Matthieu 6:13 - Nouveau Testament en Gulay 2004

¹³ Maje kade inye loo ade nyan sú nan jè lé, nè ɔr jè dann nyan ke majelé’t kɔke.

Matthieu 6:13 Iomraidhean Croise

Matthieu 26:41

I ndii dè nja si’t ɔji tà se Nube tede le kade osoi dann nyan sú’t lé. Ndil si ndi kum kuwe, nè danra si á yai.

Matthieu 28:20

I ndói de loo kile koje dè ndukunnge malang ke kété m’unn m’ade sei nga. An-in! man nga géa m’a m’ee der gir si se ndɔ karé-karé malang sár ndɔ ke ngeinn’t.

Matthieu 5:37

Ke nè á tà le si è oiyo ɓaa, è oiyo. Ke nè á tà le si è ḿ-m̀ ɓaa, i tami go karé edi nè ḿ-m̀. Tà ke rang ke i tami ilei dè made’t nga in ra njèkêmyêr’t.

Matthieu 6:10

Maje kade on ɓee dè dooge a, maje kade dé ra gute ndui d’ade ɔr njêt titeke dé ra’n danrán a tɔ.

Jean 17:15

M’deji tede kade i tɔr de kɔke dann dooge ke dè nang nè lé, nè le kade ai-in ngang de garar-garar ade Sú ke njèkêmyêr ɔde ra de lé.

1 Nje Ke Corinthe 10:13

Nyan ke nan sei nga, è gàr nyan ke nan doo-ndul madesige kuwe tɔ. Nube è njèkinye go kunn-nduge le’n lé. Ke nè á nyan nan sei ɓaa, Nube à inye sei kade nyan nan al dè tɔge si lé. Nube à ade sei gos korè tà njak kade undei loo i teei dann nyan nan’t nè nga.

1 Nje Ke Corinthe 14:16

Ke nè á i deje ndutɔr se ndili ɓaa, doo ke karé ke ger tà ke i tam nga lé ndi tutu ɓaa, ké à ndige kede nè: «Maje kade è titeke bè» dè ndutɔr ke i deje nga titeke bain wa? Tede è ger tà ke i tam nga lé.

2 Nje Ke Corinthe 1:20

Krist è «oiyo» ke ribe dè ndukunnge le Nube malang ke ɔje kêm’n le ra. E se takul’n á j’ede’n nè «Maje kade è titeke bè» tede kule’n ndubra dè Nube’t.

Nje Ke Galatie 1:4

Jésu Krist inye ra’n è kuwe ade yo tede kaiyage le jéi. E inye ra’n ade yo tede le kɔr’n jéi wont ji tɔgmong ke majelé le dè nang nè nga se go kem̂ndige le Bɔ jéi Nube.

1 Nje Ke Thessalonique 1:10

Ɗarinè sei nginei Ngonn le Nube ke à in danran. Ngonn nè nga, è Jésu ke ndɔ ke Nube ade unde loo tee dann njé ke koo’t. Jésu à in danrán tel ree le kɔr jèi tà wong ke ndi à ree.

2 Nje Ke Thessalonique 3:3

Kuwe-ɓee è njègel goto: è à ade a i ndai dè nja si’t njáng a, à an dè si sêw-sêw le kade njè kem̂ majelé gang kɔte si’t lé.

1 Timothee 1:17

Ngar ke njèndi se non, ngar ke njè kwei lé, ngar ke doo asekum kan’n lé, Nube karé bere luk-luk nga, maje kade riɓar se ndubra ei le’n sár se non. Maje kade è titeke bè kuwe.

Hebreuge 11:36

Nè njé ke nange ke rang ɓaa, ndɔ ke d’ule mbe dè de’t a, dé tunde de se ndêin a tɔ. Ndɔ ke dé tɔ njé ke nange se sul a, dum de dangai’t a tɔ.

