1 Juan 3:16 - Biblia Yanowamö

¹⁶ Jesús a lä cuaano wei tänö, fei däjä nofimou bäma tä shino daö. Bämalecö bayeliblabä a noshi umlao mlai ja, a shämolayoma. Inaja showawä, camiyä bämacö noshi ca̦i umlao mlai ja, Jesús bäma ebä bayeliblabä. Bämacö nomabä tä ma cule ma cui ja bämacö ojodaobä.

1 Juan 3:16 Iomraidhean Croise

Mateo 20:28

camiyä ya lä cuaaö weinaja showawä. Camiyä ya lä yanowamöblaleyoluno wei ya ma cui, ya nosiemobä ya junomi. Ya bä yai bayeliblabä, ya li waloqueyoluma. Yanowamö ai ya bä nowa ca̦i bluca co̦amabä, ya jöböamou mö juma —bä nowa tama.

Juan 10:11

’Oweja ya bä yai lä nowamaö wei, ei ya. Ö̦jö ya lä cuinö, oweja ya bä nowamabä, ya nia lä shämou wei tä ma cui ja, ya ojode.

Juan 13:34

Cafä wamacö nija ya tä tamaö lä bufii wei, ya tä a̦ dude wäaö lä cule. Bä da nofimayo. Cafä bämacö nofimaö lä waiquilenaja, inaja showawä, bä nofimayou da cuo.

Juan 3:16

’Yai Bada tänö yanowamö täbä nofimaö fa dodijionö, bä Ijilubö moli ya e lä cui yale shömölema. Wale a̦ bejedi lä bufii wejei bä bluca lä cui, bä nomaö mlai ja bä ba̦limi cuobä.

Hechos 20:28

Bä da moyaweicu, wamacö bejedimobä. Jesucristo ebä lä yaile ebä bluca bejedimou mö feduobä, bä da cadidamaje. Yai Bada cama ebä li. Cama bä Ijilubö a lä shämono wei ja, bei i̦yä bänö bä nowa fa comacönö bä li tabou. Wama ebä ca̦i cuobä, Yai Bada tä Bufinö wamacö li lämabou.

Romanos 16:4

Cäcöbä shämobä tä ma cuono wei ma cui, wale bayeliblaböö fe yadioma. Ö̦jö cudeenö, ö̦jö cäcöbä lija ya bufi doblalou. Jesucristo ebä lä yododoblai bä judio lä mlai bä ma cui, ö̦jö cäcöbä lija bä bufi ca̦i bluca doblalou mö feduo, wale bayeliblaböö cudeenö.

Romanos 5:8

Ö̦jö ma cui camiyä bämalecö bayeliblabä, dodijidawä mlai, wa̦lidiwä talewä bämacö yai cuo showao däjä, Cristo a shämoa lälayoma. Ö̦jö tä lä cublaliyono wei tä ja, Yai Bada tänö bämalecö yai lä nofimaö wei tä jimöa cadidiquema.

2 Corintios 4:12

Yama tä a̦ wäyäö tä nowa ja, yamacö shämobä tä cua ma cule, cafä wamacö ba̦limi cuo mö feduobä yama tä a̦ wäyäö fe yadiblou.

Efesios 5:2

Wama täbä nofimalanö bä ca̦i da cuoje, Cristonö bämalecö nofimaö lä culenaja showawä. Bämalecö bayeliblabä a nomaa lälayoma. Yai Bada lija täbä wa̦queshi nö li̦yoli lä u̦cucamou wei täbä dodobou lä cuaaö wejeinaja, inaja showawä, Cristo cama a jibäamou bufi doblao cuoma, Yai Bada a bufi doblamabobä.

Efesios 5:25

Bä fe̦yalobö wama ecönö, suwäböfä bä yai da nofimaje, cama bäma ecö lä cui, Cristonö bämalecö nofimaö lä cuaano weinaja showawä. Bäma ecö bayeliblobä a noshi malä ö̦jödaono wei.

Filipenses 2:17

Wale ma shäöje däjä ma cui, bämacö bufi bluca doblao fe yadiobä tä cua. Jesucristo wama a nofi mölabou yalo, wama a wa̦ malä fuaaö wei. Yai Bada lija yalo bä lä dodobou wejeinaja, cafä wamacö ma cui wamacö dodoa cua malä waiquile. Inaja wamacö cuaaö bufi doblao ja, camiyä ya bufi ca̦i doblao mö feduo. Jai bei toubä liyäyamou feyacao lä culenaja, camiyä bei ya i̦yäbö liyäyamou ma cublou däjä ma cui ja, ya bufi nia doblalou fe yadio.

