San Juan 8:39 - Biblia

³⁹ “Abraham ko jae orerukue,” jei reta chupe. Jayawe Jesús jei chupe reta: “Pe reta añetete Abraham taɨ yawe, jayawe pemomoeta tëi ko Abraham jeko.

Guaraní Pe (Western): Simba

³⁹ —Abraham co jae oreru —jei reta. —Pe reta Abraham taɨ reta añetete vae yave mona —jei Jesús—, piyapota tẽi co Abraham uyapo vae rami.

San Juan 8:39 Iomraidhean Croise

San Mateo 3:9

“Jare awɨye pere pepɨa pe: ‘Tumpa ndarau uiporaraka chewe, echa’ä che ko jae Abraham iñemoñaa pewa ramo.’ Awɨye etei jokua pere, echa’ä Abraham iñemoñaa pewa yaiko wae mbae’ä ko. Jare Tumpa uipota yawe, kua ita reta wi ipuere uyapo Abraham iñemoñaa retarä,” jei chupe reta.

San Mateo 5:45

“Jukuärái piyapo yawe, piyekuaakata pe reta ko jae peRu ara pe oï wae taɨ reta jare tayɨ reta, echa’ä piyapo peï jae uyapo wae rami,” jei. “Añetete peRu Tumpa jeko kawiete ko, echa’ä jae umee warasɨ jeko kawi wae reta pe jare jeko kachi wae reta pe wi, opaete wae onoi waerä tembipe. Jae ramiño wi jae ombou ama jupi wae reta pe jare jupi mbae wae reta pe wi, jukuärái opaete wae onoi waerä ɨ. Jukuärái ko peRu Tumpa jeko,” jei.

San Juan 8:33

Jayawe jae reta jei chupe: “Abraham iñemoñaa pewa ko ore. Mbaetɨi nduyeyokui täta rupi kía pe awe. Jáeramo, ¿maera pa nde ndere neï orewe nduyembopoikata noï wae?” jei reta chupe.

San Juan 8:37

“Che aikuaa Abraham iñemoñaa reta ko pe reta tëi. Erëi pemomoe’ä ko peï jae jeko, echa’ä pipota cheyuka peï. Jukuärái pe reta pipota piyapo peï, echa’ä perowia’ä chiñee re,” jei.

San Juan 8:43

“¿Maera pa pikuaa kawi’ä kua che aikuaaka pewe wae? Echa’ä pe reta pipota’ä piyapɨsaka peï chiñee re. Jáeramo jokua jeko pewa ko pe reta pikuaa’ä peï,” jei chupe reta.

San Juan 8:56

“Jare perukue Abraham arakaete uikuaa kawi iko che ayuta aiko wae jare jae uyerowiaete iko jokua re. Tumpa uechaka chupe chewäe ara jare jae ipɨakatu iko jokua re,” jei Jesús chupe reta.

Romanos 4:12

Jae nunga wi Abraham ko jae orerukue, opaete ore nduyembɨcircuncidaka wae reta. Erëi jaeño orepuere ndoe jukuärái, nomomoe yawe jae jeko. Kua uipota jei jaeño ndorowia yawe Tumpa re kërái Abraham wɨrowia jese rami ndei jae uyembɨcircuncidaka mbowe.

Romanos 4:16

Erëi Tumpa ipɨakawiete ye jeko pewa, jae uipota opaete wae yayekou waerä – jae ko judiorä yaiko wae reta jare judío mbae yaiko wae reta wi. Jáeramo jae jei yandewe jaeño yarowia waerä jese kërái Abraham wɨrowia jese rami. Jare jukuärái yayapo yawe, Abraham ko jae yanderukue rami Tumpa jowai.

Romanos 9:7

Yepe tëi jae reta ko jae Abraham iñemoñaa pewa, erëi jokua uipota’ä jei Tumpa umae opaete jese reta jukuärái. Añetete opaete’ä ko jae Tumpa pewarä. Jaeño Tumpa jei wae re wɨrowia wae reta ko jae Abraham iñemoñaa pewa añetete wae reta Tumpa jowai. Jae reta ko jae Tumpa taɨ reta. Jukuärái wi uyemboe Abraham. Echa’ä yepe tëi Abraham ime wɨreko ïru taɨ reta, erëi Tumpa jei chupe: “Jaeño nderaɨ Isaac iñemoñaa reta yurekota añetete ñemoñaa chemaerä.” Jukuärái jei chupe, echa’ä Tumpa etei umbɨyekuaa Isaac jae jei wae rupi – mbaetɨ ko Abraham jare jembireko uipota wae rupi. Jukuärái Tumpa jei Abraham pe jae jei chupe yawe kuärái: “Kua wi ïruwe año pe ayu yeta aï, jare nembireko Sara imembɨta ma oï kuimbae,” jei chupe. Jayawe jokoropi Abraham uikuaa jaeño ko jokua taɨ Tumpa etei umbɨyekuaata iko wae rupi Tumpa uyapota iko jae jei wae.

Gálatas 3:29

Jare pe reta Cristo pewa yawe, Abraham iñemoñaa reta pewa rami ko wi, echa’ä Cristo ko jae Abraham iñemoñaa. Jáeramo pe reta wi piyekouta peï mbaembae ikawi wae re Tumpa jei umeeta oï Abraham pe wae.

Gálatas 3:7

Jayawe pikuaa kawita ko ipotawe kía wɨrowia Tumpa re Abraham rami wae, jae ko Abraham taɨ rami Tumpa jowai.