo a waiteli sho bä nia bada läo. Bä läo däjä bä nö nia bada dedebloimi.

Apocalipsis 19:20

Cabayo a ja a lä döcäo wei a lä cuinö, yalo a waiteli juwälema. A wa̦no jole jole wäyälewä a ca̦i, yalo waiteli a lä cule jamö a culanö, a nö lä quiliano wei a lä cui. Ö̦jö a lojode nia fa dablamanö, tä nö lä quilijii tä bluca wawämama. A nö lä quiliano wei tänö, yalo waiteli a wa̦fa oni ja täbä lä oniblamono wei bä mölamama, cama a nö idubö ja bä möfe bolanö, a wa̦fa bada doblao lä tano wejei bä lä cui. Ö̦jö cäcöbö fa juwälönö, cowa wacö ca jamö cäcöbö demi quemabefälöma, cowa yaitawä nacli wacöbä lä waole jamö.

Apocalipsis 2:13

Sadanasi a bälöo lä dodijio wei jamö, iba Becamoteli bä bälöa, fecula bada a lä döcäo wei etäcö lä cule jamö. Ö̦jamö ya bä bälöa nofi jaducubou. Wale a̦ cadidibou lojodoa fe yadiaje. Ö̦jamö lä wale a̦fa wäyäö lä shaliliono wei a shälemaje, Sadanasi a lä bälöle jamö. A ma shäleno wejei ma cui, iba bä lä cuinö wale nofi mölabou fe yadio showaomaje. A lä shäleno wejei a lä cui, Adiba a wa̦fa cuoma. Showadi a bejedimoma.

Apocalipsis 20:2

Yaitawä täcö lä cui täcö bada juwäa showadaalema, täcö cuo lä balöono wei täcö lä cui. Fecula Bada täcö a̦fa cua. Sadanasi täcö a̦fa ca̦i jilamou. Täcö fa juwälönö täcö o̦caquema. Täca nö lä quilijibodi jamö täcö quea fa showadamabafälönö, yoca cofiböquema. Yoca caloblaö mlaobeje, etä ca̦i taa mö feduquema. ¿Ö̦jö tawä? Lasha 1.000 a lalou jaöo mlao däjä, täbä bälöblawä lä yaiblai bä mölamaö jaödao co̦o mlaobä, ö̦jamö täcö nia didibou balöoma. Lasha 1.000 a lalou co̦o däjä, a jujeblamobä etä nia cuo ma cui, a nö nia dedejeblamaimi.