San Lucas 9:26 - Biblia

²⁶ “Ime yawe kía imara chewi jare chiñee wi wae, che kuimbaerä ayeyapo wae chemarata wi chuwi che ayu ye yawe. Echa’ä ayu yeta ko aï. Jare ayu ye ma yawe, ayuta chembaepuere jembipete rewe, cheRu imbaepuere jembipete rewe, jare araɨwa Tumpa oñono tee wae reta imbaepuere jembipete rewe wi,” jei chupe reta.

Guaraní Pe (Western): Simba

²⁶ Ime yave quía imara cheré jare chiñee re vae, che cuimbaerã ayeyapo vae chemarata vi jese, ayu ye yave ayembutuichaca vaerã chembaepuere reve, cheRu imbaepuere reve, jare ángel uñeñono tee Tumpa peguarã vae reta imbaepuere reve —jei—.

San Lucas 9:26 Iomraidhean Croise

Isaías 53:3

Jeta wae reta uñamɨtäa jare wɨrɨ̈ro kua kuimbae uiporaraete wae jare tuicha rupi ususere wae. Jae uasa yandeyɨpɨ rupi yawe, yayerowa chuwi jare yande wi yaipota’ä ñamae jese. Jeta wae reta uñamɨtäa kua kuimbae, jare jokua mbae’ä yandewe.

San Mateo 16:27

“Che jae pewe kua mbaembae, echa’ä pëti ara che kuimbaerä ayeyapo wae ayu yeta aï cheRu imbaepuere jembipete rewe jare chearaɨwa reta ndiwe. Jare jayawe amɨñatimata aï pëti pëti wae pe mbae uyapo wae rupi,” jei.

San Mateo 25:31

“Che kuimbaerä ayeyapo wae, che ayu yewɨ yawe chembaepuere jembipete rewe, aruta opaete araɨwa reta che ndiwe. Jayawe che awapɨta aï chewapɨa mburuwicha wasu pewa ikawiete ye wae re,” jei.

San Mateo 26:64

Jayawe Jesús jei chupe: “Nde ndere wae ko jae,” jei chupe. “Jare wi che tae pewe, outa uwäe ara che kuimbaerä ayeyapo wae, pe reta etei cherechata peï kuri Tumpa imbaepuere tuichaete wae iyakata kotɨ. Jare cherechata wi ayu ye yawe ara wi amapɨ̈tu re,” jei chupe.

Marcos 8:38

“Añetete kua ɨwɨ pe añawe ñonoï wae reta uyerowa ma Tumpa wi jare uyawɨ reta ma jeta ikotɨ. Jare ime yawe kía imara chewi jare chiñee wi kua reta jowai, che kuimbaerä ayeyapo wae chemarata wi chuwi che ayu ye yawe. Echa’ä ayu yeta ko aï. Jare ayu ye ma yawe, ayuta cheRu imbaepuere jembipete rewe jare araɨwa Tumpa oñono tee wae reta ndiwe.” Jukuärái jei Jesús jemimboe reta pe.

San Juan 12:43

Jáeramo umɨmbeu’ä reta kía pe awe wɨrowia reta Jesús re wae. Añetete jae reta uipotaete umbɨyerowia japicha retaño Tumpa wi etei.

San Juan 5:44

“Pe reta pipotaete pe yepái piyembutuichaka waerä. Erëi peka’ä peï Tumpa pembutuichaka waerä. Jare jukuärái yawe, ¿këraita pa pepuere perowia cheré? Ndarau piyapo,” jei chupe reta.

Hechos 10:22

Jayawe jae reta jei Pedro pe: “Pëti kuimbae romano sɨndaro reta itenondewa Cornelio jee wae ko orembou,” jei. “Jae ko kuimbae uipɨu Tumpa wi wae jare opaete judío reta umae kawi jese wae. Pëti araɨwa Tumpa ombou chupe wae jei chupe ombou ndereraaka waerä jëta pe, Cornelio uyapɨsaka waerä mbae nemɨmbeuta chupe wae re,” jei reta Pedro pe.

Romanos 1:16

Mbaetɨ etei chemara amɨmbeu waerä ñee ikawi wae Cristo rewa. Echa’ä opaete jokua ñee re wɨrowia wae reta, Tumpa uepɨta oï reta imbaepuere rupi mbaembae uyawɨ reta ikotɨ wae wi. Jare jukuärái ndarau omombo reta Tatawasurenda pe. Tenonde kua ñee ikawi wae ou judío reta pe rani, erëi añawe ou ma wi judío mbae wae reta pewarä.

