San Juan 8:12 - Biblia

¹² Jayawe Jesús umbɨpɨ ye omboe joko pe ñonoï wae reta: “Che ko jae tembipe rami ɨwɨ pewa reta pe, echa’ä aikuaaka chupe reta añetete wae Tumpa rewa. Jare ipotawe kía che ndiwe oï wae ndarau ye ma iko pɨ̈tumimbi pe rami. Echa’ä che amee chupe tekowe ipɨau wae jare opa mbae wae, jare jokua ko tembipe rami chupe,” jei chupe reta.

Guaraní Pe (Western): Simba

¹² Cua jaɨcue rupi Jesús jei yatɨ vae reta pe: —Che co jae penti tembipe rami. Ayu co ɨvɨ pegua reta uecha cavi vaerã. Ico che ndive vae ndarau uguata pɨ̃tumimbi pe. Echa'ã güɨnoita tecove ipuere vaerã uecha cavi —jei.

San Juan 8:12 Iomraidhean Croise

San Mateo 5:14

“Jae nunga wi pe cheremimboerä piko wae reta, pe reta ko jae pëti tembipe rami ɨwɨ pewa reta pewarä. Jare tembipe ko jae yaecha waerä. Ndarau kiawe ipuere oñomi pëti tëta wasu ɨwɨtu re oï wae,” jei.

San Lucas 2:32

Jae ikota pëti tembipe rami judío mbae wae reta pe, echa’ä jae ndekuaakata oï chupe reta. Jare jae orembutuichata oï, ore Israel pewa nduiko wae reta, echa’ä ore ko jae nde oreparawo wae reta.” Jukuärái jei Simeón.

San Juan 12:35

Jayawe Jesús jei chupe reta umbɨjaanga rewe: “Tembipe imeñota oï pe reta ndiwe michi pewaeño. Jáeramo pemaeño kua tembipe re umbɨembipe waerä pepɨa pe. Jukuärái ndarau pepɨranoe pewa pɨ̈tu pewe. Echa’ä pɨ̈tumimbi pe uwata wae reta jopa ñonoï jare uikuaa’ä ketɨ ra yuraa ñonoï wae,” jei chupe reta.

San Juan 12:36

“Jare kua tembipe oï pe reta ndiwe rambuewe, perowia jese pepuere waerä piko Tumpa taɨ retarä,” jei Jesús chupe reta. Jare kua jei ma yawe, Jesús oo ukañɨ chuwi reta.

San Juan 12:46

“Che ayu ko ambɨembipe waerä ɨwɨ pewa reta ipɨa pe. Jare jukuärái ipotawe kía cheré wɨrowia wae ndarau iko pɨ̈tumimbi pe,” jei.

San Juan 14:6

Jare Jesús jei chupe: “Che ko jae tape Tumpa kotɨ oo wae. Che ko jae añetete ayemɨngeta Tumpa rewa wae. Cheño ko jae tekowe opa mbae wae amee wae. Jare kiawe ipuere’ä oya cheRu re – jaeño che rupi,” jei chupe.

San Juan 3:19

Jare Tumpa jupi ko umbɨjeko reta waerä. Echa’ä Taɨ ou ma umbɨembipe waerä ɨwɨ pewa reta ipɨa jae reta uikuaa waerä añetete wae Tumpa rewa. Erëi jesewe opaete seri uipotaete iko reta pɨ̈tumimbi pe. Uipota’ä iko reta jokua tembipe pe, echa’ä uipota uyapo reta mbaembae ikawi mbae wae ramo.

San Juan 7:17

“Erëi pe reta, ¿këraita ra pikuaa jokua che aporomboe wae ou ra ko chewiño ani ou ra Tumpa wi? Che tae pewe, tenonde imeta ko piñeñono piyapo rani waerä Tumpa jei wae rupi. Jayawe ramo pikuaata che aporomboe wae ou ko Tumpa wi wae,” jei.

San Juan 9:5

Erëi añawe rupi ko aï kua ɨwɨ pe. Jare che ko jae tembipe rami ɨwɨ pewa reta pewarä,” jei chupe reta.

