San Mateo 5:3 - Biblia

³ “Uyekoueteta ñonoï kuri ikoi Tumpa kotɨ wae reta. Echa’ä jae reta ñonoïta Tumpa ndiwe jae oï ma yawe opaete wae imburuwicha wasurä jaeño mái pewa.

Guaraní Pe (Western): Simba

³ Jei chupe reta: —Tuyerovia icoi Tumpa ueca vae reta. Echa'ã Tumpa umeeta chupe reta yugüɨreco vaerã mboroyocuia ara pegua pe —jei—.

San Mateo 5:3 Iomraidhean Croise

Isaías 61:1

Tumpa ikoño mái wae iEspíritu oï cheré, echa’ä jae cheparawo a amɨmbeu waerä ñee ikawi wae iparawete wae reta pe. Jae chembou ambɨpɨakatu waerä ipɨatɨtɨ wae reta, jare amɨmbeu waerä pereso reta pe kërái ipuere waerä uyembopoika reta. Chembou wi amɨmae waerä jesa mbae wae reta, jare aepɨ waerä uiporara wae reta jowaicho reta wi.

San Mateo 11:25

Joko wi Jesús umbɨpɨ uyerure Tumpa pe kuärái: “CheRu mii, nde ko jae ara pewa reta iYa jare ɨwɨ pewa reta iYa wi,” jei. “Che ambutuicha nderee, echa’ä kua mbaembae ndikuaaka ma sambiaɨ reta pe, jare nemaeño’ä iyarakuaa katu echa iyupe wae reta re uikuaa waerä,” jei.

San Mateo 11:6

“Aramoi kua ayapo aï wae jae’ä ko jeta wae reta wɨrowia tëi Upuruepɨ wae uyapota iko wae. Erëi uyekoueteta ñonoï jokua chererɨ̈ro mbae wae reta.” Jukuärái Jesús jei Juan jemimboe reta pe.

San Mateo 13:16

“Erëi pe cheremimboerä piko wae reta, piyekouete peï, echa’ä pikuaa kawi peï kua pecha wae re jare piyandu wae re,” jei chupe reta.

San Mateo 19:14

Erëi Jesús jei: “Pemaeño sambiaɨ reta re yuweru waerä chekotɨ. Awɨye piyopia reta, echa’ä jaeño kua sambiaɨ rami wae reta oïta Tumpa ndiwe, Tumpa oï ma yawe opaete wae imburuwicha wasurä,” jei chupe reta.

San Mateo 24:46

“Jukuärái yawe, jokua karái ipuere oo uwata ikotɨ̈a rupi ipɨawiwe rewe. Jare jae ou ye uwäe yawe jëta pe, jare uecha yawe jokua uyeyokui wae uyapo kawi oï iparawɨkɨ, jayawe karái uyerowiaeteta umae jese. Jare jae nunga wi jokua uyeyokui wae uyerowiata upɨta,” jei.

San Mateo 25:34

“Joko wi che mburuwicha wasurä aïta wae, jaeta cheakata kotɨ ñonoï wae reta pe: ‘CheRu uyapo ma pewe piyekou waerä che ndiwe che opaete wae imburuwicha wasurä aï wae re. CheRu kua uyapɨkatu ma pewe ɨwɨ uyembɨpɨ wiwe. Peyu piyekou jese.

San Mateo 3:2

“Koiño ma oï uyekuaa waerä Tumpa imbaepuere mburuwicha wasu pewa kua ɨwɨ pe. Jáeramo peya pepɨayemɨngeta jupi mbae wae jare perowia Tumpa jei wae re peï waerä jae ndiwe,” jei Juan chupe reta.

San Mateo 8:11

“Jare che tae pewe, Tumpa oï ma yawe opaete wae imburuwicha wasurä jaeño mái pewa, yuweruta opaete ketɨ ketɨ wi jeta kua nunga judío mbae wae reta yureko waerä Tumpa ndiwe. Jare jae reta ukaruta uyerowia rewe yanderamɨkue ikowe yeta oï wae reta Abraham, Isaac, jare Jacob ndiwe,” jei chupe reta.

Marcos 10:14

Erëi Jesús kua uyandu yawe, pochɨ jemimboe reta pe jare jei chupe reta: “Pemaeño sambiaɨ reta re yuweru waerä chekotɨ. Awɨye piyopia reta, echa’ä jaeño kua sambiaɨ rami wae reta oïta Tumpa ndiwe, Tumpa oï ma yawe opaete wae imburuwicha wasurä,” jei chupe reta.

