Matthieu 26:28 - Nouveau Testament en Gulay 2004

²⁸ Oiyo, è ke nè nga è mese’m, mese mann-ra ke d’ade an-in dè nang nè kade dooge bule ingei kêm tin mbit dè kaiyage’t le de.

Matthieu 26:28 Iomraidhean Croise

Matthieu 20:28

E titeke bè á man ke m’ee Ngonn doo nga, m’ree’n dè nang nè. M’ree le kade dooge ei ngann njékulege le’m lé, nè m’ree tede le k’ee ngonn njèkule le dooge a, le kinye ra’m kade yo tede le kuge’n dè de a tɔ.

Matthieu 26:27

Go’t gugu è unn nyankain mann nduu deje ndutɔr le Kuwe-ɓee ɓita tel’n ade njékuwe-girnge ede nè: –Umi pêrm-pêrm adi nan gute malang.

Matthieu 26:29

Man m’ede sei ndàt, m’a tel kain mann nduu nè gugu ndan lé sár kade ndɔ ke m’an-in’n se si njè ke kige kêm Konɓee’t le Baa.

Matthieu 6:12

Maje kade ade kêmi tin mbit dè kure majelége’t le jé titeke jè géa j’ade kêm jé tin mbit dè kure majelé ke made jége rai se jé.

Marc 1:4

Jean ke njèkule dooge manné njonm unde loo tee kêm dile’t ile mber ede nè: – I turi hal si adi d’ule sei manné njonm. Titeke bè á Nube à inye’n go kaiyage le si.

Marc 14:24

Taɓai Jésu ede njékuwe-girnge ede nè: – E ke nè, è mese mann-ra ke an-in uge dè dooge bule.

Tà ke Maje ke Luc ndang 22:19

Loo ke è unn mapa nè ɓá ɓaa, è ra Nube oiyo kété ɓita uwe tête danné ade de ede nè: – Mapa nè nga è danra’m ke m’a m’inye kade tede le si. I têti nan usei adi kêm si olé’n dèm’t.

Tà ke Maje ke Luc ndang 22:20

Go’t gugu è taa nyankain mann-nduu nè nga ade de titeke è ra’n se mapa ede nè: – Mann-nduu nè nga è mann-ra ke kige ke Nube mann’n ra’n takul mese’m ke d’a d’ade à an-in nang tede le si.

Nje Ke Rome 5:15

Kêmnoje le Nube dum dè kaltà le Adam ɓai. Kerɔte kuwe, dooge ngain weii yo kaltà le Adam ke se kar’n. Nè né è bè géa, noje ke Nube uwe se dooge bule takul doo karé bere ke è Jésu-Krist nga, dum dè kaltà le Adam.

Nje Ke Rome 5:19

Kaltà le doo karé bere á ndɔ ke kosdooge ei njé ra majelége. Takul kile koje le doo karé bere á tà à ɔr’n dè kosdooge’t tɔ.

1 Nje Ke Corinthe 11:25

Loo ke d’use mapa ɓá ɓaa, è unn nyankain mann yibe nduu ra titeke bè tɔ ede nè: «Yibe nduu nè nga, è mann-ra ke kige le Nube. Mann-ra nè nga à tɔ sár takul mese’m ke an-in nang. Dɔ-dɔ, loo ke a an-in yibe nduu nè nga ɓaa, i rai è nè nga adi kêm si olé’n dèm’t.»

Nje Ke Ephese 1:7

Takul Krist ke wei ade mese’n an-in nang á j’ingei nyankuge dè jéi ɓee ɓer’t a, Nube ade kem̂’n tin’n mbit dè kaiyage’t le jéi a tɔ. E kem̂noje ke bò ke gar’n goto á Nube uwe se jéi!

Nje Ke Colosses 1:14

Takul ngonn’n nè nga á j’ingei nyan gang dè jéi a, j’ingei kem̂ tin mbit dè kaiyage’t le jéi a tɔ.

Nje Ke Colosses 1:20

Takul Krist á nyange malang ke danrán se ke dè nang nè umi nan’t se Nube. Nube unde gir kem̂lom takul mese Ngonn’n Krist ke ndɔ ke tò se ninn’n.

Hebreuge 10:29

Doo ke an Ngonn le Nube ke nyan lé nga, d’a gangtà ke tò ɓel dènn’t dum madege ke rang. Ké sei giri bè an-in lé wa? Kerɔte kuwe, doo nè nga ile koje dè mese mann-ra ke d’ɔr’n d’unde’n se ninn’n gai nga lé. E nede Ndil-Kem̂nda ke njè kade jè geri kem̂noje le Nube nga.

Hebreuge 13:20

Nube ke njè kade jèi kem̂lom, è ade Kuwe-ɓee le jéi Jésu unde loo tee dann njé ke koo’t. Nube ɔr’n unde’n ke maw njèkul batege. Jésu unde gir mann-ra ke à tò sár se non se mese’n è kuwe.

Hebreuge 9:28

Krist inye ra’n ade ke nyankuje-mese nja karé bere luk-luk ke ngang’n tede kɔr’n majelé le dooge bule. E à tel le ree ke njèkon’t joo ɓaa, è tede kɔr majelé le dooge tɔ lé ta, nè tede kaje njé ke ndii nginei nin tchên ta.

1 Jean 2:2

E nga inye ra’n ade yo ke nyan kɔr kure kaiya tede kade kem̂ Nube tin’n mbit dè majelége’t le jéi. Nube à ade kem̂’n à tin mbit dè majelége’t le jéi se kar jéi lé, nè à ade kem̂’n à tin mbit dè majelége’t le dooge malang ke dè nang nè.

Lookilera’n 7:14

M’tel m’ile ngatɔge nè nga dè’t m’ede nè: «Kuwe’m, i i ger de mbak.» Ngatɔge nè nga ede’m ede nè: «Dé nè nga d’in dann nyantosowur ke bò’t. Dé togo kubuge le de ke bòi yul se mese Ngonn bate d’ade nda káng-káng.

Lookilera’n 7:9

Go nyange nè nga, m’an loo gerer ɓaa, m’an kosdooge ke se dè ɓee-ɓee bulei ɗik-ɗik ade doo asekum mbɔje de lé ndai girm. Dooge nè nga in-in dann girkoje dooge ke se dè ɓee-ɓee a, se dann girkoje le dooge malang ke dè dè nang nè ke tà tam de è gai-gai a, se kosdooge malang a tɔ. Dooge nè nga tulei kubuge ke nda ke bòi ɔr gide nja de nang ndêt-ndêt. Taɓai uwei mbi mar ji de’t ndai se nja de dɔ non kutu-ngar’t se non Ngonn bate’t.