1 Pierre 1:3 - Nouveau Testament en Gulay 2004

³ Bɔ Kuwe-ɓee le jéi Jésu-Krist nga, maje kade dè’n mong káng-káng. E tel oje jèi kige se go kem̂kanm le’n ke al dè loo takul kunde ke è ade Jésu unde loo tee dann njé ke koo’t. Gir’n ke nè á j’undei kem̂ jéi tchên dè ndikumgajer’t.

1 Pierre 1:3 Iomraidhean Croise

Jean 1:13

Ei nè nga teli ei ngann le Nube se go girkoje le de ke dè nang nè lé. Nè girkoje le de in ra Nube’t ke njè kade de kebe ke kige.

Nje Ke Rome 12:12

I rai ranel dè nyan ke sei undei kêm si tchên dè’t nga. Oréi tà si njak dann nyantosowur’t ɔji tà se Nube se ndɔge malang m ebi’t lé.

Nje Ke Rome 15:13

Maje kade Nube ke j’undei kêm jéi tchên dènn’t ade sei ranel se kêmlom ke deri takul kêm si ke undei dènn’t nga. Titeke bè á kundekêm tchên le si à ra’n tɔge ke kété-kété se go tɔgmong le Ndil-Kêmnda.

Nje Ke Rome 4:25

Kuwe-ɓee le jéi Jésu nga, d’ule’n ji dooge’t d’ade tɔli nin tede ra majelége le jéi. E unde loo tee dann njé koo’t tede kade Nube ɔr’n tà dè jéi’t.

Nje Ke Rome 5:10

Kerɔte kuwe, kété jéi njébange le Nube. Nè ɗarinè, Nube um jéi nan’t se’n takul kwei le Ngonn’n. Ke nè á j’um nan’t se Nube ɓá ɓaa, Nube à aje jéi takul ndikumgajer le Ngonn’n nga tɔ.

Nje Ke Rome 8:11

Nube ade Jésu unde loo tee dann njé ke koo’t. Ke nè á Ndil Nube ndi kêm si’t ɓaa, Nube ke ndɔ ke ade Jésu unde loo tee dann njé ke koo’t nga à ade danra si ke njè kwei à tel ndi kumgajer. E Nube ke njè kade Jésu unde loo tee dann njé ke koo’t nga á à ade a i teli ndii kumgajer tɔ, takul Ndil’n ke ndi kêm si’t nga.

Nje Ke Rome 8:24

Kerɔte kuwe, j’ingei kaje nga ɓá; nè è se go kundekêm tchên karè ɓai. Ke nè á doo an nyan pa ɓita unde kêm’n tchên dè’t ɓaa, è kundekêm tchên ke get lé. Nyan ke doo an se kum’n ɓaa nga, ké à unde kêm’n tchên dè’t titeke bain taɓai wa?

1 Nje Ke Corinthe 13:13

Ɗarinè, nyange ke mute nè á nain-in: kundekêm a, kundekêm tchên a, se tár nan a tɔ. Nè tár nan á dum dè nyange ke mute nè nga mbak.

1 Nje Ke Corinthe 15:20

Kerɔte kuwe, ɗarinè Krist unde loo tee dann njé ke koo’t. Krist è doo ke desêin ke unde loo tee dann njé ke koo’t tede kade dooge ke weii undei loo teei dann njé ke koo’t tɔ.

2 Nje Ke Corinthe 1:3

Nube, Bɔ Kuwe-ɓee le jéi Jésu-Krist nga, maje kade dè’n mong maj-maj. Bɔ jéi Nube nga, è Nube ke njè kêmkanm se njè sɔl kêm dooge a tɔ.

Nje Ke Galatie 6:16

Dooge ke njiyei se go tà ke m’ndó sei nè nga têr-têr ɓaa, maje kade kem̂lom se kem̂kanm nain se de. Maje kade kem̂lom se kem̂kanm nain se kosdooge le Nube malang.

Nje Ke Ephese 1:17

Man m’ra titeke bè le kade Nube le Kuwe-ɓee le jéi Jésu-Krist, è Bɔ jéi ke ndubra è le’n ade sei kumkunju le Ndil. Titeke bè á kum si à gang’n dè Nube’t le kade i geri nin njai-njai.

