1 Juan 4:1 - Biblia Yanowamö

¹ Iba wamacö. Yai Bada tä Bufi jo̦wa lä tabou wejei bä lä cui, bä a̦ bejedi bufii showadao dijejä. Wama bä bejedi möö ja, bä a̦ ji̦liaö da balöoje, Yai Bada wama ebä nö ö̦jöböabä. Yanowamö täbä lä bälöblai bä yömölabeje, Yai Bada a wa̦no jole jole wäyälewä bluca bä a̦ ca̦i juaö malä cudujei.

1 Juan 4:1 Iomraidhean Croise

Marcos 13:21

’Ai bä a̦ ja, bä möla dijä —a cuma—. “¡Bei, bei! Yai Bada tänö a shömabä a lä yaileno wei a lä cui, ¡quijamö a wawälayou lä cufe!”, ai bä ma cuu wei ma cui, “¡Bei, bei! ¡Äyämö a waloqueyoluu lä cufe!”, ai bä ma cuu wei ma cui, ö̦jö bä a̦ bejedi bufibla dijejä.

Lucas 12:57

Abinaja Jesús a cuu co̦oma. —Yai Bada tänö tä tamaö lä bufii wei wama tä dabä wamacö waiquiwä ma cui, ¿wedi tabä wama tä li taimi?

Lucas 21:8

Abinaja Jesúsnö bä nowa tama. —Bä da moyaweicu, ö̦jö lä, wamacö mölamaö mlaobeje. Obi, bä lä jolemou wei bluca bä nia wawäblou. Camiyä ya wa̦fa nia ma wäyämou wei ma cui, bä möla dijä. “Ö̦jö ya”, bä nia cuu. “Tä bluca waicou bufio lä cule”, bä nia ca̦i ma cuu wei ma cui, ö̦jö bä nija bä nocao dijä.

Hechos 17:11

Ö̦jö bä judio lä cuinö tä a̦ ji̦liaö bufi doblaomaje. Ö̦jö bä bufi shino yai walalao dodijioma, Desalonicateli bä bufi lä cuono weinaja mlai. Cäcöbö a̦ nia bejedi fa möjenö, Yai Bada showadi etä a̦ oni mömaje.

Hechos 20:29

’¿Ö̦jö tawä? —Pablo a cuma—. Eja ya juu mladou däjä, cafä wamacö nia yabäcaö lä juo wejei ya tä daö. Yalo bä ishou lä culenaja, bä waitelimou cuaaö fa jeicunö, Yai Bada ebä nabä nia queoje.

1 Corintios 12:10

Ai a nö wa̦lojoblamaö mö fa fedulonö, tä nö lä quilijii tä wawämabä etä li ca̦i jibäaö mö feduo. Ai a nö wa̦lojoblamaö mö fedua fa showadalonö, Jesucristo ebä lä yododaö wei jamö etä a̦ wäyäbä etä ca̦i li jibäaö. Ai a mö feduwä lä cui, a bufi moyawämabou yalo, tä a̦ lä wäyämou wei tä a̦ nö bejedi ö̦jöböamobä etä li ca̦i jibäaö mö feduo. Yai Bada tä Bufinö täbä bufi lä taamaö wei däjä, tä nö bejedi ö̦jöböaö showaobä. Fecula bä läo lä ja̦too wei, ö̦jö bä nö ö̦jöböaö mö feduo showaobä etä ca̦i jibäaö. Ai a mö feduwä lä cui a fa bayelibonö, a caficö a̦ shominajaalanö tä a̦ wäyäbä etä ca̦i jibäaö showadao. Ai a bufi fa bayeliblanö, a caficö a̦ lä shominajaaö wei tä a̦ ja a bufi jaducäblobä etä ca̦i jibäaö, tä a̦ fe dolemabä.

1 Corintios 14:29

Ai bolacadabö bänö Yai Bada a wa̦no wäyäöje ja, täbä bufi nia bluca daeo.

1 Tesalonicenses 5:20

Yai Bada a wa̦no lä wawämaö wejei bä a̦ nofi ca̦i wa̦libo dijejä.

1 Tesalonicenses 5:21

Ö̦jö ma cui, wama bä a̦ bluca fa ji̦lianö bä a̦ bejediablalou da möje. Wama bä a̦ bejedi fa wabanö, tä a̦ lä dodijidai wama tä a̦ cadidibobä.

