San Juan 7:28 - Biblia

²⁸ Jesús imeño oporomboe iko tupao wasu joka pe. Jayawe jei usapɨkai rewe: “Añetete pe reta chekuaa ko, jare pikuaa tëi wi kía pewa ko che wae. Jare perowia tëi wi che ayu ko aipota ramoño. Erëi jukuärai’ä ko. Tumpa añetete wae, jae ko chembou. Erëi pe reta pikuaa’ä jae.

Guaraní Pe (Western): Simba

²⁸ Jáeramo Jesús oporomboe oĩ rambueve Tumpa jo pe, iñeeãta reve jei: —Pe reta checuaa co, jare picuaa co quetɨ güi ayu vae. Ẽrei ayu'ã che aipota ayu rupiño. Echa'ã chembou vae imiari añete vae re, jare pe reta picuaa'ã chembou vae —jei—.

San Juan 7:28 Iomraidhean Croise

Jeremías 31:34

Jare ndarau ye ma ime kía omboe japicha wae jare jëtara wae chekuaa waerä. Ndarau ye ma ime kía jei ïru pe uyemboe waerä cheré. Echa’ä opaete wae – iparawete wae reta wiwe jare mburuwicha retawe – chekuaata ñonoï. Echa’ä che amaeta jese reta aiparareko rewe. Ambaita chuwi reta mbaembae uyawɨ reta chekotɨ wae jare ndarau ye ma chemandúa jese.” Jukuärái jei Tumpa ikoño mái wae.

San Mateo 11:27

Jayawe Jesús jei wi joko pe ñonoï wae reta pe: “CheRu umee ma chewe mbaepuere opaete mbaembae re. Jaeño chekuaa kawi. Mbaetɨ ye kiawe chekuaa kawiete. Jae ramiño wi mbaetɨ kiawe uikuaa kawiete cheRu. Cheño aikuaa kawi. Jare jokua che aikuaaka chupe wae reta uikuaa wi,” jei chupe reta.

San Mateo 2:23

Jare yuraa uwäe reta pëti tëta wasu Nazaret jee wae pe jare joko pe uyakao reta. Kua uasa uyeyapo waerä Tumpa iñee arakae umɨmbeu wae reta jei uyeyapota iko wae. Echa’ä jei reta Upuruepɨ wae rewa kuärái: “Jeita chupe reta: ‘Jae ko pëti Nazaret pewa,’ jeita reta.”

San Mateo 26:55

Jayawe Jesús jei yuweru wae reta pe: “¿Maera pa peyu kɨsepuku rewe jare ɨwɨra rewe chepɨsɨ waerä? ¿Jae yerá che imonda jeko kachi wae?” jei chupe reta. “Opa ara rupi che aporomboe aiko pepɨte rupi tupao wasu joka pe. ¿Maera pa joko pe chepɨsɨ'ä?” jei.

San Lucas 10:22

Jayawe Jesús jei wi joko pe ñonoï wae reta pe: “CheRu umee ma chewe mbaepuere opaete mbaembae re. Jaeño chekuaa kawi. Mbaetɨ ye kiawe chekuaa kawiete. Jae ramiño wi mbaetɨ kiawe uikuaa kawiete cheRu. Cheño aikuaa kawi. Jare jokua che aikuaaka chupe wae reta uikuaa wi,” jei chupe reta.

San Lucas 2:11

Echa’ä kua pɨ̈tu etei oa ma Upuruepɨ wae David jëta wasu pe. Jae ko yandeYa etei jare Cristo pere chupe wae,” jei.

San Lucas 2:39

Jayawe José jare María opa uyapo reta yawe tupao wasu pe Tumpa iñeerɨru pe jei wae rupi, opa ye yuraa reta jëta wasu Nazaret kotɨ ɨwɨ Galilea pe.

San Lucas 2:4

Jare jukuärái uyapo José wi. Jae oë oo Nazaret wi – jokua tëta wasu oï ɨwɨ Galilea pe. Jare oo ɨwɨ Judea kotɨ tëta wasu raɨ Belén pe, echa’ä jae ko David iñemoñaa pewa ramo, jare David jëta wasu raɨ ko jae Belén.

San Lucas 2:51

Jayawe Jesús oo ye Nazaret pe jae reta ndiwe, jare jekuaeño uyapo jae reta jei wae rupi. Jare Jesús ichɨ upi ipɨa pe opaete jokua mbaembae uasa wae.

San Juan 1:46

Jayawe Natanael jei chupe: “¿Ipuere yerá mbae ikawi wae uyekuaa Nazaret wi?” jei chupe. “Ya emae jese,” jei Felipe. Jayawe yuraa uwäe reta Jesús oï wae pe.

