Matthieu 7:21 - Nouveau Testament en Gulay 2004

²¹ Nanan ke ɓar’m ede nè: «Ngar, Ngar» karè à ile nja’n kêm konɓee ke danrán lé. Nè nanan ke ra nyan ke kêm Bɔ’m ke danrán ndige ɓita à ile nja’n kêm Konɓee’t le Bɔ’m nga ɓai.

Matthieu 7:21 Iomraidhean Croise

Matthieu 12:50

Nanan ke ra nyan ke kêm Bɔ’m ke danrán ndige ɓaa, è nè nga è tite ngokon’m ke dingem se kon nann’m se kon’m ke get a tɔ.

Matthieu 16:17

Jésu ede Pierre ede nè: – Simon, ngonn Jonas, rai neli tede è doo ndul á ade kumi gang dè tà’t nè nga lé. Nè è Bɔ’m ke danrán kuwe ade kumi gang dè tà’t nè nga.

Matthieu 18:10

An-in! tá nè a kin-in nedi ngonn karé bè dann madennge’t nè. Man m’ede sei titeke dooge le de ke danrán ndai tàkum Baa ke ndi danrán ndêrm se ndɔ karé-karé malang tede tà le de.

Matthieu 18:19

Kerɔte kuwe, man m’tel m’ede sei ɓai, ke nè á dooge joo dann si’t dè nang nè umi tà le de nan’t le deji nyan ke bain-bain géa, Bɔ’m ke ndi danrán à ade de nyan nè nga kuwe.

Matthieu 18:3

– Kerɔte kuwe, man m’ede sei ndàt, ke nè á i turi hal si, i teli i tooi asinan se ngannge ke dap-dap lé ɓaa, a ulei dè si kêm Konɓee ke danrán ndan lé.

Matthieu 18:35

Jésu ede de ede nè: – Ke nè á nanan dann si’t ade kêm’n tin mbit dè ngokonn’t se kêmnda káng lé ɓaa, Bɔ’m ke danrán géa à ra se’n titeke bè kuwe tɔ.

Matthieu 19:24

Man m’tel m’ede sei ɓai: le kade lugman ur bolè libri’t tee nga è nyan ke tur ngain. Nè le kade baw ile nja’n kêm Konɓee’t le Nube nga, è nyan ke loo’n tur ngain dum le lugman ɓai.

Matthieu 25:10

Nè loo ke d’a d’aw ke loo ndogonn’t ɓai ɓaa, njè taa dinye kige nga tee pan. Ngamandege ke uwei dè nja ra de nga uri lêbêt awi se njè taa dinye kige nè nga kei nan’t. Ke loon’t nè kuwe d’utu tàbit kei.

Matthieu 25:21

Kuwe’n tel ile’n dè’t ede nè: «Maje ngain, i i ngonn njèndi ke maje, m’ase kum kêm’m dèi’t kuwe. Nyan ke ndêin bè ke ndɔ ke m’adi nga, i tɔse kumi dè’t ade tee kɔde. M’a m’ɔri kundei ke njèkan dè nyange le’m ke rang ɓai. I ree, i ra ranel se’m man kuwei.»

Matthieu 26:39

Jésu aw mbɔr ke kété ɓaa, oso labe tà kêm’n nang ɔje tà se Nube ede nè: – Bɔ’m, i asekum kute nyantosowur nè nga dèm’t mbeng ke rang kuwe. Né è bè géa, i ra nyan ke kêm’m man á ndige lé, nè i ra nyan ke kêmi ndige.

Matthieu 26:42

Jésu ɔte aw heb ɗêk ɔje tà se Nube njékon’t joo ede nè: – Bɔ’m ke nè á loo ke kade ute nyantosowur nè nga dèm’t mbeng ke rang goto ɓaa, i ra nyan ke kêmi ndige.

Marc 3:35

Nanan ke ra nyan ke kêm Nube ndige ɓaa, è nè nga è ngokon’m, se kon nann’m a tɔ.

