Matthieu 10:1 - Nouveau Testament en Gulay 2004

¹ Jésu ɓar njékuwe-girnge ke dɔg-gidé-joo ade reei rann’t. E ade de tɔgmong le kade dumi dè ndilge ke majelé a, se le rɔ’n de a tɔ. Tɔgmong nè nga, è ade de le kade d’ɔr’n ratur ke rara géa ra njératurge’t a, se njé ke kêl ra wei tonrin a tɔ.

Matthieu 10:1 Iomraidhean Croise

Matthieu 19:28

Jésu tel ede de ede nè: – Kerɔte kuwe, man m’ede sei ndàt, ndɔ ke d’a tel gɔl nyange malang kade tel tò loon’t gugu nga, man ke m’ee Ngonn doo m’a m’al ɗáng ndi dè kutu-ngar ndubra’t le’m ɓaa, sei ke unni dè nja’m têr-têr nga géa a i ndii dè kutu-ngarge’t ke dɔg-gidé-joo le gangtà dè girkà’t le kosdooge ke Israel.

Matthieu 26:20

Tà ndɔ’t ɓaa, Jésu se njékuwe-girnge ke dɔg-gidé-joo awi ndii tà nyankuse’t.

Matthieu 26:47

Loo ke tà nain tà Jésu’t ɓai ɓaa, Judas njèkuwe-gir-Jésu ke karé dann njé ke dɔg-gidé-joo’t ɔr non kos njérɔge mbuu tee’n pan. Kos njérɔge nè nga ei se kuye kaskar, se ɗugur kage ji de’t kêl-kêl. E maw njékuje nyan-mesege se ngatɔgege le kosdooge ke Israel á ulei kos njérɔge nè nga.

Matthieu 4:23

Jésu aw se loo-loo kêm ɓeekon ke Galilée bere mbak ndó dooge nyan kêm kei kebe nange’t le de ile mber Tà ke Maje ɔje dè konɓee le Nube a, ɔr ratur ke rara ra njératurge dann kosdooge’t a, se njè ke kêl ra de wei tonrin a tɔ.

Matthieu 6:13

Maje kade inye loo ade nyan sú nan jè lé, nè ɔr jè dann nyan ke majelé’t kɔke.

Matthieu 9:35

Jésu aw se kêm ɓee-bòge se ngann ɓeege malang ndó dooge nyan kêm kei kebe nange’t le de. E ile mber Tà ke Maje ke ɔje dè Konɓee le Nube ade de a, è ɔr ratur ra njératurge’t se njé ke kêl ra de wei tonrin a tɔ.

Matthieu 9:38

Bè ɓaa, ɔji tà se Kuwe-ɓee ke njè ko le kade ule njé sa koge loo sa ko’t le’n.

Tà ke Maje ke Luc ndang 10:19

An-in! man m’ade sei tɔgmong le kade i tubei dè li jênênnge se kuju-nang-ge nang a, le kade i leri tɔgmong le njèban nang làr a tɔ. Nyan karé bè géa à ra sei majelé lé.

Tà ke Maje ke Luc ndang 21:15

Tede tà kumkunju ke m’a m’ule tà si’t nga, doo karé bè géa dann njébange’t le si asekum naje sei tà’t éké kile sei dè tà’t ndan lé.

Tà ke Maje ke Luc ndang 24:49

Nyan ke Bɔ’m unn’n ndu’n ade sei nga, an-in! man kuwe m’a m’ule’n kade sei. Nè sei ɓaa, i ndii kêm ɓee-bò’t nè kuwe sár kade ingei tɔgmong ke à in ra Nube’t ɓita.

Tà ke Maje ke Luc ndang 6:13

Loo ke loo ar yerer ɓá ɓaa, Jésu ɓar njékuwe-girnge rann’t. E tɔr njé ke dɔg-gidé-joo nga unde de se ninn de ke njékawkulege.

Jean 17:2

I ade ngonni tɔgmong dè dooge malang ke dè nang nè. Dooge malang ke i ade de se’n nga, è ade de ndikumgajer se non.

Jean 3:27

Jean ede de ede nè: – Doo asekum kinge nyan se dè ra’n lé. Nyan ke Nube kuwe ade doo tá doo asekum kinge.

Jean 3:35

Bɔ Ngonn tár ngonn’n ngain. E tel se nyange malang um jinn’t.

Jean 6:70

Jésu tel deje de ede nè: – Sei ke dɔg-gidé-joo nè nga, ké è man kuwe á m’tɔr sei lé wa? Nè né è bè géa, è ke karé dann si’t tel è doo le sú ke njèkêmyêr.

Nyanra Njekawkulege 1:8

Nè sei a kingei tɔgmong le Ndil-Kêmnda ɓaa, sei a teli k’eei njékɔrgo tàge le’m kêm ɓee-bò ke Jérusalem a, se ɓeekon ke Judée bere mbak a, se ɓeekon ke Samarie a, sár kade ɔri son nang nè njêt a tɔ.

Nyanra Njekawkulege 19:15

Nè ndɔ karé bè, ndil ke majelé ede ngann le scéva ede nè: – Jésu ɓaa, m’ger’n mbak, Paul géa m’ger’n a tɔ. Nè ké sei sei nange wa?

Lookilera’n 12:1

Go’t gugu, nyantɔje ke bò unde loo tee kàde danran’t. Dinye karé ule kàde rann’t tite kubu bè. E ube nan gir njann’t a, ule jɔkɔ kɔnyonge dɔg-gidé-joo dènn’t a tɔ.