Hechos 13:47

“Mase, arakae Tumpa jei yanderamɨkue reta pe kuärái: ‘Che pomondo aï judío mbae wae reta pe peraa waerä chupe reta arakuaa. Jukuärái pikota chupe reta tembipe rami. Pemɨmbeuta opaete ɨwɨ pewa reta pe kërái ipuere onoi reta waerä tekowe opa mbae wae.’ Jukuärái jei Tumpa chupe reta, jare jukuärái Tumpa oreokui nduyapo waerä,” jei Pablo jare Bernabé chupe reta.

Hechos 26:23

Echa’ä jae reta arakaete jei Cristo yae chupe wae uiporara ñotái iko jare umano ñotái iko. Jare joko wi jae rani ikowe yeta ou iko umanokue wae reta ipɨte wi uikuaaka waerä judío reta pe jare judío mbae wae reta pe wi Tumpa iñee añetete wae. Jare jukuärái jae ikota pëti tembipe rami chupe reta,” jei Pablo Agripa pe.

2 Pedro 2:17

Jokua oporomboe kachi wae reta ko jae ɨkua opa ma tɨpa wae rami, echa’ä jae reta oporomboe wae yanemborɨ'ä maeräwe – jaeño upurumbɨtawɨ waerä. Jare jae nunga wi jae reta ko jae amapɨ̈tu ɨwɨtu täta wae opa wɨraa wae rami, jare okɨ'ä. Jukuäraiete wi kua kuimbae reta upurumbɨtawɨ. Jáeramo Tumpa uyapɨkatu ma chupe reta kiape pɨ̈tumimbiete oï wae pe jae reta jendarä, joko pe omombo reta waerä jaeño mái pewa.

2 Pedro 2:4

Yaikuaa Tumpa uiporarakata oï chupe reta, echa’ä araɨwa retawe ipuere’ä oyepe Tumpa iarasɨ wi arakaete uyawɨ reta Tumpa kotɨ yawe. Echa’ä Tumpa ara wi omombo reta pɨ̈tumimbiete oï wae pe, jare joko pe uñeñapɨ̈ti ñonoï reta ara taɨkuewa uwäe rewa. Jare jokua ara uwäe yawe, uyemboɨta reta Tumpa jowai Tumpa uiporaraka waerä chupe reta jaeño mái pewa.

1 Juan 1:6

Jayawe yande reta yae yawe, “Che añemɨïru kawi aï Tumpa ndiwe,” yae yawe, erëi yandereko jekuaeño kachi oï yawe, yandapu ko. Jokua ko jae pɨ̈tumimbi pe jekuaeño ñaï wae rami, echa’ä mbaetɨ ko yaiko añetete wae rupi.

Judas 1:13

Jae nunga wi kua kuimbae reta ko jae ɨaparoa wasu tɨrɨye rami. Echa’ä jae reta umaeño iyé uyereraaka waerä kotɨ kotɨ jete uipota wae rupi, jare jukuärái jekuaeño uyapo reta mbaembae ñemɨmaraka pewa. Kua nunga reta re ndarau ikawi kiawe wɨrowia waerä, echa’ä jae reta ko jae yasɨtata uwata wae reta rami. Jáeramo Tumpa uyapɨkatu ma chupe reta kiape pɨ̈tumimbiete oï wae pe joko pe omombo reta waerä jaeño mái pewa.

Judas 1:6

Jare yanemandúa wi arakae mbae uasa amokue araɨwa reta pe. Yepe tëi Tumpa umee chupe reta mbaepuere ara pe, erëi uwäe ara jae reta uipota’ä jokua mbaepuere jare opa ueya reta jenda ara pewa. Jáeramo Tumpa omombo reta kiape pɨ̈tumimbiete oï wae pe, jare joko pe jae reta uñeñapɨ̈ti ñonoï ara taɨkuewa uwäe rewa. Jare jokua ara uwäe yawe, uyemboɨta reta Tumpa jowai Tumpa uiporaraka waerä chupe reta jaeño mái pewa.

Apocalipsis 21:24

Jare opaete ɨwɨ pewa reta yureko kawita jokua tëta wasu jembipe pe. Jare jokua ara rupi ɨwɨ pewa mburuwicha wasu reta yuweruta jokua tëta wasu pe umbutuicha reta waerä Tumpa jee.