Marc 9:47

Ke nè á kumi è nyan ke à tugei jig’t kade oso dann majelé’t ɓaa, uwe’n ɓarak ɔr’n kɔke. Kawi se kumi ke karé kêm Konɓee’t le Nube nga, maje dum kade d’ilei se kumi joo mbak loo ke tur’t.

Tà ke Maje ke Luc ndang 11:28

Nè Jésu ile’n dè’t ede nè: – Nè dooge ke ra de à nel de ke get-get nga, è njé ke ooi tà le Nube a, an-in dè sêw-sêw a tɔ.

Tà ke Maje ke Luc ndang 13:25

Loo ke kuwe-kei à ɔse nang le kin dɔ kutu tà rebe ɓaa, ei ke nain-in nata à kunni gir kunde tà rebe kedi nè: « Kuwe-ɓee, tài tò nják, ɔr tà rebe ade jè.» E à tel kile sei dè’t kede nè: «Man m’ger sei lé.»

Tà ke Maje ke Luc ndang 18:25

Le kade lugman ur kêm bolè libri’t tee nga è nyan ke tur ngain lé, nè le kade baw um nan’t bɔk se Nube nga è nyan ke tur ngain.

Tà ke Maje ke Luc ndang 6:46

Ké bain á sei ɓari man «Ngar, Ngar» se ndɔge malang, nè i rai nyan ke man m’unn ndu’m kade i rai nga lé wa?

Jean 14:7

Ke nè á i geri man ɓaa a i geri Bɔ’m tɔ. Unn gir ɗarinè sei geri nin ɓá a, sei an-in nin ɓá a tɔ.

Jean 15:23

Doo ke ɔr’m njêt ɓaa, ɔr Bɔ’m njêt tɔ.

Jean 3:5

Jesu tel ile Nicodème dè’t ede nè: – Kerɔte kuwe, man m’edi ndàt: ke nè á d’ule doo manné njonm d’ade Ndil oje’n lé ɓaa, è asekum kule dè’n kêm Konɓee’t le Nube ndan lé.

Jean 5:17

Nè Jésu ede de ede nè: – Bɔ’m ndi ra kule kum’n ke kété-kété sár tee ɗarinè ɓai. Man géa m’ndi m’ra kule kum’m ke kété-kété tɔ.

Jean 6:40

Nyan ke kêm Bɔ’m ndige á tò nè: Nanan ke oré kum’n dè’m man Ngonnnen’t a, unde kêm’n dèm’t a tɔ ɓaa, è à ndi kumgajer se non. Taɓai man m’ade à unde loo tee dann njé ke koo’t ndɔ ke ngeinn’t a tɔ.

Jean 7:17

Ke nè á doo karé ndige ra nyan ke kêm njèkule’m Nube ndige ɓaa, à ger tite nyan-ndó nè nga in ra Nube’t. E man kuwe á m’in se dè’m m’ndó nyan dooge lé.

Nyanra Njekawkulege 14:22

Njétaakêm-Kristge ke ndii kêm ɓee-bòge’t nè nga, Paul se Barnabas ulei dingem kêm de’t a, ndeje de kade awi kum de ke kété dè kundekêm de dè Nube’t le de. Taɓai ei edi de edi nè: – Gar-gar nyantosowurge à ra jèi ngain ɓita j’à j’awi kêm Konɓee’t le Nube ɓai.

Nje Ke Rome 12:2

Umi nan’t lêtêt se dooge ke ndii dè nang nè ɗarinè nga lé. Nè inyei Nube adi tel sei ke dooge ke kige a, ade ade sei tàgir ke kige a tɔ. Titeke bè á a i teri nyan ke maje ke kêm Nube ndige a, nyan ke maje ɔr njêt ke à taa kum’n ɗekm a tɔ.