San Lucas 11:28

Jayawe Jesús jei chupe: “Jukuärái tëi ko. Erëi uyekoueteta chuwi opaete Tumpa iñee re uyapɨsaka wae reta jare jae jei wae uyapo wae reta,” jei chupe.

San Lucas 18:14

Jayawe Jesús jei wi chupe reta: “Che tae pewe, jokua mburuwicha pewarä okowara wae oo ye jëta pe ipɨakatu rewe, Tumpa ndiwe uyeapɨkatu ramo. Echa’ä Tumpa umae jese jeko mbae wae rami,” jei. “Erëi jokua fariseo re jukuärai’ä umae. Echa’ä Tumpa umɨmichita oï uyembutuicha wae reta, jare umbutuichata oï uñemɨmichi wae reta,” jei chupe reta.

San Lucas 22:29

“Jáeramo kërái cheRu umee chewe mbaepuere aiko waerä opaete wae imburuwicha wasurä, jukuärái wi che amee aï pewe mbaepuere piko waerä mburuwicha retarä,” jei chupe reta.

San Lucas 22:30

“Jare che aï ma yawe opaete wae imburuwicha wasurä jaeño mái pewa, pe reta pepuereta jekuaeño pekaru che ndiwe. Jare pewapɨta peï kuri wi wapɨa reta pe piko waerä Israel iñemoñaa reta imburuwicha retarä,” jei Jesús jemimboe reta pe.

San Lucas 4:18

“Tumpa ikoño mái wae iEspíritu oï cheré, echa’ä jae cheparawo a amɨmbeu waerä ñee ikawi wae iparawete wae reta pe. Jae chembou ambɨpɨakatu waerä ipɨatɨtɨ wae reta, jare amɨmbeu waerä pereso reta pe kërái ipuere waerä uyembopoika reta. Chembou wi amɨmae waerä jesa mbae wae reta, jare aepɨ waerä uiporara wae reta jowaicho reta wi.

San Juan 20:29

Jare Jesús jei chupe: “Añawe cherecha yawe ramo nderowia neï cheré. Erëi uyekoueteta ñonoï jokua cherecha mbae rewe wɨrowia cheré wae reta,” jei chupe.

Santiago 1:10

Jare ikokatu wae tuyerowia uñemɨmichi wɨrowia Cristo re ramo. Echa’ä añetete ikokatu wae reta ñana ipotɨ oï wae rami ko. Mbaetɨ ɨma iko reta.

Santiago 1:12

Uyekouta oï kía umɨawäta yembɨawái reta ipɨawasu rewe wae. Echa’ä jukuärái rupi uyekuaata jae wɨrowia ma ko Tumpa re añetete rewe. Jare Tumpa umɨñatimata oï chupe kuri corona tekowe pewa. Jukuärái yaikuaa uyeyapota oï, echa’ä jukuärái Tumpa jei uyapota oï opaete uau reta wae pe.

Santiago 2:5

Mase, hermano puau mii reta, ¿kía ra ko jae wɨrowia kawi Tumpa re wae reta? Jae ko iparawete wae reta. Jáeramo Tumpa uiparawo ma jae reta ikokatu waerä Tumpa kotɨ. Añetete jae reta uyekouta ñonoï Tumpa imbaepuere mburuwicha wasu pewa re jaeño mái pewa. Echa’ä jae reta uau Tumpa jare Tumpa jei ma kuärái: “Opaete cherau wae reta, che aïta chupe reta imburuwicha wasurä,” jei.

Apocalipsis 19:9

Jare pëti araɨwa jei chewe: “Ikuatía kua ñee: ‘Owecha kuimbae taurusu wae umenda oï, jare uyapɨkatu ma tembiu ikawiete wae uyekou reta waerä jese. Uyekouete ñonoï Tumpa uparea chupe reta wae.’ Jukuärái ikuatía.” Jare jei wi chewe: “Kua ñee añetete ko. Tumpa iñee etei ko,” jei.

Apocalipsis 22:14

“Uyekouete ñonoï opaete ikɨa mbae Tumpa kotɨ ñonoï wae reta. Echa’ä jae reta uiketa ipɨawiwe rewe öke reta rupi kua tëta wasu pe, jare jouta reta ɨwɨra ía tekowe umee wae,” jei.

Apocalipsis 3:17

‘Pe reta pere tëi kuärái: “Yaikokatu ñaï. Jeta mbaembae ñanoi. Mbaetɨ etei mbae uata yandewe,” pere tëi. Erëi jukuärai’ä ko. Pe reta pikuaa’ä kërái chekotɨ pikuasɨete peï, jare peparawete peï, jare peresa mbae echa peï, jare penani etei wae echa peï. Jáeramo ïru wae reta umaeta tëi peré peparareko rewe.