Tito 1:2 - Biblia

² Jae reta wɨrowia kawi yawe Cristo re jare yemboe añetete wae uikuaa kawi reta yawe, wɨrowia katu rewe uärota ñonoï tekowe opa mbae wae. Echa’ä ndei ɨwɨ uyembɨpɨ mbowe, Tumpa jei umeeta oï yandewe tekowe opa mbae wae. Jare Tumpa ndarau etei iyapu yandewe.

Guaraní Pe (Western): Simba

² jare uãro vaerã uyerovia reve tecove opa mbae vae. Echa'ã Tumpa ipuere'ã etei iyapu, jare jae jei ndei ɨvɨ uyeyapo mbove umee vaerã yandeve tecove opa mbae vae.

Tito 1:2 Iomraidhean Croise

San Mateo 25:34

“Joko wi che mburuwicha wasurä aïta wae, jaeta cheakata kotɨ ñonoï wae reta pe: ‘CheRu uyapo ma pewe piyekou waerä che ndiwe che opaete wae imburuwicha wasurä aï wae re. CheRu kua uyapɨkatu ma pewe ɨwɨ uyembɨpɨ wiwe. Peyu piyekou jese.

San Mateo 25:46

“Jayawe jae reta yuraata kiape uiporarata ñonoï jaeño mái pewa wae pe. Erëi jokua jupi wae reta yuraata tekowe opa mbae wae pe.” Jukuärái Jesús jei jemimboe reta pe.

Marcos 10:17

Jayawe Jesús joko wi oo ye jemimboe reta ndiwe. Jare yuraa yureko reta rambuewe, aramoiño pëti kuimbae osi ou owäiti. Jare uñeñono itawa re Jesús jowai jare jei chupe: “Oporomboe wae, jupi wae ko nde. ¿Mbae pa ayapota tekowe opa mbae wae anoi waerä?” jei chupe.

Marcos 10:30

cien wese ye ko uñemɨñatimata oï chupe kuri jekowe pe oï rambuewe,” jei chupe reta. “Uñemɨñatimata oï chupe jëta retarä, tɨkeɨ retarä, tɨwɨ retarä, jindɨ retarä, ichɨ retarä, isambiaɨ retarä, jare iko retarä wi. Erëi yepe tëi uyekouta kuärái, jesewe uiporarata oï wi cheré wɨrowia mbae wae reta ipo pe. Erëitu taɨkue rupi Tumpa umeeta oï chupe tekowe opa mbae wae,” jei.

San Juan 10:28

Che amee chupe reta tekowe opa mbae wae, jare jae reta ndarau etei yuraa Tatawasurenda pe. Añetete, mbaetɨ kiawe ipuere upɨ̈ro reta chepo wi,” jei chupe reta.

San Juan 17:2

“Jukuärái ayapota, echa’ä che ameeta tekowe opa mbae wae opaete nde nemee chewe wae reta pe. Jukuärái chepuere ayapo, echa’ä nde chapo opaete wae iYarä ramo,” jei.

San Juan 17:24

“CheRu mii, ndei ɨwɨ uyeyapo mbowe, nde cherauño mái jare nemee chewe mbaepuere jupiete ye wae. Jare che aipota jokua kía nunga nde nemee chewe wae reta yureko waerä che ndiwe kiape che aikota wae pe. Echa’ä che aipota jae reta uecha waerä chembaepuere jupiete ye wae,” jei.

San Juan 5:39

“Pe reta peratangätu peï piyemboe waerä Tumpa iñee re, echa’ä perowia peï jokoropi ko pikuaata tekowe opa mbae wae penoi waerä. Jokua jaekawi tëi ko, echa’ä Tumpa iñee pe cheré ko umɨmbeu oï.

San Juan 6:54

“Erëi ipotawe kía cherete jare cheruwɨ jou wae, jekuaeño che ndiwe oï, jare che ndarau etei asɨrɨ chuwi. Jokua nunga ime onoi tekowe opa mbae wae, jare che ambɨjekowe yeta aï kuri ara taɨkuewa pe. Jukuärái ko, echa’ä cherete jare cheruwɨ jae ko mbae yau wae jare añetete pewa,” jei chupe reta umbɨjaanga rewe.

San Juan 6:68

Jare Simón Pedro jei chupe: “¿OreYa, ¿kía re pa ndoota nduyemboya?” jei. “Ndeeño ko nemɨmbeu kawi orewe tekowe opa mbae wae kërái nonoi waerä.

Hechos 15:18

Jae ko arakae wiwe uikuaaka kua mbaembae.’ Jukuärái uyekuatía oï,” jei Jacobo chupe reta.

Romanos 1:2

Jare jae ko ñee Tumpa jei arakae rupi uikuaakata iko yandewe wae. Echa’ä jukuärái uikuatía Tumpa iñee arakae umɨmbeu wae reta Tumpa iñeerɨru jupi wae rupi.

Romanos 16:25

Jare añawe yambutuicha Tumpa jee. Jae ko ipuere pemɨmɨräta Tumpa re kua ñee ikawi wae Jesucristo rewa amɨmbeu pewe wae rupi. Ɨma rupi kua ñee kiawe uikuaa’ä iko.