Nje Ke Ephese 1:3

Nube Bɔ Kuwe-ɓee le jéi Jésu-Krist nga, maje kade dè’n mong káng-káng. E tɔr ndu’n dè jéi’t takul kum nan’t bɔk le jéi se Jésu-Krist a, è ade jéi nyan-majege gai-gai malang ke ɔje dè Ndil kem̂ danran’t.

Nje Ke Ephese 1:7

Takul Krist ke wei ade mese’n an-in nang á j’ingei nyankuge dè jéi ɓee ɓer’t a, Nube ade kem̂’n tin’n mbit dè kaiyage’t le jéi a tɔ. E kem̂noje ke bò ke gar’n goto á Nube uwe se jéi!

Nje Ke Ephese 2:4

Nè Nube ke è baw kem̂kanm nga, tár jèi ngain.

Nje Ke Ephese 3:20

Se go tɔgmong le Nube ke ra kule kem̂ jéi’t nga, Nube asekum ra nyan kade al dè nyan malang ke jè deji nin éké ke jè giri kem̂ jéi’t.

Nje Ke Colosses 1:23

I bai nja si nang mong dè kundekem̂ dè Nube’t anje kage ndêr ke rang dè Tà ke Maje ke ndɔ ke ooi kété nga. Tà ke maje nè nga è nyan kundekem̂ tchên dè’t lé jéi. Tà ke Maje nè nga d’ile mber’n d’ade nyankundege malang ke dè nang nè. Man Paul géa m’ee ngonn njèkule le Tà ke Maje nè nga kuwe tɔ.

Nje Ke Colosses 1:27

Njé ke ei le Nube ke tooi se ninn de nga, Nube ndige kade kum de gang dè nyanbaw le’n ke maje ngain ke tò loo ɓɔyɔn’t tede le dooge ke ei Juipge lé. Nyanbaw le’n ke maje ngain ke tò loo ɓɔyɔn’t nga, è Krist ke ndi kem̂ si’t. Takul è kuwe karé luk-luk á ndɔn’t a ingei ndubra le Nube.

1 Nje Ke Thessalonique 1:3

Non Bɔ jéi Nube’t nga, kem̂ jé olé dè kule ke sei rai dè kundekem̂’t le si. Kem̂ jé olé dè ra si ke ulei ndibe dè tár nan’t a tɔ. Non Bɔ jéi Nube’t nga, kem̂ jé olé dè korè tà njak le si dè kundekem̂ tchên dè Kuwe-ɓee le jéi Jésu-Krist nga a tɔ.

1 Nje Ke Thessalonique 4:13

Ngakon jége, tà ke ɔje dè dooge ke weii, jè ndige le kade i geri maje. Titeke bè á a i rai ra si ndoo tite dooge ke rang ke nyan kundekem̂ tchên dè’t le de goto nga lé.

2 Nje Ke Thessalonique 2:16

Bɔ jéi Nube tár jéi, è sɔl kem̂ jéi sár se non ade jèi kundekem̂ tchên ke maje ngain. Jè deje Bɔ jéi Nube a, jè deje Kuwe-ɓee le jéi Jésu-Krist a tɔ,

1 Timothee 1:14

Oiyo, Kuwe-ɓee le jéi ra se’m kem̂-maje ke bò: è ade m’unde kem̂ dènn’t tede tár ke Jésu-Krist tár’m ade m’um se’n nan’t bɔk a tɔ.

Tite 2:13

Gar-gar, j’à rai titeke bè le nginei ndɔ tel kunde loo tee pan le Kuwe jéi Jésu-Krist. Ndɔ nè nga, j’undei kem̂ jéi dè’t tchên. Ndɔ nè nga, ndubra le Nube le jéi ke bò, se ndubra le Njèkaje jèi Jésu-Krist à kile ra’n ke nata ndái-ndái.

Hebreuge 3:6

Nè Krist ɓaa, è Ngonn ke ase; è á Nube ɔr’n unde’n ke njèkan dè loo kem̂ kei le’n. E ra kule le’n se ngonn koje. Ke nè á jè ndai kem̂ jéi káng dè kundekem̂ tchên ke jè ndii jè pitii ra jéi’t nga ɓaa, j’à jè kei le Nube kuwe.