Filipenses 2:30

Cristo lija a ojodamoma yalo a mili malä nomalayono wei. Cafä ai wamacönö wamale bayeliblaö doblou lä mlaono wei däjä, wale bayelibou fe yadiobä, cama a noshi malä ö̦jödaono wei. A nomaö nofi fo̦lio mlai ja, a ojodamolayoma. ¿Ö̦jö tawä? Dodijidawä wama a waloamaö co̦obä, ö̦jö lä.

1 Tesalonicenses 2:8

Bämacö nofimaö fe balojowä yalo, wamacö bayeliobä yamacö noshi ö̦jödaoma. Yai Bada yama etä a̦ dodijidawä wäyäö bufi doblaoma. Bämacö nofilema yalo, yamacö nö bleaaö nofi fo̦lionomi.

Tito 2:13

¿Ö̦jö tawä? Jesucristo bäma a itou nö dabolanö, bämacö cadidobä. Bufi doblalolanö, bämacö nö dao. Bämalecö lä fucäaö wei Jesucristo a Bada lä cui, bäma a lä bufiblale, ö̦jö bäma a nö dabou. A nofi nia lä doablamou wei bäma a ca̦i doblao dablabä.

1 Pedro 1:18

Wamacö nö badabö bälöo doblou lä mlaono weinaja wamacö cuaaö dicoo mlai. Cama bä nö jaba bleaaö lä cuaano weinaja wamacö cuaaö fa nodionö, wamacö doblonomi waiquiwä. ¿Ö̦jö tawä? Wamacö doblou ma mlaono wei ma cui, Cristonö tä nowa co̦maquema. Wama tä daö. Täbä ba̦limi lä mlai täbänö wamacö nowa co̦amanomi. Blada bänö mlai, olo bä ca̦inö mlai.

1 Pedro 2:24

Cama mayo mlai ja, camiyä bämacö mayo ja a yai shämolayoma. Wa̦lidiwä bäma tä lä tano wei, cama nija tä bluca fa yädäblalunö, fii balitama defi jamö ö̦jö tä ca̦i bluca wa̦lidiwä yauoma. Wa̦lidiwä tä ja bämacö cuo co̦o mlaobä a li inaja cuaama. Nomawä bä yabäcäomi lä culenaja bämacö fa cuonö, tä lä dodijidai tä jamö bämacö shino yai cuo nomöjöobä. Cama a lä dusimalaleno wejei tänö, bämacö bufi malä jalolayono wei.

1 Pedro 3:18

Cristo a ma cui, nowa mlai ja a nö malä bleaamano wejei. Camiyä bämacö doblou lä mlai tä nowa ja, ö̦jö cä lä a moli shämoa malä showadalayono wei. A yai lä cadidou wei a lä cui, a shämoa lälayoma, bämacö cadidou lä mlai, Yai Bada nija bämalecö lulubobä. Bei a yai nomaa cadidilayoma ma cui, Yai Bada bei a Bufinö a demi jocädamaö co̦layoma.

1 Juan 2:6

“Ö̦jö nija ya cua”, bämacö lä cuu wei, Jesús a lä cuaano weinaja bämacö cuaaö mö feduobä bämacö.

1 Juan 2:9

Ai bä lä cui, “Shi̦i wacacawä tä jamö ya cua”, bä ma cuu wei ma cui, cama ebä mashi nofi wa̦libou dicooje ja bä jolemou. Mö didi jamö bä cua showaa.

Apocalipsis 1:5

Jesucristonö wamacö nofi ca̦i ojodabobä, wamacö bufi ca̦i yanöcömabobä, Yai Bada a wa̦fa wäyäö lä cadidou wei a lä cuinö. A jaba demi jocädou lä co̦layono wei a showawä lä cuinö. Bita jamö bä bada lä cublai, ö̦jönö bä bluca nosiemaö. Ö̦jö Jesucristo a lä cuinö bämalecö nofimaö fe balojowä. Bämacö doblou lä mlai tä blucanö bämacö ma ja̦ono wei ma cui, ö̦jö a fa shämolunö, i̦yäbö fa falönö, bämalecö jujeblamalema.

Apocalipsis 5:9

Amowa dude tä a̦ ca̦i tamaje. Abinaja bä amowabö a̦ cuma. Oni wa si däabä, mai wa cocobä caloblabä, cafä wa yai. Cafä wa shämou fa läonö, bei wa i̦yäbönö yanowamö wa täbä nowa bluca malä comaqueno wei. Yai Bada tänö bä tabobä, bluca bä yaiablalou lä nodiaö wei bä nijamö, cama wa ebä nowa comaquema. Bluca bä caficö a̦ lä bou wejei bä nijamö ca̦i. Shomi bä bluca lä bälöblai bä nijamö ca̦i. Bluca bä bälöblawä lä yaiblai bä nijamö ca̦i.