Romanos 2:7

Echa’ä amokue wae reta ikɨrëɨete uyembutuichaka Tumpa pe. Jare uipota yureko reta jaeño mái pewa Tumpa ndiwe. Jáeramo jae reta uyapo ikawi wae. Jare Tumpa umeeta chupe reta tekowe opa mbae wae.

Romanos 5:2

Jare añawe yarowia ma Cristo re ramo, Cristo uyapo ma yayekou waerä Tumpa ipɨakawi re. Jare yayerowia ñaï, echa’ä yaikuaa ko pëti ara yayekouta ñaï kuri Tumpa imbaepuere jupiete ye wae re.

Romanos 5:21

Jáeramo kërái yaikose teko yareko wae ipo pe jare jokua yanembɨsɨrɨ iko Tumpa wi, jukuärái wi añawe Tumpa ipɨakawi wae ipo pe ko ñaï jare ime ma ñanoi tekowe opa mbae wae. Echa’ä ime yawe kía wɨrowia yandeYa Jesucristo re wae, Tumpa umae jese jeko mbae wae rami.

Romanos 5:4

Jare ñamɨawäta ma yawe, jokua re ko Tumpa umae kawita oï. Jare yaikuaa Tumpa umae kawi oï yanderé yawe, yaikuaa kawieteta Tumpa uyapota oï mbae ikawi wae yandewe kuri.

Romanos 6:23

Echa’ä mbaembae yayawɨ Tumpa kotɨ wae jepɨ ko mano – jae ko yembɨsɨrɨ Tumpa wi jaeño mái pewa Tatawasurenda pe. Erëi Tumpa umee yandewe tekowe opa mbae wae jepɨ mbae awe. Jare kua re ko yande yayekou ñaï, echa’ä pëti ramiño ko ñaï yandeYa Jesucristo re ramo. Jukuärái ko. Jáeramo mbaetɨ ikawi jekuaeño yayawɨ waerä Tumpa jei wae.

Colosenses 1:27

Echa’ä Tumpa uikuaaka ma yandewe kërái opaete wae ipuere uyekou mbae ikawiete ye wae re – jae ko ipuere onoi Cristo ipɨa pe kërái pe reta penoi wae rami. Jare jukuärái ipuere uäro reta wi uyerowia katu rewe uyekou reta waerä Tumpa imbaepuere jembipete ye wae re.

1 Tesalonicenses 2:15

Judío reta ko uyuka arakae Tumpa iñee umɨmbeu wae reta, jare taɨkue rupi judío reta uyukaka yandeYa Jesucristo etei. Jare jokuaño’ä ko. Jae nunga wi judío reta jeta wese pochɨ rewe oremoë oremombo tëta wasu reta wi. Jáeramo jae reta ombopochɨka Tumpa. Jare jae reta opaete wae jowaicho ko.

1 Tesalonicenses 5:8

Yandereko toï ikatu pe etei. Erëi ¿kërái ra yaikota yandearakuaa katu rewe? Imeta ko jekuaeño yarowia Cristo re jare jekuaeño yayerau päwe rewe. Echa’ä jokua yanderepɨta oï mbae ikawi mbae wae wi, pëti pɨtía yopiaka yamonde wae rami. Jare jae nunga wi jokua ara Tumpa uiporaraka yawe ɨwɨ pewa reta pe jae reta mbaembae uyawɨ ikotɨ wae re, yarowia katu jae yanderepɨta oï. Jayawe ñamaeño jokua yaikuaa wae re uyandareko waerä yandepɨayemɨngeta re ñanäka jɨru jiero pewa yamonde wae rami.

1 Timoteo 6:12

Jare yembɨawái reta ou ndewe yawe, jekuaeño iñemɨmɨräta nderowia katu waerä Tumpa re. Iñemɨïru kawi Cristo ndiwe, echa’ä jae umee yandewe tekowe opa mbae wae. Jokuaerä ko Tumpa nereni jokua ara nde nemɨmbeu kawi yawe jeta wae reta jowake nderowia ma ko Cristo re wae.

1 Timoteo 6:19

Echa’ä jukuärái uyapo reta yawe, uikuaata reta tekowe ipɨau wae añawe rupi onoi wae, jare onoita reta mbaembae ikawiete opa mbae wae ara taɨkuewa outa oï kuri wae pe.

2 Timoteo 1:1

Cheraɨ mii Timoteo, che araaka aï ndewe saludo yandeYa Jesucristo jee re. Che ko jae Pablo. YandeYa Jesucristo etei chemondo jae jee re amɨmbeu waerä jesewa, echa’ä jukuärái Tumpa uipota ramo. Echa’ä jae chokui a amɨmbeu waerä opaete wae pe kërái yandepuere ñanoi tekowe opa mbae wae Jesucristo rupi.