Jacques 1:18

E ɔje se go kem̂ndige le’n le kade jèi ndikumgajer takul Tà ke Maje le’n ke è ngarankum tà. Gir’n ke nè á jéi le’n kuwe deri dann nyankundege le’n malang.

1 Pierre 1:13

Bè ɓaa, adi tàgir le si ndikum a, i ndii kum si karè. Undei kem̂ si tchên dè noje ke d’a d’uwe se si ndɔ tel ree’t le Jésu-Krist.

1 Pierre 1:21

E takul’n è Krist á sei undei kem̂ si dè Nube’t ke njè kade unde loo tee dann njé ke koo’t a, ke njè kule ndubra dènn’t a tɔ. Gir’n ke nè á sei undei kem̂ si dè Nube’t a, kem̂ si too’n tchên ke dènn’t a tɔ.

1 Pierre 1:23

Sei nga dé tel d’oje sei kige. Koje ke d’oje sei kige nè nga in ra kà sige ke njékweige lé; dé tel d’oje sei gugu kige takul tà le Nube ke njèndi kumgajer sár se non.

1 Pierre 2:2

Adi ngur tà le Nube ra sei pênn-pênn titeke ngur kil kum kate mba ra’n ngann kidege bè tɔ. Takul mba á sei a rai tɔge ke kété-kété dè kaje’t.

1 Pierre 3:15

Krist kuwe karé bere á è Kuwe-ɓee le si. Undei nin se ninn’n dè ɓengre si’t. Uwei dè nja ra si le kade nanan ke deje sei tà ɔje dè kundekem̂ tchên’t le si ɓaa, ɔri gir adi nin.

1 Pierre 3:21

Mann bêlm nè nga è nyan-tɔje ke ɔje dè kule doo manné njonm. Kule doo manné njonm nga è gir kaje ke sei ajii ɗarinè. Kule doo manné njonm nga ɔr nyan ke mine le danra ra si’t lé, nè è ndukunn ke sei unni se tàgir ke maje ke kem̂ si’t adi Nube. Kule doo manné njonm nga aje sei takul kunde ke Krist unde loo tee dann njé ke koo’t.

1 Pierre 3:5

E ke nè á ei kubu kule ra’t le dinyege ke kété mari ke tooi se ninn de a, ke undei kem̂ de tchên dè Nube’t a tɔ. Dinyege nè nga, ei kuwe in-in se kem̂ de ulei dè de adi ngaw dege.

1 Jean 2:29

Sei geri mbak titeke Krist è Njè ra nyan se dè naje’n. Nanan ke ra nyan ke se dè naje’n se ndɔ karé-karé ɓaa, è ngonn Nube ke Nube kuwe oje’n.

1 Jean 3:3

Nanan ke unde kem̂’n tchên dè Krist’t ɓaa, maje kade ade ra’n unju nyang-nyang titeke Krist géa ade ra’n unju’n nyang-nyang bè tɔ.

1 Jean 3:9

Nanan ke Nube kuwe oje’n ɓaa à ebe ra majelé se ndɔge malang, tede ko nyan le Nube urkei kem̂n’t. E asekum ra majelé kum’n ke kété-kété lé tede è Nube kuwe á oje’n.

1 Jean 4:7

Kotárge le’m, adi jè tári nan tede tár nan nga in ra Nube’t kuwe. Nanan ke tár doo ndul made’n ɓaa, ger Nube a, è Nube kuwe á oje’n a tɔ.

1 Jean 5:1

Nanan ke unde kem̂’n dè Jésu’t titeke è Krist ɓaa, doo nè nga è Nube kuwe oje’n. Nanan ke tár Bɔ jéi Nube ɓaa à tár jèi ngannenge nga tɔ.

1 Jean 5:18

Jè ger mbak titeke nanan ke Nube kuwe oje’n nga à ra kaiya se ndɔ’n-ndɔ’n lé. Nanan ke Nube kuwe oje’n ɓaa à ngonm ra’n è kuwe sêw-sêw. Njè kem̂ majelé asekum tee rann’t lé.

1 Jean 5:4

Oiyo, nanan ke Nube kuwe oje’n ɓaa à tête rɔ dooge ke ei le nang nè. Rɔ ke jè têti dooge ke ei le nang nè nga, è kundekem̂ le jéi.