San Lucas 6:21 - Biblia

²¹ Jare pe añawe rupi piyembaɨ peï wae reta, piyekoueteta peï kuri. Echa’ä peangapɨɨta peï kuri. Jare pe añawe rupi piyao peï wae reta, piyekoueteta peï kuri. Echa’ä pepukata peï kuri.

Guaraní Pe (Western): Simba

²¹ Tuyerovia añave iyembaɨ vae reta. Echa'ã Tumpa jeta umeeta chupe reta. Tuyerovia añave uyao vae reta. Echa'ã upucata reta —jei—.

San Lucas 6:21 Iomraidhean Croise

Génesis 17:17

Jayawe Abraham uñeñono ɨwɨ re uipɨu rewe. Erëi ipɨa pe uyemɨngeta kua Tumpa jei wae rewa yawe, upuka: “¿Këraita ra chepuere amɨmembɨ chembireko ime ma anoi cien año rupi wae? Jare ¿ipuereta ra Sara imembɨ ime ma onoi noventa año rupi wae? Yawaiete ko,” jei uyemɨngeta ipɨa pe.

Génesis 21:6

Jayawe Sara jei: “¡Tumpa chembupukaka ma yerowia rewe! Jare upukata wi che ndiwe opaete kía uyandu kua rewa wae,” jei.

San Mateo 5:4

Jare uyekoueteta ñonoï wi ipɨatɨtɨ wae reta. Echa’ä Tumpa umbɨpɨakatuta oï reta kuri.

San Mateo 5:6

Jare uyekoueteta ñonoï wi opaete kía kía uipotaete iko Tumpa jowai jeko mbae wae reta. Echa’ä Tumpa umeeta chupe reta mbaepuere jukuärái yureko reta waerä.

San Lucas 1:53

Jae umɨngapɨɨ iyembaɨ wae reta tembiu ikawi wae pe. Erëi omondo ye ikokatu wae reta jukuärái etei.

San Lucas 6:20

Jayawe Jesús umae jemimboe reta re jare jei chupe reta: “Peparawete peï wae reta, piyekoueteta peï kuri. Echa’ä pe reta pikota Tumpa ndiwe jae oï ma yawe opaete wae imburuwicha wasurä jaeño mái pewa.

San Lucas 6:22

Jare che kuimbaerä ayeyapo wae, pe reta perowia cheré ramo, ïru wae reta peamɨtäata ñonoï jare pemombota reta iyuwi. Jare jeita reta mbaembae kachi wae pekotɨ, jare jeita pewe reta: ‘Añawasu ko.’ Erëi jukuärái uyapo reta pewe yawe, piyekoueteta peï kuri.

San Lucas 6:25

Jare pe añawe rupi peangapɨɨ kawi peï wae reta, ¡pikuasɨ parawete! Echa’ä uwäeta oï kuri ara piyembaɨ waerä. Jare pe añawe rupi pepuka jare perorɨkatu peï wae reta, ¡pikuasɨ parawete! Echa’ä uwäeta oï kuri ara pepɨatɨtɨ waerä jare piyao waerä.

San Juan 11:35

Jayawe Jesús jesaɨ oë ipɨatɨtɨ ramo.

San Juan 4:10

Jayawe Jesús jei chupe: “Nde ndikuaa’ä jokua mbae Tumpa uipota umee ndewe wae. Jare ndikuaa’ä wi kía ko che ɨ aeka aï ndewe wae. Jokua ndikuaa yawe, nde ndekata tëi chewe ɨ tekowe umee wae, jare che ameeta tëi ndewe,” jei chupe.

San Juan 6:35

Jayawe Jesús jei chupe reta: “Che etei ko jae jokua mbɨyape tekowe opa mbae wae umee wae,” jei. “Ipotawe kía ou chekotɨ cheré wɨrowia rewe wae ndarau etei iyembaɨ jare ndarau etei iɨwe wi,” jei umbɨjaanga rewe.

1 Corintios 4:11

Añawe rewa jeta wese oriyembaɨ jare oreɨwe. Jare oreremimonde opa ipächa oï uata orewe ramo. Jeta wese orenupa reta, jare mbaetɨ tëta mii awe nonoi.

2 Corintios 11:27

Täta aparawɨkɨ aiporara rewe. Jeta wese ma aiporara topeɨ, yembaɨ, ɨwe, jare roɨ. Jare jeta wese uata chewe temimonde.

2 Corintios 12:10

Jáeramo ime yawe kía mbae kachi jei chekotɨ wae, che ayerowia aï jokua re. Jare jae nunga wi che ayerowia aï jokua chepɨräta mbae wae re, jare mbaesusere reta re, jare yembɨawái reta re. Añetete che aiporara tuicha Cristo pe ayeyokui ramo. Erëi jokua re ayerowia aï. Echa’ä che chepɨräta’ä aï yawe, Cristo imbaepuere uparawɨkɨ cheré chepɨräta waerä.

2 Corintios 6:10

Amo pe orepɨatɨtɨ noï, erëi jesewe nduyerowia wi. Oreparawete wae ko, erëitu ore numbɨikokatu jeta wae reta Tumpa kotɨ. Jeta wae reta umae tëi oreré mbaetɨ nonoi mbae awe wae echa. Erëitu añetete opaete mbaembae ara pe oï wae orepo pe oï.

Santiago 1:12

Uyekouta oï kía umɨawäta yembɨawái reta ipɨawasu rewe wae. Echa’ä jukuärái rupi uyekuaata jae wɨrowia ma ko Tumpa re añetete rewe. Jare Tumpa umɨñatimata oï chupe kuri corona tekowe pewa. Jukuärái yaikuaa uyeyapota oï, echa’ä jukuärái Tumpa jei uyapota oï opaete uau reta wae pe.

Apocalipsis 21:3

Jare ayandu pëti ñee ara wi usapɨkai rewe jei: “Mase, añawe wiwe Tumpa jëta oï ɨwɨ pewa reta ipɨte pe. Tumpa ikota jae reta ndiwe jare jae reta yurekota Tumpa imaerä. Jare Tumpa etei ikota jae reta iTumparä,” jei.

Apocalipsis 7:16

Jáeramo ndarau ye ma jae reta iyembaɨ jare iɨwe. Jare ndarau ye ma warasɨ jasɨ chupe reta jare araku wi.