2 Timoteo 1:9

Jeta ma yayawɨ Tumpa kotɨ. Erëi Tumpa yanderepɨ ma jokua teko yareko wae wi, jare ñanereni ma ñañeñono tee waerä jae imaerä. Yande mbaembae ikawi wae yayapo wae rupi’ä ko jokua, erëi Tumpa ipɨakawi ramo ko uyapo yandewe jokua. Echa’ä iyɨpɨ wiwe ndei ɨwɨ jae uyapo mbowe, Tumpa ipɨayemɨngeta ko uikuaaka waerä yandewe ipɨakawi Jesucristo rupi.

2 Timoteo 2:10

Jayawe jokua ñee ikawi wae jekuaeño uyembeu oo oï ramo, chepɨawasu rewe amɨawätata aï opaete kua aiporara aï wae reta. Che ayapo aï jukuärái Tumpa uiparawo wae reta pewarä. Che aikuaa aï jokua ñee ikawi wae uyandu reta yawe, wɨrowiata jese. Jare chepɨa rewe che aipota Tumpa uepɨ reta waerä Jesucristo rupi jare yureko reta waerä jae ndiwe jaeño mái pewa.

2 Timoteo 2:13

Jare yepe tëi amo pe yayapo’ä jupi jae jei yandewe wae rupi, erëi jesewe jae jekuaeño jupi uyapo yandewe opaete jae jei wae, echa’ä jukuärái ko jae, jare jae uyembɨambɨe’ä etei.

2 Timoteo 2:15

Jáeramo iñemɨatangätu ndikuaa kawi waerä yemboe añetete wae re. Jare jekuaeño eporomboe jokua ñee jupi rupi kawi Tumpa umae nderé waerä nde ko jae jupi rupi uyeyokui wae. Jukuärái nde ndiyapo yawe, ndarau nemara Tumpa omboporowa yawe ndeparawɨkɨ.

Tito 2:13

Jukuärái ko yaikota añawe rupi, yande ñaäro ñaï rambuewe yayerowia rewe yandeYa Jesucristo ou ye rewa. Jokua ara jae uyekuaata oï imbaepuere jembipete rewe. Echa’ä jae ko yandeTumpa jare yandeRepɨ wae, jare jae imbaepuere tuichaete.

Tito 2:7

Jare nde, Tito, echaka ndereko kawi taurusu wae reta pe jae reta omomoe waerä ndereko. Jare jekuaeño eporomboe añetete wae jare jupi wae ndipɨu rewe Tumpa wi awɨye waerä kía ipuere nembɨjeko mbae re. Echa’ä jukuärái ndiyapo yawe, oyowaicho nde ndiwe wae reta kïiño upɨtata reta, echa’ä mbaetɨta chupe reta mbae re iñera waerä yandekotɨ.

Tito 3:7

Jare ipɨakawiete ramo, Tumpa umae yanderé yandereko mbae wae rami. Jukuärái Tumpa uyapo yandewe yandepuere yaiko waerä taɨ jare tayɨ retarä. Jáeramo ñaäro ñaï yayerowia rewe yaiko waerä jae ndiwe jaeño mái pewa.

1 Juan 2:25

Jare kua ko jae Tumpa jei umeeta oï yandewe wae – tekowe opa mbae wae.

1 Juan 5:20

Jare yaikuaa wi Tumpa Taɨ ou ma ko kua ɨwɨ pe jare umee ma yandewe arakuaa yaikuaa waerä Tumpa añetete wae. Jare añawe yande ñaï ma ko pëti ramiño Tumpa añetete wae re, echa’ä ñaï ma pëti ramiño Taɨ Jesucristo re ramo. Jae ko Tumpa añetete wae jare tekowe opa mbae wae iYa.

Judas 1:21

Pe reta pikuaa peï yandeYa Jesucristo umeeta oï pewe tekowe opa mbae wae peparareko ramo. Jare añawe jokua peäro peï rambuewe, jekuaeño pemandúa kërái Tumpa perau wae re.

Apocalipsis 13:8

Jare opaete seri ɨwɨ pewa reta umbutuicha bestia jee. Jaeño jokua Owecha kuimbae taurusu wae uyeyukaka wae itupapire pe jee uyekuatía oï wae reta umbutuicha’ä jae jee. Jokua tupapire ko jae opaete tekowe opa mbae wae onoi wae reta jee uyekuatía oï pɨpe wae. Jare jae reta jee uyekuatiaño mái iko ɨwɨ uyembɨpɨ wiwe.

Apocalipsis 17:8

Jayawe araɨwa jei wi chewe: “Kua bestia ndecha wae ikose tenonde yawe, erëi añawe mbaetɨ ma. Erëi uyekuaa yeta oï, echa’ä oëta ma oï ɨwɨkua wasu juwa mbae wae wi. Erëi jokua jaɨkue rupi Tumpa omombota Tatawasurenda pe jaeño mái pewa,” jei. “Jare ɨwɨ pewa reta ipɨakañɨeteta uecha yawe jokua bestia tenonde ikose wae uyekuaa ye ramo. Jae reta jee mbaetɨ uyekuatía oï ɨwɨ uyembɨpɨ wiwe Tumpa itupapire pe. Echa’ä jaeño tekowe opa mbae wae onoi wae reta jee uyekuatía oï jokua tupapire pe,” jei chewe.