San Juan 10:36

“Erëitu añawe pe reta chembɨjeko peï, echa’ä che jae pewe che ko jae Tumpa Taɨ ramo. ‘Nde ndere mbae kachi wae Tumpa kotɨ,’ pere chewe. Erëi awɨyeta tëi ko pere jukuärái, echa’ä che pëti kuimbaeño’ä ko. Echa’ä cheRu Tumpa etei ko cheñono tee jae imaerä jare chembou kua ɨwɨ pe,” jei Jesús chupe reta.

San Juan 12:49

echa’ä chiñee ou’ä chewiño. CheRu ko chembou, jare jae ko jei chewe mbae jae waerä jare kërái jae waerä,” jei.

San Juan 14:10

“¿Mbaetɨ yerá nderowia che aï cheRu ndiwe jare cheRu oï che ndiwe wae? Kua ñee reta amɨmbeu aï pewe wae ou’ä ko chewiño. CheRu wi ko ou. CheRu pëtiño ko che ndiwe, jare jae ko uparawɨkɨ oï che rupi,” jei.

San Juan 14:31

“Erëitu kua uyeyapota oï cheRu jei ramo. Jáeramo che añemee aï ayapo waerä cheRu jei wae, echa’ä aipota opaete ɨwɨ pewa reta uikuaa waerä auete ko cheRu wae,” jei Jesús jemimboe reta pe. Jare Jesús kua opa ma jei yawe, jei chupe reta: “Pepüa. Ya ma kua wi.”

San Juan 16:3

“Kua uyapota pewe reta, echa’ä jae reta chekuaa’ä jare uikuaa’ä wi cheRu.

San Juan 17:25

“CheRu jupiete ye wae, kua ɨwɨ pewa reta ndekuaa’ä. Erëi che ndukuaaño mái. Jare kua cheremimboe reta uikuaa nde ko chembou wae,” jei.

San Juan 17:3

“Jare ¿mbae ra jokua tekowe opa mbae? Nde ko jae pëtiño Tumpa añetete wae, jare che ko jae Jesucristo nde chembou wae. Tayandekuaa reta. Jokua ko jae tekowe opa mbae wae,” jei.

San Juan 3:2

Pëti wese kua kuimbae ou Jesús oï wae pe pɨ̈tu yawe uyemɨngeta waerä jae ndiwe. Jare jei chupe: “Oporomboe wae, ore nduikuaa ko Tumpa nembou ndeporomboe waerä. Echa’ä nde ndiyapo neï mbaembae kiawe ipuere’ä uyapo wae. Erëi Tumpa nemborɨ'ä yawe, ndarau etei ndepuere ndiyapo jokua nunga mbaembae,” jei chupe.

San Juan 3:33

Erëi Tumpa ko ombou jare umee chupe Espíritu Santo opaete imbaepuere rewe. Jáeramo jae jupi umɨmbeu Tumpa iñee. Jare ime yawe kía wɨrowia jae iñee re wae, uikuaa Tumpa iñee añetete yepe.

San Juan 5:32

Erëi ime ïru wae umɨmbeu oï wi che rewa. Jae ko Juan. Jare che aikuaa jokua jae umɨmbeu pewe wae añetete ko,” jei chupe reta.

San Juan 5:43

“Che ayu ko cheRu jee re, erëitu pe reta chererɨ̈ro peï. Erëi jekuaeño pembɨasa kawi ipotawe kía jaei uipota ramoño ou wae,” jei.

San Juan 6:42

Jei reta iyupe: “¿Jae’ä yerá kua Jesús José taɨ? Echa’ä yaikuaa katu ko tu jare ichɨ wi. Jayawe, ¿kërái yerá añawe jae jei oï, ‘Che ayu ko ara wi’?” jei reta iyupe.

San Juan 7:14

Jare tabernáculos iara reta mbɨte ma uasa yawe, Jesús uike tupao wasu joka pe jare joko pe umbɨpɨ oporomboe.

San Juan 8:14

Jayawe Jesús jei chupe reta: “Jukuärái tëi ko. Erëitu kua che jae chiyé wae añetete ko, echa’ä che aikuaa ko ketɨ wi ayu wae jare ketɨ a wae. Erëi pe reta pikuaa’ä jokua rewa. Jáeramo pepuere’ä pere chewe: ‘Nde ndere neï wae mbae’ä ko.’

San Juan 8:16

Erëitu aipota jae yawe kía jeko rewa, che ayapota jupi rupi kawi, echa’ä cheiño’ä ayapo aï. CheRu chembou wae jae che ndiwe oï. Jare che cheRu ndiwe ndupurumbɨjeko jupi rupi kawi,” jei chupe reta.

San Juan 8:19

Jayawe jae reta jei chupe: “¿Kiape pa oï nderu?” jei reta chupe. Jayawe Jesús jei: “Pe reta chekuaa’ä jare pikuaa’ä wi cheRu. Añetete pe chekuaa yawe, pikuaata tëi ko wi cheRu,” jei chupe reta.