2 Tesalonicenses 2:2

Wamacö bufi jalujou mlai. “Bada tä nia fuu lä co̦o wei, tä mö jalu cublou waiquilayou lä cufe”, bä bufi jole cuu dijä. Bä mölaö si ijejeo dijä. Inaja ai bä ma cuu wei ma cui, bä jolemou. Bei bä bufi jamö tä a̦fa wawäblou ma taö wejei ma cui, bä jolemou. Ei malä cui. “Pablo ebä ca̦i lä cuinö tä si oniblalemaje”, bä jole ma cuu wei ma cui, ö̦jö yama tä a̦ oniblanomi.

1 Timoteo 4:1

Ö̦jö tä a̦ bejedi ma cui, Yai Bada tä Bufi a̦ cadidou. Abenaja a cuu. Tä nö fa dedelönö, yai bä lä jolemou wei ai bä a̦ fa ji̦liajenö, fecula bä a̦ ja täbä nia jo̦wa mölaö. Ö̦jö fecula bä a̦nö bejedi tä a̦ nia jo̦wa joyaöje.

2 Timoteo 3:13

Inaja bä taamalajenö, wa̦lidiwä tä lä taö wejei tä ja, bä bufi nia shi̦lo balaö. Jesucristo bufilewä bä a̦fa jole lä jilou wei bä ma cui, ö̦jö bä bufi ca̦i nia balaö mö feduo showao. Ö̦jö bä bluca lä cui, jolemou tä a̦ ja cama bä mölaö fa dicoonö, inaja showawä täbä nia ca̦i mölamaö cuo mö feduoje.

2 Pedro 2:1

Awei, Isaeli ebä nijamö Yai Bada a wa̦no wäyälewä bä lä cuinö a wa̦no wäyäö cuaamaje. Ö̦jö ma cui Yai Bada a wa̦no jole lä wäyäö wejei bä ca̦i cublamou showadaoma. Yai Bada a wa̦no wäyäö mlajei, shomi tä a̦ li wäyäö läomaje, cafä wamacö nija ai bä nia lä cuaaö weinaja showawä. Showadi ö̦jö tä nia cublou dicoo. Tä a̦ lä wayu wei tä a̦ lä cui, cama bänö tä a̦ ca̦i juu fa ja̦toojenö tä a̦ nia bufiblamaöje. Bä doblou lä mlai bä nowa lä co̦maqueno wei a Bada lä cui, ö̦jö ma cui a nia ca̦i waiije. Inaja bä lä cuaaö wei lobe bä nofi nia nacao, bä shämou showadaobä.

1 Juan 2:18

Ijilu bä. Ei tä ulifi nia lä mladou wei tä ajedou waiquiwä. Jesucristo a nofi yai lä wa̦libou wei a nia wawäblou. Ö̦jö lä wama tä a̦ ca̦i ji̦libou waiquia. ¿Ö̦jö tawä? A nofi lä wa̦libou wejei bä bluca wawäblou balöa waiquia yalo, ö̦jö bäma tä ajedewä daö.

1 Juan 2:7

Iba wamacö. Cafä wamacö nija Yai Bada tänö tä tamaö lä bufii wei ya tä a̦ oniblaö lä cule. Jesucristo wama a lä bufiblaleno wei däjä, wama tä a̦ jaba lä ji̦lileno wei tä a̦ showawä. Tä a̦ dudemi. Wama tä a̦ ji̦lia waiquilema.

2 Juan 1:7

Yanowamö täbä nijamö, täbä lä mölamaö wejei bä bluca jublou cuaaö waiquia lä cudi. Jesucristo a ma yanowamöblaleyoluno wei ma cui bä a̦ lämou. Tä a̦fa jole taö dicooje. Inaja bä lä cuu wei bänö täbä yai mölamaöje. Jesucristo a nofi yai lä wa̦libou wei a owämaöje, täbä lä mölamaö wei a lä cui. Inaja showawä a cama ca̦i cuu.

3 Juan 1:11

Bäfä lä nofimale. Wa̦lidiwä tä lä taö wejei bä owäma dijä. Bä lä dodijaö wei bä shino yai da owäma. Bä lä dodijaö wei bä lä cui, ö̦jö Yai Bada bei ebä li waiquiwä. Bä doblou lä mlai bä lä cuinö, Yai Bada tä daimije.

Apocalipsis 2:2

Iba Efesoteli bä lä cuaaö wei ya tä daö. Bä cadidou si ijejeobä tä cua ma mlai ma cui, bä dodijaö fe yadio. Bä ma yabäcamou wei ma cui bä waiquidoimi. Bä doblou lä mlai bä lä cui bä a̦ ji̦liaimije. “Jesucristo ya wa̦fa wäyäö cuaabä yale shömölema”, bä lä cuno wei bä lä cui, bä bejedimou fa wabajenö bä jolemou dalalemaje.