Nje Ke Rome 2:13

Dooge ke Nube ɔr tà dè de’t nga, ei njé ke dé tute gute-ndu d’ade ooi se mbi de karè lé. Nè Nube ɔr tà dè dooge ke rai nyange ke gute-ndu ɔje.

Nje Ke Ephese 6:6

I rai tede tàkum de éké le taa’n kum dooge karè lé. Nè i rai kule se kem̂nda káng tite ɓerge le Krist ke rai nyan ke kem̂ Nube ndige.

Nje Ke Colosses 4:12

Epaphras, doo ke ɓee le si nú ra sei lapya. E ɓer kule le Nube ke ndi ra rɔ se ndɔge malang tede le si loo kɔje tà’t le’n se Nube. E ra titeke bè kade i ndai dè nja si’t njáng a, i maji ɔri njêt a, i geri nyan malang ke kem̂ Nube ndige a tɔ.

1 Nje Ke Thessalonique 4:3

Nyan ke taa kum Nube nga è le kade ra si unju nyang-nyang a, le kade ɔgi ra si dè tò se nan ke kaiya’t a tɔ.

1 Nje Ke Thessalonique 5:18

I rai Nube oiyo dè nyange’t malang. E á è nyan ke Nube ndige le kade sei ke umi nan’t bɔk se Jésu-Krist i rai.

Tite 1:16

Dooge nè nga tami edi nè: N’geri Nube, nè nyanra de ɔrgir de titeke dé ger Nube ndan lé. Dooge nè nga ei dooge ke tooi yêr tàkum Nube’t. Dé njé dum nange, d’ase ra nyan ke maje karé bè géa lé.

Hebreuge 13:21

Maje kade Nube ke njè kade jèi kem̂lom ade sei tɔg si ade i rai nyange ke maje ke se ri de-ri de. Maje kade ade sei tɔg si kade i rai nyan ke kem̂’n ndige. Maje kade Nube ade jè rai nyange ke taai kum’n takul Jésu-Krist. Maje kade ndubra è le Krist sár se non. Maje kade è titeke bè kuwe.

Hebreuge 4:6

Njé ke ndɔ ke d’ile mber Tà ke Maje d’ade ooi kété sàk-sàk nga, ei ilei nja de loo taa kebe’t nè nga lé tede ei unni mbi dè tà’t nè nga. Nè dooge ke nange à ilei nja de loo taa kebe’t le Nube nè nga kerɔte.

Jacques 1:22

Adi kum si sú sei lé. Tà ke Maje ke ooi nga, i rai nyan’n se ndɔge malang m ooi ke koo karè lé.

1 Pierre 2:15

Nube ndige kade i rai nyange ke maje tede kade uwei tà njé kem̂ tɔ kuju tà lége dè tàge ke tami se si dè mbe’t nga.

1 Pierre 4:2

E ebe ra’n dè ra majelé tede le ra nyange ke kem̂ dooge ndige nga ndan lé, nè le ra nyan ke kem̂ Nube á ndige loo ke è ndii’n kumgajer dè nang nè ɓai.

Lookilera’n 2:27

Dooge ke têti rɔ nga à ɔri non dooge ke geri Nube lé se kage-tɔse nar a, à rundi de titeke dé rundu’n jó hanje bè tɔ.

Lookilera’n 22:14

Njé ke togoi kubu le de ke bòi yul-yul nga, ra de à nel de kuwe. Ei asikum kuse kann kage ke doo à ndii’n kumgajer nga a, à asi kingei tà rebe kaw kem̂ ɓee-bò’t nè nga a tɔ.

Lookilera’n 3:5

Titeke bè á nanan ke tête rɔ ɓaa, d’a tule kubu ke nda káng-káng rann’t. M’a m’tuju ri’n kɔke kem̂ magtub ndikumgajer’t nga lé. Nè m’a m’tam ndàt non Bɔm’t se non dooge le’n ke danrán titeke dooge nè ei lemge kerɔte kuwe.