1 Pierre 5:8

I ndii kum si karè, ɔgi kum si ɓi. Sú ke è njèban le si nga uje rɔ ringe’n tite toboi bè. E sang doo ke le kuwe’n kuse’n.

2 Pierre 2:9

Kuwe-ɓee Nube ger loo kɔr njé ke ilei koje dènn’t dann nyan ke à nan de. Nè è ger loo kunde njé kem̂ majelége konn le ngine’n ndɔ gangtà. Ndɔ nè nga, kure nyanra de à ɔde kum de labi-labi.

1 Jean 3:8

Nanan ke ra kaiya se ndɔ’n-ndɔ’n ɓaa in ra njè kem̂ majelé’t, tede njè kem̂ majelé nga unn gir ra majelé se ndɔge malang kété mari ke desêin. Gir’n ‘ke nè á Krist, Ngonn Nube unde’n loo tee’n pan tede le tuju nyanrage le njè kem̂ majelé nga kɔke.

Lookilera’n 1:18

Man nga m’ee njèndi kumgajer. Man nga ndɔ ke wei ɓá. An! ɗarinè, m’ndi kumgajer sár se non. Man nga m’aw se tɔgmong dè yo’t a, dè ɓee le njé ke koo’t a tɔ.

Lookilera’n 19:1

Go nyange’t nè nga, m’oo ndu doo ɓar danrán beng tite ndu kosdoo-bulege bè ede nè: «Alléluia! i piti Kuwe-ɓee le jéi, tede kaje a, se ndubra a, se tɔgmong a tɔ ei le’n è kuwe.

Lookilera’n 19:4

Ngatɔgege ke kɔr-joo-gidé-sɔ se nyankundege ke sɔ nga ɔsi keje de nang non Nube ke ndi dè kutu-ngar’t ɗɔyi nin edi nè: «Amen! Maje kade è titeke bè kuwe! I piti Kuwe-ɓee!»

Lookilera’n 2:10

I ɓel nyankumndoo ke à rai nga lé. An! njè kem̂ majelé à tile dooge ke nange dann si’t dangai’t tede nan’n sei. Nyantosowur à ra sei ndɔ dɔg. Um kem̂i dèm’t i nda njang sár ndɔ kwei’t ɓaa, m’a m’adi jɔkɔ kunn banga ke ndikumgajer nga tɔ.

Lookilera’n 21:4

Nube à tise mann non kum de’t ndát-ndát. Yo se kumndoo yo se kem̂kon à gotoi njing se non. Non se wuwi à ɓar gugu bè lé njing ta. Nyange ke mari gotoi njêl karè.»

Lookilera’n 3:10

Ndɔ ke m’unn ndu’m m’adi kade oré tài njak dè kundekem̂’t. Ɗarinè i an dè ndukunn le’m nga sêw-sêw; ɓaa, man géa, man m’ee der giri ndɔ nyantosowur’t. Kerɔte kuwe, nyantosowur à ree le nan dooge malang ke ndii dè nang nè.

Lookilera’n 3:14

Doo ke m’an’n nga tam ede nè: «I ndang magtub nè ade doo ke danrán ke njèkan dè njékebe nange le Nube ke kem̂ ɓee-bò ke Laodicée. Doo nè nga dé ɓar’n «Amen», maje kade è titeke bè kuwe. E ke njèkɔrgo tà ke get ke dooge undei kem̂ de dènn’t. E kuwe è ngire gir nyankundege le Nube malang. E tam ede nè:

Lookilera’n 5:13

Go’t gugu, m’oo ndu nyankundege malang ke danrán se ke dè nang nè, ke gir nang’t se nyankundege ke dè ba-bò’t se nyankundege malang ke Nube unde de ɔsi pa edi nè: «E ke njè ndi kutu-ngar’t a, Ngonn bate a tɔ nga, maje kade ɗɔi se riɓar, ndubra se tɔgmong ei le’n kuwe sár se non.»