San Juan 8:37 - Biblia

³⁷ “Che aikuaa Abraham iñemoñaa reta ko pe reta tëi. Erëi pemomoe’ä ko peï jae jeko, echa’ä pipota cheyuka peï. Jukuärái pe reta pipota piyapo peï, echa’ä perowia’ä chiñee re,” jei.

Guaraní Pe (Western): Simba

³⁷ Che aicuaa Abraham iñemoñaa reta co pe reta. Ẽrei pipota cheyuca, pipota'ã piyapo che jae peve piyapo vaerã vae ramo —jei—.

San Juan 8:37 Iomraidhean Croise

San Mateo 13:15

Echa’ä jae reta ipɨatäta uyeyapo chekotɨ. Iyapɨsa oyopɨ reta awɨye waerä uyandu chiñee. Jare usapɨmi reta awɨye waerä uecha mbaembae ayapo wae. Erëi jae reta moná uyandu chiñee yawe jare uecha reta ayapo wae yawe, ipɨa rewe uikuaa kawita reta jare uyerowata reta chekotɨ che aepɨ reta waerä,’ jei Tumpa.” Jukuärái jei Isaías,” jei Jesús chupe reta.

San Mateo 3:9

“Jare awɨye pere pepɨa pe: ‘Tumpa ndarau uiporaraka chewe, echa’ä che ko jae Abraham iñemoñaa pewa ramo.’ Awɨye etei jokua pere, echa’ä Abraham iñemoñaa pewa yaiko wae mbae’ä ko. Jare Tumpa uipota yawe, kua ita reta wi ipuere uyapo Abraham iñemoñaa retarä,” jei chupe reta.

San Juan 10:31

Jayawe joko pe ñonoï wae reta pochɨ jare upi ye tëi reta ita uyapi uyuka waerä Jesús.

San Juan 11:53

Jayawe Caifás jei wae jeko pewa, jokua ara wiwe opaete judío itenondewa reta uyemboemboe kërái Jesús uyukaka waerä.

San Juan 5:44

“Pe reta pipotaete pe yepái piyembutuichaka waerä. Erëi peka’ä peï Tumpa pembutuichaka waerä. Jare jukuärái yawe, ¿këraita pa pepuere perowia cheré? Ndarau piyapo,” jei chupe reta.

San Juan 7:1

Kua jaɨkue rupi Jesús jare jemimboe reta ndiwe yuraa tëta wasu reta rupi ɨwɨ Galilea pe. Jesús uipota’ä oo ɨwɨ Judea pe, echa’ä joko pe uipota judío itenondewa reta uyukaka ramo.

San Juan 7:19

“Jare pe reta, yepe tëi Moisés uikuaaka pewe Tumpa jei wae, erëi pëti awe pe reta piyapo’ä jae jei wae rupi. Jayawe ¿maera pa pipota cheyuka peï?” jei chupe reta.

San Juan 7:25

Jayawe amokue Jerusalén pewa reta jei: “¿Jae’ä yerá kua kuimbae mburuwicha reta uipota tëi uyukaka ñonoï wae?

San Juan 8:33

Jayawe jae reta jei chupe: “Abraham iñemoñaa pewa ko ore. Mbaetɨi nduyeyokui täta rupi kía pe awe. Jáeramo, ¿maera pa nde ndere neï orewe nduyembopoikata noï wae?” jei reta chupe.

San Juan 8:43

“¿Maera pa pikuaa kawi’ä kua che aikuaaka pewe wae? Echa’ä pe reta pipota’ä piyapɨsaka peï chiñee re. Jáeramo jokua jeko pewa ko pe reta pikuaa’ä peï,” jei chupe reta.

San Juan 8:56

“Jare perukue Abraham arakaete uikuaa kawi iko che ayuta aiko wae jare jae uyerowiaete iko jokua re. Tumpa uechaka chupe chewäe ara jare jae ipɨakatu iko jokua re,” jei Jesús chupe reta.

San Juan 8:59

Jare kua uyandu reta yawe, opaete wae reta pëti pëti wae upi ita uyapi uyuka waerä tëi Jesús. Erëitu jae ukañɨ chuwi reta jare oë oo tupao wasu wi jae reta ipɨte wi etei.

San Juan 8:6

Kua jei reta Jesús pe, echa’ä ueka yureko tëi kërái uitɨ waerä Jesús iñee pei umbɨjeko reta waerä. Erëi Jesús jei’ä chupe reta mbae awe. Jaeño uwapɨchuku jare ipoäka pe umbɨpɨ uikuatía ɨwɨ re.

Hechos 13:26

“Jayawe cherɨkeɨ reta jare cherɨwɨ reta – jae ko pe Abraham iñemoñaa pewa reta jare Tumpa wi pipɨu wae reta wi – che tae pewe jokua ñee tekowe opa mbae wae pewa ou ma uwäe yandewe,” jei.

Romanos 9:7

Yepe tëi jae reta ko jae Abraham iñemoñaa pewa, erëi jokua uipota’ä jei Tumpa umae opaete jese reta jukuärái. Añetete opaete’ä ko jae Tumpa pewarä. Jaeño Tumpa jei wae re wɨrowia wae reta ko jae Abraham iñemoñaa pewa añetete wae reta Tumpa jowai. Jae reta ko jae Tumpa taɨ reta. Jukuärái wi uyemboe Abraham. Echa’ä yepe tëi Abraham ime wɨreko ïru taɨ reta, erëi Tumpa jei chupe: “Jaeño nderaɨ Isaac iñemoñaa reta yurekota añetete ñemoñaa chemaerä.” Jukuärái jei chupe, echa’ä Tumpa etei umbɨyekuaa Isaac jae jei wae rupi – mbaetɨ ko Abraham jare jembireko uipota wae rupi. Jukuärái Tumpa jei Abraham pe jae jei chupe yawe kuärái: “Kua wi ïruwe año pe ayu yeta aï, jare nembireko Sara imembɨta ma oï kuimbae,” jei chupe. Jayawe jokoropi Abraham uikuaa jaeño ko jokua taɨ Tumpa etei umbɨyekuaata iko wae rupi Tumpa uyapota iko jae jei wae.

1 Corintios 2:14

Erëi Cristo re wɨrowia mbae wae reta mbaetɨ onoi Espíritu Santo. Jáeramo wɨrɨ̈ro reta mbaembae Tumpa iEspíritu uikuaaka wae, echa’ä jokua mbae’ä ko chupe reta. Jare jae nunga wi ipuere’äwe uikuaa kawi reta jokua mbaembae, echa’ä jaeño Espíritu Santo onoi wae reta ipuere uikuaa jokua mbaembae rewa.

1 Juan 2:14

Pe pekuakuaa ma piko wae reta, pe reta pikuaa jokua iyɨpɨ wiwe ikoño mái wae. Jare jokua jeko pewa ko aikuatía aï pewe. Jare pe taurusu piko wae reta, pe reta pepɨräta peï Tumpa re, jare Tumpa iñee oï pepɨa pe, jare pemɨamɨri ma Añawasu. Jare jokua jeko pewa ko aikuatía aï pewe wi.