San Juan 8:26

“Añetete che ime jeta mbaembae re chepuere tëi jae pewe pumbɨjeko waerä. Erëitu che jaeño amɨmbeu ɨwɨ pewa reta pe jokua chembou wae jei chewe wae etei. Jare jae jekuaeño uyemɨngeta jupi rupi kawi,” jei chupe reta.

San Juan 8:42

Jayawe Jesús jei chupe reta: “Añetete Tumpa ko jae peRu yawe, jayawe pe reta cherauta tëi ko, echa’ä che ayu ko Tumpa wi. Tumpa etei ko chembou. Che ayu’ä ko che aipota ramoño,” jei chupe reta.

San Juan 9:29

Ore nduikuaa Tumpa ko ombou Moisés, echa’ä uyemɨngeta jae ndiwe. Erëi jokua Jesús, ore nduikuaa’ä etei kía ra ombou wae,” jei reta kuimbae pe.

Hechos 17:23

“Echa’ä awata aiko rambuewe tëta wasu rupi, aecha jeta ambɨe ye ye petumpa reta pe uñeñono tee oï yembɨadorarenda reta,” jei chupe reta. “Jare aecha wi pëti mbaerenda ambɨe ye wae. Echa’ä uyekuatía oï jese kuärái: ‘TUMPA YAIKUAA MBAE WAE PEWARÄ.’ Jukuärái uyekuatía oï jese. Jáeramo jokua Tumpa pe reta pikuaa mbae wae rewe pipɨu chuwi wae, añawe aipota amɨmbeu kawi pewe jesewa,” jei chupe reta.

Romanos 1:28

Jayawe opaete wae uikuaa tëi yureko Tumpa rewa, erëi jesewe opaete seri opa umbɨsɨrɨ iyuwi jokua arakuaa. Jáeramo Tumpa ipɨatɨtɨ rewe opa ueya reta uyemɨngeta reta waerä ipɨa pe opaete mbaembae ikawi mbae wae re. Jare jokua jeko pewa jae reta añawe rewa jekuaeño uyapo opaete mbaembae ikawi mbae wae Tumpa jowai.

Romanos 3:4

¡Uyapota ko! Echa’ä yepe tëi opaete ɨwɨ pewa reta iyapu wae reta ko, erëi Tumpa jekuaeño uyapo jupi jae jei wae rupi. Jukuärái yanderamɨkue David arakae uikuaa. Echa’ä jae uikuatía kuärái: “CheRu Tumpa, nde ndiyemɨngeta yawe, uyekuaata taɨkue rupi jokua nde ndere wae añetete ko. Jare yepe tëi ko kuimbae reta nembɨjeko, erëi ndarau nemaeño niñemɨamɨrika waerä chupe reta.” Jukuärái David arakae uikuatía. Jayawe Tumpa jekuaeño uyapo jupi rupi jae jei wae.

2 Corintios 1:18

Kërái yarowia katu Tumpa, jukuärái wi pe reta pepuere orererowia katu. Echa’ä che jare Silvano jare Timoteo mbae ndoe yawe pewe, ore nduyemɨngeta’ä noï ambɨe ye orepɨa pe. Ore numɨmbeu kawi pewe Jesucristo Tumpa Taɨ rewa. Jare pe reta pikuaa kawi jae jekuaeño uyemɨngeta añetete wae. Jekuaeño uyapo jae jei uyapota oï wae.

2 Corintios 4:6

Nduyembutuicha’ä etei, echa’ä Tumpaño ko umbɨyekuaa tembipe pɨ̈tumimbi wi. Jare Tumpa etei ko umbɨembipe yandepɨa pe yaikuaa kawi waerä kërái Cristo rupi etei ko uyekuaa Tumpa imbaepuere jembipete ye wae.

Tito 1:2

Jae reta wɨrowia kawi yawe Cristo re jare yemboe añetete wae uikuaa kawi reta yawe, wɨrowia katu rewe uärota ñonoï tekowe opa mbae wae. Echa’ä ndei ɨwɨ uyembɨpɨ mbowe, Tumpa jei umeeta oï yandewe tekowe opa mbae wae. Jare Tumpa ndarau etei iyapu yandewe.

Hebreos 6:18

Jukuärái Tumpa jei jare jae iyapu’ä etei ko. Jáeramo yandepuere yarowia katu Tumpa uyapo waerä jokua jae jei yandewe wae. Jayawe yande reta Tumpa re ñañepɨ̈ro ñaï wae, kua mbaembae ñanemɨatangätuete jekuaeño ñaäro waerä yarowia katu rewe Tumpa jei wae opaetei.

1 Juan 5:10

Kía Tumpa Taɨ re wɨrowia wae uikuaa ipɨa pe añetete ko kua mbaembae Tumpa uikuaaka yandewe wae. Erëi jokua wɨrowia’ä wae jei oï tëi Tumpa pe iyapu wae ko, echa’ä wɨrowia’ä Tumpa jei Taɨ rewa wae ramo.