San Juan 15:4 - Biblia Guarani Tumpa Iñee

⁴ Peï avei cheré, che aï peré rami. Metei jäka oyeasɨa yave uva iɨ güi, ngaraa ipuere ia. Echa jäka jae aeño ipuereä ia. Jökoraita vi pe reta mbaetɨ yave peï cheré.

Nuevo Testamento Guaraní Pe

⁴ Peico cheré perovia reve, jare che aicota pepɨa pe. Metei jaca oyeasɨa yave uva güi, ngaraa ipuere oyapo ia. Echa jaca aeño mbaeti ipuere oyapo ia. Jae ramiño vi pe reta mbaeti yave peico cheré perovia reve, ngaraa pepuere peyapo icavi vae Tumpa peguara —jei—.

San Juan 15:4 Iomraidhean Croise

CANTARES 8:5

¿Kia pa kuae ñuu kotɨ güi ou vae, iñäka omboyeko ou, oaɨu vae iyatiɨ re vae? Ɨvɨra manzana igüɨ pe romomba; joko pe ndesɨ imembɨrasɨ, joko pe ndesɨ oyekuaku, jare rea.

OSEAS 14:8

Efraín jeita: ‘Ngaraa ye ma aeka tumpa-raanga reta.’ ¡Che ayeapɨsakata jare ayangarekota chembae vae reta re! Che ko jae metei ɨvɨra jokɨ katu avei vae rami, cheré toväe chembae vae reta mbae ikavi vae.”

San Mateo 12:33

Penoi yave ɨvɨra ikavi vae, ia ikavita vi. Ërei penoi yave ɨvɨra ikavimbae vae, ngaraa vi ia ikavi. Echa ɨvɨra, ia rupi ko peikuaata.

San Lucas 8:15

Ërei jókuae temitɨ oa ɨvɨ kavi pe vae oyembojaanga Tumpa iñee oendu vae re. Kuae reta oyeapɨsaka Tumpa iñee re ipɨa kavi jare sɨmbi rupi kavi, jare oyapo Tumpa iñee jei oyapo vaerä vae. Jáeramo jae reta temitɨ ia avei vae rami ko.

San Juan 14:20

Jókuae ara peikuaata ko che meteiño cheRu ndive, jare pe reta meteiño che ndive vae, jare che meteiño pe ndive.

San Juan 17:23

Che aikota jese reta jare nde cheré, yogüɨreko vaerä metei ramiño kavi, ɨvɨ pegua reta oikuaa vaerä nde ko chembou vae jare nde reaɨu ko kuae reta nde cheraɨu rami vae.

San Juan 6:56

Cherete jare cherugüɨ jou vae oiko che ndive jare che aiko jae ndive.

San Juan 8:31

Jayave Jesús jei jókuae judío güɨrovia jese vae reta pe: —Pe reta peiko avei yave che jae peve peyapo vaerä vae rupi, peikota ko cheremimboe retarä añetete pegua.

Hechos 11:23

Jare jae ojo oväe yave, oecha jókuae oyeapo Tumpa ipɨakavi rupi vae, jare oyerovia. Jayave jae omboarakuaa opaete vae reta oguata kavi vaerä opaete ipɨa reve yandeYa ndive.

Hechos 14:22

Jare kuae tëta guasu reta rupi jae reta omoäta ngatu oporogüɨrovia vae reta, jare omboarakuaa jekuaeño vaerä güɨnoi reta mborogüɨrovia Tumpa kotɨ. Jare jei vi chupe reta: “Yaiporara ñotai ko jeta yaike vaerä Tumpa iporookuaía pe.”

2 Corintios 13:5

Jekuaeño pemae kavi peyé peikuaa vaerä añetete ra oporogüɨrovia vae. ¿Mbaetɨ pa peikuaa Jesucristo oiko pepɨa pe vae?, ani ¿mbaetɨ ra?

Gálatas 2:20

Cristo ndive ko che ayekutu kurusu re, jáeramo mbaetɨ ma aikove, jaeño Cristo oikove chepɨa pe. Jare añave aikove aiko ramboeve, aiko mborogüɨrovia Tumpa Taɨ re anoi vae re. Echa jae cheraɨu, jare jae aeño oñemee omano vaerä cheré.

Efesios 3:17

Cristo toiko pepɨa pe peporogüɨrovia rupi, jökorai tätagüe jare pepɨ̈rata vaerä mboroaɨu pe,

Filipenses 1:11

ayerure jekuaeño peyapo vaerä mbaembae ikavi vae jupi vae pegua Jesucristo rupi, Tumpa oyemboeteuka vaerä.

Colosenses 1:23

Jekuaeño peñemomɨ̈rata jare peñemoäta ngatu peporogüɨrovia re yave, jare pesɨrɨmbae reve peäro yave ñee ikavi vae peendu vae. Jókuae ñee ikavi vae oñemoërakua opaete ɨvɨ rupi, jare che Pablo, Tumpa cheapo jókuae amoërakua vaerä.

Colosenses 1:27

Echa Tumpa ikɨ̈reɨ oikuaauka chupe reta kërai kuae yaikuaambae vae iyemboetea tuicha yae judiombae vae reta peguarä vae; jae ko Cristo oiko pepɨa pe vae, jese peäro mbaemboetea vae.

Colosenses 2:6

Jáeramo, pemboresive ma yandeYa Jesucristo mborogüɨrovia rupi vae, jekuaeño vi peiko perovia reve jese;

1 Tesalonicenses 3:5

Jáeramo, mbaetɨ ma aropɨa ramo, amondo Timoteo aikuaa vaerä peporogüɨrovia regua. Echa aipoɨu oporombotavɨ vae oyapouka vaerä peve ikavimbae vae, jare jökorai roparavɨkɨiño ma.

Hebreos 10:39

Ërei yande jaeä ko Tumpa güi oyerova ye okañɨtei vaerä vae reta, yande reta ko jae oyemboasauka iporogüɨrovia re vae reta.

1 Juan 2:6

Oime yave kia “che ko jae Cristo imbae”, jei vae, toiko kavi jae oiko rami.

2 Juan 1:9

Kia ñavo opia jare mbaetɨ oiko Cristo iporomboe re yave, mbaetɨ ko güɨnoi Tumpa. Ërei kia ñavo oiko avei Cristo iporomboe re vae, güɨnoi yandeRu Tumpa jare Taɨ.