2 Corintios 12:10

Jáeramo ime yawe kía mbae kachi jei chekotɨ wae, che ayerowia aï jokua re. Jare jae nunga wi che ayerowia aï jokua chepɨräta mbae wae re, jare mbaesusere reta re, jare yembɨawái reta re. Añetete che aiporara tuicha Cristo pe ayeyokui ramo. Erëi jokua re ayerowia aï. Echa’ä che chepɨräta’ä aï yawe, Cristo imbaepuere uparawɨkɨ cheré chepɨräta waerä.

Gálatas 6:14

Erëi che ndarau etei ayembutuicha mbae re awe. Jaeño ambutuichata yandeYa Jesucristo jee jae kurusu re uyapo yandewe wae re. Echa’ä jokua jae uyapo chemaerä jeko pewa, opaete mbaembae kachi wae Cristo re wɨrowia mbae wae reta ueka wae mbae’ä ma ko chewe. Añetete che amano rami ma ko chuwi. Jare jae reta imaerä mbae’ä ma ko che.

1 Timoteo 5:21

Jayawe che tae ndewe jekuaeño iyapo kua jae aï ndewe wae. Jare awɨye pëti wae reño emae kawi. Iyapo oyowake opaete wae pe. Jare nemandúa, yandeRu Tumpa jare yandeYa Jesucristo jare iaraɨwa reta wi umae ñonoï yanderé.

2 Timoteo 1:12

Jáeramo Jesucristo jowaicho reta cheñonoka kua peresorɨru pe. Erëi che chemara’ä aï aiporara aï wae re, echa’ä aikuaa aï Jesucristo. Jare arowia katu aï jese chemborɨta oï wae opa ayapo waerä jokua jae umee chewe ayapo waerä wae. Jare jokua ara jae ou ye yawe, jae umeeta oï chewe mbae ikawi wae jokua ayapo wae re.

2 Timoteo 2:12

Jare ñamɨawäta yawe yaiporara wae yayeyokui chupe ramo, jae yandapota ñaï waerä mburuwicharä jae ndiwe jaeño mái pewa. Erëi kía uikuaku yawe, jae uikuakuta wi.

Hebreos 11:26

Echa’ä Moisés wɨrowia Upuruepɨ wae outa iko wae re. Jare chupe waerä ikawiete ko uiporara waerä jokua jae wɨrowia wae re opaete mbaembae ikawi wae ɨwɨ Egipto pe ime tëi oï wae wi. Echa’ä jae wɨrowia Tumpa jetaete ye umɨñatimata iko chupe jokua re.

Hebreos 13:13

Jáeramo yepe tëi jeta ñanerëtara judío reta opa wɨrɨ̈ro Jesucristo, erëitu yande reta yaya mii jese. Jare Jesucristo re yaya ramo, ñanerɨ̈rota reta wi. Aramoi yanemombota iyuwi reta. Erëitu ñamaeño jese reta.

Judas 1:14

Yanemandúa ñaï wi kuimbae Enoc jee wae re. Jae ko Adán jumɨmino chiu wese yuapɨ ye wae. Jae arakae umɨmbeu kërái mbae uasata oï oporomboeraanga wae reta pe kuärái: “Mase. YandeYa outa oï jetaete ye oñono tee jae imaerä wae reta ndiwe.

Apocalipsis 1:7

¡Mase, ko jae ma ou amapɨ̈tu re! Jare opaete wae uechata ñonoï. Uikutuka wae retawe uechata wi. Jare opaete kua ɨwɨ pewa reta tuicha ipɨatɨtɨta jae jeko pewa. Añetete jukuärái tuiko.

Apocalipsis 20:11

Joko wi aecha pëti wae uwapɨ oï iwapɨa mburuwicha wasu pewa pe. Jokua iwapɨa tïi jare tuicha. Jae imbaepuere jembipete ye ramo, ara jare ɨwɨ opa ukañɨ oo chuwi.

Apocalipsis 21:8

“Erëi jokua urukɨye jekowe umee wae reta, jare uipota’ä wɨrowia cheré wae reta, jare mbae kachi wae uyapo wae reta, jare upuruyuka wae reta, jare iawasapota wae reta, jare ipaye wae reta, jare tumparaanga re umbɨadora wae reta, jare opaete iyapu wae reta wi – opaete jokua nunga reta iyapɨ ko jae tata wasu azufre jendɨ oï wae pe. Kua ko jae mano mokuía jei chupe reta wae,” jei Tumpa.

Apocalipsis 3:5

‘Jukuärái wi ameeta temimonde tïi wae ikawi mbae wae umɨamɨri wae reta pe. Jare jae reta jee ndarau ambái tupapire tekowe opa mbae pewa wi – jokua ko jae tupapire kía kía tekowe opa mbae wae onoi wae reta jee uyekuatía oï pɨpe wae. Kua reta che aechakata cheRu pe jare cheRu iaraɨwa reta jowake. Jare jaeta chupe reta: “Kua reta ayapo chemaerä,” jaeta. Jukuärái ayapota upurumɨamɨri wae reta pe.